 |
|
van Ludgerd Lüske Deil 1: Dei Mission Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
"Et is ein grootet Wark, wenn man ein Ruumfohrtüg so naoh an dei Sünne bringen kann", sä John Wirzburger, dei System-Ingenieur van dei PSS-Mission bi APL. "Dit is eine schwore Upgaobe, mit dei dei Weltruum-Wätenschkup siet 1958 taugange is un noch orig lange dorbibleef. So kunn man dei Technologie nao vörne bringen."
Nao dat Anbawen van dei Solarzellen an'n 31. Mai 2018 straohlde dei Mannschkup van dei PSS dei mit einen Laser an. So kunn man seihn, off dei Zellen Strom möken un an dei Sonde affgeewen. Bi dat Dörfleigen van dei Sünnen-Korona kann dei PSS ehr Mäten maoken, dat helpt dei Forschkers, dat sei bäter verstaohn käönt, worümme et dor so heit is. Uck den Sünnen-Wind (staodig giff dei Sünne Materiaol aff, dat in hellsches Tempo in't All rutflüggt) kann man so ünnerseuken un rutfinnen, wo dei energierieken Deilkes up dei halve Lecht-Geschwinnigkeit kaomt. Dei Sünnen-Korona bargt wohraftig noch vele Radels! "Dei Daoten sünd so wichtig för dei Wätenschkup-Lüe, wiel sei us eine neie Äöwersicht bringt," sä Kelly Korreck. Sei maokt dei Programm-Wätenschkup an dei NASA-Haupt-Stäe un dei Heliophysik an ein PSS-Instrument. "Dör dei Berichte ut eierste Hand äöwer dat, wat in dei Sünnen-Atmosphäre passeiert, hätt dei PSS dei Künne äöwer dei Sünne orig verbätert." Dör vörigen Äöwerflüge wüssen dei Forschkers all wat äöwer dei Sünne. At dei Sonde in dat Johr 2021 tau'n eiersten Maol in dei Sünnen-Atmosphäre rinflög, markde man, dat et in dei bütste Korona-Grenze Tacken un Senken giff. Dei PSS fünnt uck dat Herkaomen van wichtige Zickzack-Formen in den Sünnen-Wind. Dat sünd soneumte Wennepunkte an dei sichtbore Bäöwersiete van dei Sünne, dei Photosphäre. Nao dit eierste Vörbifleigen an dei Sünne schall dei Sonde länger in dei Korona wän, wor dei meisten besünnern Physik-Prozesse affloopt.
Dit Konzeptbild wiest dei Parker Sünnen-Sonde kort vör den Intritt in dei Sünnen-Korona — baoben, rechte Hand, is dei Sonde. "Wi verstaoht nu den Sünnen-Wind un den drocken Anloop
van dei Sünne weg", sä Adam Szabo, dei PSS-Forschker
an dat Goddard Weltruuum-Fleig-Zentrum van dei NASA in Greenbelt,
Maryland.
Dei PSS hätt uck Neiet in dat Binnen-Sünnen-System funnen. Man süht gewaltige Sünnen-Explosionen, soneumtet koronaolet Massen-Rutschmieten, Stoff-Upsuugen, wobi et äöwer dat Sünnen-Sytem wegsuust. Annere Daoten gäwt Künne äöwer energierieke Deilkes van dei Sünne. Bi dat Vörbifleigen an dei Venus wörden dei natürliken Radioemissionen in dei Planet-Atmosphäre un dat eierste vullstännige Bild van den orbitaolen Stoffkring dorstellt. Bit nu hätt dei Sonde blots wiest, dat sei seker is. Bold werd sei an eine Stäe kaomen, wor sei dei Daoten, dei sei bi dit leßte Vörbifleigen upnaohmen hätt, wiederleiten kann. Dei Daoten, dei denn van dei Ruumsonde daol kaomt, gäwt us neie Informationen äöwer eine Stäe, an dei noch kien Menschk was. Intressante Links: Parker
Solar Probe: Team
Dei Parker Sünnen-Sonde was dei eierste NASA-Mission, dei man nao einen läben Forschker neumde. Dei NASA wull Eugene Parker ehren, un hätt dei Mission Sünnen-Sonde-Plus in Parker Sünnen-Sonde ümme neumt. Dei Physiker, E. Parker, hätt at eierster den Sünnen-Wind vörutsäggt. Parker was bi den Start van dei Ruumsonde dorbi. Wat in dei eiersten Johre bi disse Mission rutköm, kunn hei uck noch beläwen. An'n 15. März 2022 störw hei; 94 Johre was hei old. Den Sünnenwind gellt ok dei Forschung van SOHO. SOHO (SOlar and Heliospheric Observatory) is ein Weltruum-Observatorium, dat dei Sünne van ehren deipen Karn ut ünnersöch. Dat gaiht äöwer ehre Atmosphäre (Korona) un den Ruum van den Sünnenwind bit tau einen Affstand van teihn Maol äöwer den Erdümloop weg. Mit SOHO will man dei Binnen-Upbau van dei Sünne, ehre Atmosphäre un dat Herkaomen van den Sünnen-Wind rutfinnen. Noch mehr Infos giff et hier. Wenn niege Saoken funnen warrt, leest Sei dat hier!
|
|||
|
SO-Platt: Ludgerd Lüske 21.2.2025 |
