Präsident op Afroop

Ut den weltbest schütt’ten Leader
woor nu bloots en lütten Schieder:
De Bodyguards warrt ok al minder,
un Trump schickt se nu ok mal Inder.
Jüst noch weer he en coolen Mann,
nu een, de bloots noch mulen kann.
‘keen hett dor vun Verbreken spraken?!
Herr Trump hett keen Verspreken braken,
schoonst he sien Land in Stücken ritt.
Gifft veel, de em den Rücken stütt!
Man nu kann he bloots wöden, blarrn
un swöörn, dat all de blöden warrn,
de gegen düssen Schieder weern.
– Dat schall uns nu nich wieder scheern!
Dat Best, wat ik em raten kann:
Laat mal dien Afkaten ran!

Moinmoin, leve plattdüütsche Maten un Frünnen!

Nu brennt al de eerste Adventskerz op de Startsiet vun Plattpartu, un de schöne un trööstliche Wiehnachtstied findt veel, wo se uns för entschädigen un begööschen kann. In'n Nevelmaand hett uns leve Matin Jutta Lammèr, Verfatersch vun de Oogenblick mol-Kolumne, de grote Reis antreden. Al siet een Johr harr se sik ja ut de Schrieverie trüchtrocken, nu hett ok dat Hart ophaalt. Avers vun ehr Texten is en fien Book in Vörbereiden, mit niege Oginaal-Illustraschoonen. Neegst Johr schall dat rutkamen. Ik segg Bescheed.

Wieldess Corona in de neegste Runn geiht, bröch uns de Nevelmaand mit de Stille Tied ok den Volkstruurdag mit Erinnern an Kriegsdeenst un dat, wat Kriege doot. Dat dat beter warrt, schrifft Claus Günther an de Sellschap vun morgen en Breef. Op't Künst-Flack sleit sik en beklommen Stimmung dal, vun de Maandennotizen över de bizarre Körbskunst bet na de störmsche Novemberküst. De Ewigkeitssünndag schient in düt Corona-Johr meist mehr wehtodoon as sünst; en ganze Reeg vun uns Maten hett dorto Versen tosamendragen, de uns' Sinn liesen wedder in't Helle wennen doot. In de Adventsreeg vun Ludgerd Lüske findt wi düt Johr köhle Farven un en Welt, de de hillige Familie ruug de Döör wiest. Man wi weet, dat dochen de Wiehnacht kümmt, un so endt de Nevelmaand doch mit Höpen.

In de Natuur blöht nich mehr veel, in Pagels' Goorn noch de Anemonen, en poor Kävers un uns Wintervagels sünd noch togang; man in'n Weltruum geiht dat Slag op Slag: De Privatiseern vun de Ruumfohrt is en groten Schritt wiederkamen, un dat Radel över de Tempratuur vun de Sünn warrt uns noch Johren beschäftigen. -- Un de grote Welt? Ja, de US-Wahlen sünd en grote Verföhren to Häme, kannst meist nich wedderstahn. Man de mehrsten vun uns Maten kiekt in düssen Maand trüch un togliek ok vörut in't Leven, erinnert besünner Minschen besünner Typen orr de lustigen Folgen vun Kriegsnoot. Un för Kinner gifft dat verleden Maand nich bloots en stimmungsvull Märken, sünnern ok en niege Folg mit schöne Kinnerbeden.

Leev Frünnen, 2020 weer en Härtetest, un uns Gemeenschap, uns Sellschap hett em man knapp bestahn. Spannung un Anspannung sünd wussen. Nu hööpt wi all op en freedvullen Advent un en versöhnlich nieg Johr! Wenn wi uns wedder leest, is dat al 2021. Muchen Se en segente Wiehnacht hebben un denn fein sund un getroost in dat niege Johr gahn!


Nu de Linkliste. Op de Links bruukt Se bloots klicken, dat Se henkaamt.

 

Plattdüütsch Künst:

Wo sünd all de Blomen hin? Leed to'n Volkstruurdag, överdragen vun Marlou Lessing    (15.11.)
Körbskunst. Mit Fotos vun Günter Schiller un Verse vun Marlou Lessing    (8.11.)
Notizen ut'n Oostermaand. Fotos un Verse vun Marlou Lessing    (2.11.)


De Welt un Gott:

Dei eierste Advent. Vun Ludgerd Lüske    (29.11.)
Seemannsgarn: De Uniformkist -- orr: woans ik Vulltimmermann worrn bün. Vun Günther Sohnemann    (28.11.)
Koken as Modder. Vun Heinz Tiekötter    (28.11.)
Gedichten to'n Ewigkeitssünndag vun Ute Biemüller, Ludwig Schmülling, Heinz Tiekötter un Rudi Witzke    (22.11.)
Wat nu? Gedanken vun Katja Renfert    (22.11.)
Rüm Hart, kloor Kimming! Vun Richard Weigand    (18.11.)
Ole Bööm. Erinnern vun Silke Frakstein    (11.11.)
Wat is dat fien, Suldaat to sien! Erinnern vun KLaus-Dieter Tüxen    (11.11.)
Beden för Kinner, Folg 3, tosamendragen vun Gertrud Everding, Rudi Witzke un Ewald Eden    (7.11.)
Willem Sönndach. Vun Ewald Eden    (5.11.)


Natuur un Wetenschap:

Planten in Pagels' Goorn: Plant för November: Anemone. Vun Thomas Seemann un Marlou Lessing    (28.11.)
Crew Dragon mit Crew bi dei ISS ankaomen! Vun Ludgerd Lüske    (18.11.)
Dei ESA-Sünnenkieker: Sien Röntgenteleskop. Vun Ludgerd Lüske    (3.11.)

In't aktuelle Natuurnotizbook:

        Marienkäverdag, as ik em mag! Vun Thomas Seemann    (18.11.)
        De Bookfink as Goorner. Vun Thomas Seemann    (8.11.)


Wat in de Welt vörgeiht:

Breef an de Sellschap vun morgen. Vun Claus Günther    (15.11.)
Corona geiht in de twete Runn. Vun Katja Renfert    (2.11.)

...un 6 niege Indrääg in Marlou Lessings plattdüütsch Notizbook.


För Kinner:

Modder Sünn ehr Kinner: De Harras ut't Försterhuus. Märken vun Sophie Reinheimer, överdragen vun Klaus-Dieter Tüxen    (22.11.)



Hartlich grööt

Marlou Lessing un dat lütte Plattpartu-Team