vun Meike Balzer-Fraun

Gesine is 1937 in't Hartmannstift in Ve'sack op de Welt kamen un in Swamöbel (Schwanewede) in en lütt Kaat opwussen. Ehr Papa weer ‚Landweert', keen ‚Buer', as se betoont, un dat weer — un is jümmers noch — en gewaltigen Ünnerscheed!

Mit ehr lütt Landweertschop weren se Sülvstversorgers. Se harrn 4 Köh, 2 Swien, 'n beten Land, vör allens veel Arbeit un wenig Geld. Broot vun'n Bäcker weer to düer, dat warrt sülms backt. Denn muss Gesine gebüddelt Mehl vun de Möhl halen.

Ehr dree Bröder dörven en Lehr maken. För Gesine un ehr Süster hett sik dat "nich verlohnt". Se schullen ja heiraden, un to Huus geev dat na de School noog to doon.
Putzen, melken, fodern, kaken, waschen, Mist smieten un Heu maken.
Hoochdüütsch hett Gesine inne School in Swamöbel lehrt. Mit ehr Familje un Frünnen harr se vördem blots Platt snackt.

Wenn Gesine mit ehr Fründin mal mit'n Bus na Bremen föhr, denn hefft de Deerns Hoochdüütsch klöönt. Schull ja nüms nich marken, dat se vun't Dörp kemen. Hüüt simmeleert se doröver un grient, wo sik dat woll anhöört hett.

Dree Johr lang weer Gesine ‚in Stellung' in en Möbelgeschäft in Blomendal. "Dor bün ik en freien Minsch worrn!" Vun de Huusfru, en Gymnastiklehrerin, hett se lehrt, op ehr Figur to achten (Pampelmuse as tweetet Fröhstück), dat Lief un Tüüch to plegen, se hett se mitnahmen na Gymnastikstünnen, Rullschoh- un Strietschohlopen, sogor Oorloff an de Oostsee hefft se maakt. Koken backen, de feine Köök, Arbeit in'n Goorn un in de Waschköök, Kinner oppassen. Gesine kunn allens un hett allens geern maakt.

Ehr schönsten Johren, ünner Tranen muss se Afscheed nahmen — op de Kameree bi't Sorteren vun Wull geev dat mehr to verdenen.

1959 hett Gesine heiraadt un is to ehren Mann na Brundorp trocken. En Grootfami-lie, Öllern, Grootöllern, Swägersche un dat junge Poor delen sik een Köök, een Wahnstuuv, een Baadstuuv. Dat Huus harr ehr Mann sien Opa al 1870 op en Placken Heid boot, wat he vun sien Deenstherrn köfft harr. He weer Holtarbeider bi den Herrn von der Borg un harr so sien egen lütt Landweertschop as twete Arbeit un Sülvstversorger. Nu geev dat in't Huus aver al modernste Technik: en elektrisch Warmwaterboiler in de Baadstuuv, un wegen en "Hauswasserversorgung" keem dat Water ok inne Köök al "ut de Wand" un nich mehr ut de Pump! För de grote Wäsch geev dat en elektrischen Halbautomaten. "Mien Swiegervadder weer för dat Moderne!"

De Mannslüüd weren Timmerlüüd. Gesine hett, ok as ehr Dochter all dor weer, op de Kameree arbeidt, bet all de Dubbelverdeners arbeitslos worrn.
Ehr ‚Hobby' un Toverdeenst weer de Swienstucht. Anfungen hett dat mit söss Farkens. Later harr se 25 Swien in ehren Loopstall mit Utloop. "De harrn dat richtig goot bi mi!"

Gesine un ehr Mann hefft mitenanner Platt, mit ehr Deern un den Jung aver Hoochdüütsch snackt.
2020 is Gesine ehr Mann inslapen.

Rad un Auto fohren kann se nich mehr. Man se is mit ehr Familje, Navern un Frünnen ünnerwegens, maakt Gymnastik, löppt veel un arbeidt in ehren Goorn.
Se wahnt mit Söhn un Swiegerdochter, Enkel un sien Fründin noch in dat ole Huus mit den groten Goorn. Man hüüt gifft dat dor dree Huusdören, dree Köken, dree Wahnstuven un dree Baadstuven!

"Mien Leven weer goot. Ik harr keen Geldsorgen. Ik bün fit! De sworen Tieden vergitt een ja to'n Glück. Ik bün tofreden!"