Anke Nissen
Toxisch Planten

Na Folg 1, Folg 2, Folg 3, Folg 4, Folg 5, Folg 6 , Folg 8, Folg 9 , Folg 10, Folg 11, Folg 12, Folg 13, Folg 14, Folg 15

Eibe (Taxus baccate)

Besünners giftig: Nadeln un Samen
Gift: Taxin (Alkaloid)
Symptome:

• Erbreken,
• dulle Buukweh
• Diarrhöe
• De Pupillen warrt wiet
• Krämpfe, Swindel
• Schock
• Dood dörch Atemlähmen

Erste Hölp:

• Erbreken provozeern
• medizinisch Kohle un Abführmittel

Eibenhecken warrt ok Taxushecken nöömt, un se sünd överall antodrepen, wieldat de Eibe robust un smuck is. Nu de Harvst kümmt, draagt se ehr smucke rode Frücht. Aver Wohrschuug: Rinde, Nadeln un Samen vun de Plant sünd giftig, dat Gift hett sogor na de Plant ("Taxus") den Naam Taxin kregen. De levensgefährlich Dosis för enen Minschen is 1 Milligramm Eibentoxin. En Afkaken vun wenig Nadeln kann also al en Minschen den Dood bringen. Na etwa 90 Minuten blifft dat Hart stahn.

Lustigerwies is dat rode Fruchtfleesch vun de Plant nich giftig; avers de Samen, de dor binnen stekt, doch! Also op de Kinner oppassen, dat se nich an de roden Beeren gaht!

Man ok blots de Kontakt mit dissen Boom — de överall to finnen is, wi hebbt em ok in unsen Goorn — kann den Dood bringen. Ik heff leest: Twee Leevslüüd hebbt ünner en Eibe ene Nacht slapen. An annern Morgen harrn beide enen dullen Huututslag. Se kregen hooch Fever. Twee Weken later kregen se beid enen Kreislaufkollaps un füllen in en Koma. Se sünd beid nich wedder waak worrn.

Füürbohn, Feuerbohne (Phaseolus coccineus)

Gift: Lektine
Besünners giftig: rohe Bohnen / Schoten un Samen

Düsste smucke Kladderplant stammt ut Südamerika, un bi ehr is dat de Blööt, de so schöön rood lücht; de Frücht sünd ehrder bruun-vigelett. De rohe Bohn hett etwa 1 ½ Perzent Lektine in sik, de för de Gesundheit schädlich sünd. Se föhrt dorto, dat de roden Blootkörperchen anenanner backen blievt. Dennso köönt se keen Suerstoff mehr transporteern, de Minsch mutt sik erbreken, kriggt Kopppien un em warrt swummerig. Ut den Grund gellt de Füürbohne as giftig. Ok blödige Dörfall kann en Symptom sien. Eerste Hölp: Veel drinken un fix na'n Dokter gahn!

Warrt de Bohnen aber kaakt, d.h. warrt se tominnst up 75°C hitt maakt, geiht dat Gift twei un de Füürbohnen köönt ahn Gefohr eten warrn. — Wett Se dat? Ok uns gröne Bohnen orr Stangenbohnen hebbt Lektine in sik! Nienich roh eten!

Ik heff jümmers geern Füürbohnen in mienen Goorn hatt, se hebbt so hübsche füür-rode Blöden. Un wi hebbt de jungen Schoten ok jümmers mit besten Appetit eten. De Samen — se warrt wegen ehr Utsehen ok Käferbohnen nöömt — hebbt wi nich eten, de müssen jümmers as Samen för anner Johr blieven.