Deil 4:
Sünnige Utsichten för Parker

van Ludgerd Lüske

Deil 1: Dei Mission
Deil 2: Dei Instrumente
Deil 3: An dei Sünne vörbischrammt!
Deil 5: Sünnschien satt un vele Radels

Dei Parker Sünnen-Sonde (PSS) van dei NASA hätt an'n 24. Dezember 2024 ehren woll duunsten Flug äöwer den Sünnenbodden äöwerstaohn. Dei Ruumsonde brök ehren vörigen Rekord. Dorbi flög sei blots 6,2 Millionen Kilometer äöwer dei Sünne weg un raosde mit wohrhaft 692.000 Kilometer in'ne Stünn' dör dei Sünnen-Atmosphäre. So drocke was vörher noch kien Deil, dat dei Menschk mök.

Ein Video giff et hier: Parker Sünnen Sonde.

Dei Parker Sünnen-Sonde staiht hier noch in dei Warkstäe,
baoben ligg dei Hitte-Schild. Bild-Daoten: NASA

Dei PSS hätt sick in dei leßten sess Johre för dissen Ogenblick präpareiert. Dei 2018 losflaogen Sonde bruukde säben Vörbiflüge an dei Venus tau'n Stüern up dei Sünne tau mit dei Hülpe van dei Gravitation. Mit dat leßte Vörbifleigen an dei Venus an'n 6. November 2024 köm dei Sonde up ehre vörseihn Ümloop-Baohn. Disse ovaole Baohn bring dei Ruumsonde aale drei Maonde up einen passen Affstand tau dei Sünne. Dat is naohe naug tau'n Ünnerseuken van dei wunnerlicken Prozesse in use Sünne. Et is aower nich tau naoh, dat dei Hitte un dei starke Straohlung van dei Sünne den robusten Apparaot schaoden kunn. Dat Ruumfohrtüg werd van nu an bi disse Hauptmission up dissen Ümloop blieben.

Parker Solar Probe an dei Sünnen-Corona. Bild: NASA

"Dei PSS hollt eine orig extreme Stäe in den Weltruum ut un äöverdait aals, wat sei schall", sä Nour Rawafi, sei hätt dat Leit äöwer dat PSS-Projekt. "Mit disse Mission kummp man tau eine golden Tied in dei Weltruumforschkung un sei bring us dütlick mehr Künne äöwer dei unbekannten Afflöpe in dei Sünne."

So duune bi dei Sünne bruukt dei Sonde einen Käöhlenstoff-Schuum-Schild. Dorachter kann sei dei weuste Hitte in dei baöwerste Sünnen-Atmosphäre, dei Korona, uthollen. Dor kann dat heiter at 17 Millionen Graod Celsius wän. Den Schild lä man so ut, dat et 1427°C heit wern draff, dorbi kann sogor Staohl schmelten. Dei Instrumente dorachter behollt eine kommaudige Ruumtemperatur. In dei heite Korona mit minne Dichte räket man dormit, dat dei Sonden-Schild 982°C heit werd.

Sünne mit Korona in dat Röntgenspektrum. Bild-Daoten: Wikipedia

Dit Bild wiest dei Sünne in't Röntgenspektrum. Dat lechte Krüllen-Wark is ein Millionen Graod heitet Plasma, dat binnen van dei Sünnen-Magnetfelder in dei Sünne ligg. Up ein Bild in dat sichtbore Lecht kunn man Sünnen-Placken an den Faut bi väle Magnetbänder seihn. Dei Hoff (Halo) ut Gas, dei sick wiet äöwer dei Sünne nao buuten reckt, heit Korona. Dei düstern Placken an'n Sünnen-Nord- un Südpol sünd Korona-Löcker, wor dei Magnetfelder nao den Weltruum hen aopen sünd. Hier käönt dei Deilkes in den Weltruum fleigen.

Dei Sonden-Affstand van 6,2 Millionen Kilometer lett vellicht wunnerlick, aower mit den kosmischken Maotstock seihn, is dat wohrhaft minne. Dö man dat Sünnen-System in einen Fautballplatz passen, was dei PSS blots 4 Meter van dei Kante weg!

Dat is duune naug för ein Fleigen dör dei dünne Sünnen-Atmosphäre, dei man uck at Korona kennt.

Dei PSS in'n Sünnen-Ümloop. Bild-Daoten: NASA (ännert)

Hier noch en gaudet Link: Die Parker Solar Probe der NASA schreibt Geschichte mit dem sonnennächsten Vorbeiflug — NASA Science

Bild: Ludgerd Lüske