vun Meike Balzer-Fraun

Kumfermatschoon weer ja dunnemals faken dat Enn vun de Kinnertiet.
Dorna güng dat för Deerns meist ‚in Stellung‘, se bleven in’t Huus oder oppen Hoff. Nich jeedeen Deern dörv en Lehr maken oder eerst recht nich wiederhen na School gahn.

Na’n Kumfermannenünnerricht harrn de veer Deerns namiddaags twee Johr lang na ehr Scholen hen müsst.
Man nu güng dat na Kark. Een Sünndag Pröven un Palmsünndag Kumfermatschoon.
All de langen Karkenleder, de Teihn Geboten, dat Vadderunser, dat Glovensbekenntnis un "vele Versen" harrn se ja al jümmers düchtig butenkopps lehrt, un för den langen Weg na Kark kregen se ok woll en Rad utlehnt.

En poor Jungs kunnen ehr Versen nich opseggen. Man ofschoonst de Pasters jümmers  dormit drauht hefft, se denn nich to kumfermeren, hett de in Brundörp dat doch doon. „Wat schull he woll ok anners doon hebben?“ — De Paster in Schwanewede aver hett sien Woort hollen...

De Hööftfraag weer de Kledaasch. Twee Kleder müssen dor her, un nix nich geev dat to köpen in de Johren na de Krieg. Bloots de Maiglöckchen wussen noch ümsüss.

Dat Kleed för de Pröven schull laterhen dat ‚gode‘ Kleed sien. De Farv weer egaal. Tilly besinnt sik op en smucket rodet Kleed. Gesine keem an en Kleed ut swatte Spitz. Dat warrt optrennt, ümdreiht un vun en Neihersche för Gesine ehr spiddelige Figur wedder passlich maakt. Mit de grote swatte Sleuf in’t Hoor sehg se denn richtig smuck ut!

Nipp un nau besinnt sik Hilde:
Dat blaue Kleed för de Pröven hett ehr Mama ut en olet Kleed neiht. De Mantel woor ut en düüsterroot infarvt ‚Amidecke‘ sniedert, Schoh un Strümp utlehnt vun en Tant, dat Kleed vun en Naversche ut de ehr ‚Care-Paket‘. Dat witte Kleed weer dörchsichtig, un dorüm geev dat noch en Ünnerkleed ut en Linnenhemd vun ehr Mama. Se much dat amerikaansche Kleed to un to geern lieden, dörv dat aver nich beholen.

Geschenken hefft de Deerns ok kregen: Meist Taschendöker, deelwies mit Spitz ümhäkelt, Handdöker, Garnituren (Hemd un Ünnerbüx), Ünnerkleder un Nachthemmen.
Gröttere Gaven weren en Parlenkeed mit Armband, Ohrringen, Stoff för en Kleed un 400 Rieksmark. Dor kunn een en Pund Botter oder en Pund Strickgoorn för köpen. Hilde hett sik Wull för en Strickjack köfft.

To Huus worr allens oprüümt un putzt, wieldat de Verwandtschop un de Navers to Kaffe un Koken un Avendbroot kemen.

Dat grote Putzen weer övrigens ok nödig, wenn een doot bleev. Aver dat weer ja en anner Thema!