Anke Nissen
Toxisch Planten


Na Folg 1, Folg 2, Folg 3, Folg 4, Folg 5, Folg 6, Folg 7, Folg 8, Folg 9, Folg 10, Folg 11, Folg 12, Folg 13, Folg 14, Folg 15


Pfaffenhütchen (Euonymus europaea)

  • Gift: Herzglykoside
  • Besünners giftig: De Früchte. Lütte Kinner warrt licht verführt, de besünnern Blöden vun 't Pfaffenhütchen in'n Mund to steken.
  • Symptome bi' t Vergiften sünd just so as bi 'n Fingerhoot:
    • Övelsien
    • Breken
    • Koliken
    • Blödig Dörchfall
    • Een kann nich mehr goot kieken
    • Kreislauf-Kollaps
    • Krämpfe
    • Koma
    • Dood dörch Stillstahn vun 't Hart
  • Eerste Hülp:
    • Medizinisch Kohle
    • Natriumsulfat as Abführmittel
    • Veel drinken!


Foto Anke Nissen

Dat smucke Pfaffenhütchen is leider ok giftig. Sien Gift sünd Hartglykoside. 2006 weer de Struuk dorüm de "Giftplant vun 't Johr". Mi dücht, dat kümmt öfters vör, dat ene schöne Plant bannig giftig is. Alle Dele vun uns Pfaffenhütchen — vör allen aver siene Samen — hebbt dat Alkaloid Evonin in sik, dorto lütte Mengen Evonosid, dat up uns Hart inwirken deit. Wenn de Minsch 30 bet 40 Früchte to sik nimmt, bringt em dat mehrst al den Dood — so heff ik leest. Vagels köönt dat twoors freten, so as mennig Giftplant, aver dat schall uns nich tüüschen!

Dat Holt vun't Pfaffenhütchen is taag un hart. Dorüm wörr 't fröher geern to 'n Drechseln nahmen. As Bispill hett man Stricknadeln, aver ok de Spindeln för en Spinnrad ut dit Holt dreiht. Dorwegen heet de Plant ok "Spindelstrauch". Ja, un wiel doch de ganze Plant giftig is — also ok dat Holt —, kann ik nu endlich verstahn, woso in dat Märken "Dornröschen" de Prinzessin, as se sik an de Spindel piekt harr, glieks ümsack is un as doot dor leeg. Wi weet dat ja all: 100 Johr lang leeg se in't Koma un is nich wedder waak worrn. Bet de Prinz ehr en Söten geven hett. Aver Wohrschuug: En Söten geven, dat gellt nich as Eerst Hülp bi Vergiften! Dat hett sik in de Medizin nich bewährt — sünst geev dat al lang keen Komapatienten mehr. Beter roopt Se en Dokter as en Prinzen.

Amaryllis, Ritterstern (Hippeastrum)

  • Gift: Lycorin un annere Alkaloide
  • Besünners giftig: De Zibbel
  • Symptome bi' t Vergiften:
    • Övelsien
    • Breken
    • Dörchfall
    • de Minsch fangt an, dull to sweten
    • de Mund watert as verdull
    • de Minsch warrt benüsselt orr fallt sogor in Amidam
    • bi en hoge Dosis: Krämpfe, Verklamen, Kreislaufkollaps.

Wenn dat op Wiehnachten togeiht, kümmt wedder de Tied för düsse smucke Plant ut de Familie vun de Narzissengewächse, de eentlich ut Südamerika stammt, ut de Bargen vun Peru. Wi kennt se bloots as Stuvenplant, un sünnerlich üm Wiehnachten haalt sik de Minschen düsse schöne Blööt in't Huus, de in ehr Foorm an den Steern vun Bethlehem erinnert. Wat Wunner, dat ok düsse wunnerschöne Plant as stark giftig bekannt is! Wieldat de Gifte in de ganze Plant vörkaamt (besünners stark in de Zibbel), warrt seggt, dat Familien mit Kinner de Plant gor nich in't Huus hebben schulln.

Tja, de schöönsten Planten sünd faken de gefährlichsten. Wat will uns de Natuur dormit wohl seggen?


27.8.2022


na baven