Anke Nissen
Toxisch Planten


Na Folg 1, Folg 2, Folg 3, Folg 4, Folg 5, Folg 6, Folg 7, Folg 8, Folg 9, Folg 10, Folg 11, Folg 12, Folg 13


Guldregen (laburnum amagyroides)


Bild: Anke Nissen

  • Gift: Cytisin (Alkaloid); besünners giftig sünd siene Samen
  • Symptome: Ähnlich as bi Nikotin:
    • Eerst wirkt dat Gift stark anregen,
    • later maakt dat verklaamt,
    • den Minschen warrt övel, he mütt spien;
    • denn kümmt dat to en Verklaamen vun Atem un Hart.
  • Eerste Hölp: Dorför sorgen, dat de Minsch sik övergeven deit; medizinisch Kohle un Afföhrmittel

De Guldregen stammt ut Südeuropa, diegt aver ok bi uns in'n Noorn good un warrt vunwegen sien schöne Blöden veel as Zierstruuk anplant. De Plant hett in all ehre Dele giftige Alkaloide in sik. Al twee bet dree Samen köönt Kinner to'n Dood bringen. De Samen stekt in Schoten, de Arften- orr Bohnenschoten liek seht, un se smeckt nich bitter, dorüm is besünner Vörsicht nödig.

Seidelbast (Daphne mezereum)

  • Gift: Alkaloide. Besünners giftig sünd Rinde und Samen, aver ok 10 Beeren köönt enen utwussen Minschen den Dood bringen.
  • Symptome:
    • Röten un Answellen vun de Sliemhuut
    • De Speichel warrt mehr
    • Koppweh
    • Een warrt ganz benaut, ganz benommen
    • Gastroenteritis
    • Schock
  • Eerste Hölp:
    • Bi lokalet Verätzen: köhle Ümslääg, Anästhesin-Salv
    • Bi Verslucken: blots den Notarzt!

De Seidelbast is en inheimsche Plant un kümmt in ganz Eurasien wild vör, warrt avers ok as Zierstruuk anplant.

Seidelbast hett lokal reizen Inhaltstoffe in sik (Daphnetoxin un Mezerein). De köönt al bi't Plücken Verätzen an de Huut, an de Hannen bringen. Warrt Seidelbast eten, gifft dat Verätzen an de Darmsliemhuut. De Nieren gaht twei.

Ik heff leest, de Rook vun't Lagerfüür mit Seidelbastholt hett in Korsika vele Soldaten starven laten.


24.4.2022


na baven