vun Meike Balzer-Fraun

Hilde is 1934 in Ve'sack in't Hartmannstift op de Welt kamen un in Brundorp opwussen.

Ehr Öllern weren ok al in Brundorp na School gahn. Ehr Papa harr en behöllern Kopp, un Lehrer Rögenbeck wull em geern na Ve'sack op't Gymnasium schicken. Man en Familje mit negen Kinner kunn för dat School- un Penschoonsgeld nich opkamen.

Op dat grote Weeswark vun den Wullkoopmann Lahusen in Löhnhorst funn he Arbeit als Holtarbeiter. De Familje leev in Brundorp op'n Hahl. Een Huus, twee Familjen, een Köök. Hilde ehr Mama hett as Sniedersche arbeidt.

Gevel vun't Schoolhus

To Huus hefft se Platt snackt. Lehrer Rögenbeck weer jümmers noch in'n Deenst, un he vermahn de Dörpslüüd, mit ehr Kinner man blots Platt to snacken. Hoochdüütsch wull he se beter inne School bipuhlen. Wat en wiesen Mann!

Hilde, ehr dree Bröder un twee Süstern hefft meist buten speelt. Plattbarft oder in Holschen, geern ok inne Potten na en Sommergewidder in den warmen Regen.
Wenn dat to dull hergung, lang ehr Mama ok al mal na de lütte Swutsch baven op dat Schapp. Dat hett piert!

In'n Harvst mussen se in en Buersfro ehren Appelhoff Appeln plücken, opsammeln un oppen Appelkeller slepen. Blots keeneen nich eten! De Buersche wull se ja all oppen Markt in Ve'sack verköpen.

Wo stolt weer Hilde, as se sik in de slechte Tiet witte Kneestrümp knütten kunn. För dat Strickgoorn hefft se Fadens ut Zuckersäck trocken un verknüppt.

Mit sössteihn hett Hilde in Ve'sack en Lehr as Sniedersche anfungen. Vun Klock 8 bet Klock 6. Sünnavends bit Middag un denn oprümen. Bi Wind un Wedder mit't Rad över Koppsteenstraten un Feldweeg, twee mal jeedeen Dag so üm un bi 10 km. In'n Düüstern bi Snee un Ies dörch't Holt weer dat richtig swoor.
In Ve'sack geev dat ja domals noch Buernhöff.

Un wenn de Meestersche dat in'n Kopp kreeg, muss de Lehrdeern ok mal ammerwies Kohschiet för de ehren Grööntüüchgoorn anslepen.
Schietenfründlich weer de Fru mit de besünnern Kundschen: Kapteinsfruen un vör allens de Fru vun Dr. Hengst vun't Gymnasium: "Guten Tag, Frau Dr. Hengst. Schön, dass Sie uns wieder beehren." "Frau von Hefen, mein Mann ist der Dokter, aber ich nicht!"

Hilde ehr Mama weer faken krank. So harr Hilde na ehr Lehr veel Arbeit to Huus, un se hett för de Lüüd in't Dörp sniedert.
Dor hett se ok ehren Mann funnen. De weer mit sien Familje as Flüchtling na Brundorp kamen, wo he later mit sien Moder un Süster en Huus mit Inleggerwahnung boot hett. Ehr Mann weer Smitt op de groten Schippswarften an de Werser.

Se hefft 1958 heiraadt. Hilde hett ehr Leevdag to Huus as Sniedersche arbeidt. Lange Johren weer se för den Handarbeitsünnerricht an de School tostännig. Mit sien Platt ut Oostpreußen un dat Brundörper Platt sünd se fein torecht kamen. De twee Deerns sünd aver mit Hoochdüütsch groot worrn.

Hilde ehr Mann is 2015 inslapen.

Mit Rad un Auto kann se nu nich mehr fohren. Man in ehren leevten Goorn mit all de schönen Blomen is se noch faken togang.

Hildes Goorn

Inköpen deit se mit ehr Dochter, un mit en beten Hölp kann se sik goot alleen versorgen. Se dröppt ehr Kinner, de Enkel un de lüttje Oorenkelin.

"Ik do blots noch, wat ik kann un will. Ik mutt nix mehr doon!"