Deil 3:
Dei Parker Solar-Sonde schrammt an dei Sünne vörbi

van Ludgerd Lüske

Deil 1: Dei Mission
Deil 2: Dei Instrumente
Deil 4: Sünnige Utsichten för Parker
Deil 5: Sünnschien satt un vele Radels

Dei Stüer-Mannschkup kunn nu utwiesen, dat dei NASA-Sonde bi ein "Anschrammen" van dei Sünne dör eine orig naohe Baohn äöwer den Sünnenbodden an'n 24. Dezember 2024, heile bleef.

Parker Solar Probe an dei Sünnen-Corona. Bild: NASA

Dei Parker Solar Sonde van dei NASA köm äöwer ehren vörigen Rekord äöwerweg, wobi sei blots 6,1 Millionen Kilometer äöwer den Sünnenbodden flög. Dorbi raosde dei Sonde mit eine Geschwinnigkeit van 692.000 Kilometer inne Stünne dör dei Sünnen-Atmosphäre. Kien Deil, wat dei Menschen bawden, is vörher so drocke flaogen. An den laoten Aobend van den 26. Dezember füng man einen Signaol-Ton van dei Sonde up, so wüss man, dat dat Ruumschipp aals best äöwerstaohn har un gaut funktioneiert. Mit dit floote Äöwerfleigen, wat noch fäökener passeiern schall, kann dei Ruumsonde besünnere Wätenschkup-Daoten upnähmen. Dormit kann man bäter verstaohn, wat up dei Sünne afflöpp. So duune an dei Sünne langers fleigen is eine historischke Aktion för dei Menschken bi eine Mission an einen Stern.

Nicola Justine Fox. Bild: NASA

Nicola Justine Fox hätt dat Leit äöwer dei NASA-Wätenschkup. Sei schriff: "Bi dat Ünnerseuken so duune an dei Sünne käönt wi ehr Warken up use heile Sünnen-System un uck up dei Technologie, dei wi daogs up dei Ern un in den Weltruum bruukt, bäter verstaohn. Äöwer dei Funktionswiese van Sterne in dat heile Universum kriegt wi so mehr rut. So käönt wi mehr daun bi dat Seuken nao bewaohnbore Welten butsiet von usen Heimat-Planet."

Äöwersicht van dei Sünnen-Mission. NASA-Bild

Links dortau:

• Ein godes Video giff et hier.
• Die Parker Solar Probe der NASA schreibt Geschichte mit dem sonnennächsten Vorbeiflug — NASA Science
• Parker Solar Probe bi Wikipedia