Anke Nissen
Toxisch Planten

Na Folg 1, Folg 2, Folg 3, Folg 4, Folg 5, Folg 6, Folg 7, Folg 8, Folg 9, Folg 10, Folg 11, Folg 12, Folg 13, Folg 14

Rizinus (Ricinus communis)

• Gift: Rizin
• Besünners giftig: Samen

Rizinus is en legendäre Plant, ok al in de Bibel kümmt se vör. Se is nich direkt en heimische Plant, avers ok in Middeleuropa kümmt se nu vör, un je wärmer dat bi uns warrt, je wohler föhlt sik de Rizinus.

De Bläder vun düssen lütten Boom sünd heel charakteristisch un schöön, as dat Foto vun Rudi Witzke wiest. De Samen aver sünd dull giftig. Al 5 bet 6 Samen köönt en Kind to Dood bringen. Bi en Vergiften kümmt dat to Erbreken, groot Flüssigkeitsverlust. De Dood kümmt dörch Kreislaufkollaps. Dat gifft keen Gegengift! — Dorwegen is Rizinus ok de Giftplant vun't Johr 2018 worrn.

Dat Gift geiht aver nich in dat Ööl över, dat ut de Samen wunnen warrt.

Korallenbäumchen (Solanum pseudocapsicum)

• Gift: Solanocapsin
• Besünners giftig: Beerenfüchte
• Symptome:
  • Övelsien
  • Erbreken
  • Pien in'n Maag
  • De Pupillen warrt wiet
  • De Mensch warrt mööd, slöperig
  • Kann in'n Extremfall to Atem-Lähmen kamen

Dat Korallenbäumchen is bi uns en Pottbloom, keen Goornplant. De Plant höört aver to de Nachtschattengewächse un is dormit en entfernte Verwandte vun uns Kantüffel. Dorbi stammt dat Bäumchen ut Südamerika. Ja, de Nachtschattengewächse sünd en internaschonale Familie! De mehrsten dorvun sünd allerdings op jichenseen Aart giftig.

Dat Korallenbäumchen hett richtig schöne rode Beerenfrücht. Se seht en beten liek ut as Kirschtomaten. Man disse Frucht is giftig. Bi Familien mit Kinner, besünners mit lütte Kinner, sull lever keen Korallenbäumchen wassen — so smuck dat ok utsüht.

Ok för Deerten köönt de Korallenbäumchen-Früchte gefährlich warrn, so för Hunnen, Katten, Nager as Hasen, Karnickel, Hamster, Meerswien un ok för Vagels.