Anke Nissen
Toxisch Planten


Na Folg 1, Folg 2, Folg 3, Folg 4, Folg 5, Folg 6, Folg 7, Folg 8, Folg 9, Folg 10, Folg 11, Folg 12


Geißblatt (Lonicera caprifolium)

Dat Geißblatt is een vun mien leevste Goornplanten, un twoors vunwegen sienen herrlichen Duft, den dat eerst so recht na Sünnenünnergang an'n Avend verströömt. Wo sööt maakt de Geißblattruuch so en Sommeravend! Wo schöön rankt düsse fix wassen Kletterplant an Gelänner un Wänn hooch! Wo smuck seht ehr extravagante witte, geele orr rosa Blöden ut! Liekers is dat wohr: Düsse Plant is leider giftig.

Dat Gift — Saponine, Alkaloide un cyanogene Glycoside — sitt in de ganze Plant, ok in Bläder un Blöden. To'n Eten reizt aver vör allen de blaagswatten Frücht, de sik in'n Harvst an den Struuk bildt. Wohrschuug: En grote Dosis Gifft sitt in de Samen in disse Frücht. Vagels köönt de Frücht ahn Gefohr freten, un dat tüüscht uns faken över de Giftigkeit. Vagels beet aver de Samen nich twei, de freet bloots dat Fruchtfleisch un scheedt de Samen ganz wedder ut. So wohrt se ehr Leven.

To'n Glück smeckt de Frücht aasig bitter, so warrt nüms mehr as een, twee Stück eten. Wenn een dat doch deit, drauht disse Symptome:

  • Dörfall
  • Bostpien
  • Övelkeit, Erbreken
  • Magen-Darm-Pien
  • Fever un Sweetutbröök
  • Krampanfälle
  • Pulsrasen

Dat Enn kann de Dood sien.

Rode Hecken-Kirsche (Lonicera xylosteum)

Düsse smucke un in Goorns beleevte Heckenplant is in ganz Düütschland veel un oft to finnen. Se is en Verwandte vun dat Geißblatt, se höört to de Familie vun Geißblattgewächse. Vun Mai bet Juni blöht se geel orr witt un bildt in'n Harvst smucke rode Frücht.

Dat fiese an düsse Frücht is, dat se nich so giftig-bitter smeckt as de vun't Geißblatt. Se hebbt Gift in sik, dat bet nu noch nich veel erforscht is. De Gifte höört to de Giftefamilie vun de Saponine un heet na den latienschen Naam vun de Plant: Xylostein un Xylostosidin. Saponine smeckt bitter; de Plant bruukt se, sik gegen Pilzbefall to schulen, denn Saponine sünd ok giftig gegen Plantenpilze.

De Kirschen vun de rode Heckenkirsche smeckt aver bloots licht bitter. Wenn een vun disse Kirschen eten deit, is dat heel gefährlich; vun 5 Beeren af an kriggst Vergiftungssymptome, un al 10 Stück köönt den Minschen in 't Koma fallen laten.

Symptome:

  • böös Buukweh
  • Erbrechen
  • Fieber
  • Herzrhythmusstören
  • Atemprobleme

De Plant is ok för Deerten gefährlich. Peer un Hunnen mööt, liek as Minschen, relativ veel dorvun freten, dat se doodblievt, aver Katten, Kaninken u.ä. köönt sik al na 3 bet 5 Beeren den Dood halen.


12.3.2022


na baven