Thymian

Mien Krüdergoorn

vun Anke Nissen

För mi is en Krüdergoorn mehr en Heilplantengoorn.
För de mehrsten Lüüd aver is en Krüdergoorn en Flack, wo Kökenkrüder wasst. Un dat is denn ja ok in Ordnung, denn bi 't Kaken kann en Kööksch dörch Krüder goden Smack in 't Eten bringen. Dorto soorgt Krüder bi deftig Eten, dat Maag un Darm dat wat lichter hebbt. Un Krüder laten sik goot mank Salat mengeleern.

Ik mag geern in enen Krüdergoorn rümlopen, snupper hier mal, snupper dor mal, plück mal en lütt Blatt af un riev dat mank de Finger, dat de Ruuch noch beter rutkümmt. So 'n Krüdergoorn mütt gor nich groot wesen, meist kaamt de Planten mit wenig Platz ut, man Sünn bruukt de Krüder.

Petersilie

Bohnenkruut, Oregano, Thymian un Ysop sünd Krüder, de mager — also sandig — Eerd bruukt.
Thymian hett sik bi mi as Randplant vun en Beet fein maakt, is so 'n beten över de Steenplatten vun 'n Weg röver rankt.

Thymian

Lavendel, Rosmarin un Salbei wasst ok lever up sandig Bodden, so half Sand un half Kompost is goot.
Lavendel sett mien leef Mann jümmers mank siene Rosen. Richtig goot gedeihen doot se aver nich bi em.

Rosmarin gedeiht bi mi allerbest, sogoor siene lütten blagen Blöden hett he mi al wiest. Richtig koolt Winter aver mag Rosmarin nich. Dit Johr hett mien Plant de Küll nich överstahn.

Lavendel

Ok mien Salbei — ik harr em al vele Johr — is dit Johr nich wedder togangen kamen.

Fenchel

Bibernelle, Dill, Estragon, Fenchel, Kerbel, Koriander, Weinraute möögt geern enen Bodden, de en beten wat fetter is, also hööchstens noch ¼ Andeel Sand hett.

Estragon hett vele Johr bi mi in enen Pott wussen. Nu nückert he. Ok mien Fenchel nückert. Mal aftöven, wat de beiden sik noch besinnt.

Rosmarin

In enen richtig satt fetten Bodden föhlt sik uns Petersill wohl, ok Snittlook, Snitt-Knuuflook un Wermut. De Winter, de all miene Krüder dit Johr böös tosett hett, kunn mien Petersill nix andoon. De is an 't Wassen, dat dat en reine Freud is.

Knuuflook — jüst so Bärlauch — kümmt nich in mienen Goorn. Ik mag 't nich rüken, kann 't nich utstahn.

Liebstöckel

Goot överstahn hett de Zitroon-Melisse dissen strengen Winter. Ik mütt dull uppassen, denn se breedt sik fix ut.
Ok de Liebstöckel hett de Küll nix andaan. He is nu — Mitte April — al 50 cm hooch. He kann bet 2 m groot warrn un he rüükt, as wi all ja weet, as Maggi.

Katzenminze

Mien Naversch Dorothea hett mi vertellt: Wenn een nich weet, wann siene Krüder na buten plant warrn köönt, denn sall man de Eerd mit barte Hand anfaten — wenn een dorbi schutert, denn is 't noch to fröh.

Ik heff en Fründin, de mag nix afsnieden in ehren Goorn. Miene Krüder aver warrt düchtig berupft. Ik snied geern un veel af — to 'n Bruken, to 'n Drögen, ok mal för de Vaas... Un ik heff den Indruck, miene Krüder, de möögt dat, se wasst meist noch duller na 't Afsnieden.