ChalcedonChalcedon

Vörstellt vun Anke Nissen


Natuur:

 

Chalcedon

Chemisch is Chalcedon Kieselsäure, also SiO2.

Ut Kieselsäure bestahn vele bekannte Schmucksteen, nämlich all Quarze.

  • Kristalliseert Utbillen vun'n Quarz: Bergkristall, Amethyst, Citrin, Rauchquarz
  • Fienkörnig Utbillen vun'n Quarz: Chalcedon, Jaspis, Heliotrop, Karneol, Achat (Onyx)
  • Grovkörnig Utbillen vun'n Quarz: Tigeroog, Rosenquarz
  • amorphe Kieselsäure: Opale

Kiek ok bi'n Achat, dor heff ik dor al över schreven.

Härte:
6,5 - 7 (Diamant hett de Härte 10.)
Farv:
De Chalcedon is en fienkörnig Utbillen vun'n Quarz, hett enen Glanz as Wachs. Meist is disse Steen milchig gries, faken aver ok wunnerschöön himmelblaag. Un disse licht blaag Farv, de gefallt mi würklich goot.
Vörkamen:
Funnen warrt de Steen in Brasilien, Südwestafrika, Madagaskar, Uruguay, Sibirien, USA.

Geschichte

ChalcedonSienen Namen hett de Chalcedon na de dormals griechisch Stadt Chalkedon (Kalchedon) kregen. De liggt an'n Ingang vun'n Bosporus, gegenöver vun de oll Stadt Byzanz (=Istanbul). Wohrschienlich weer disse Stadt mal en Handelsplatz för den Chalcedon. Dat gifft ok Lüüd, de meent de Naam stammt vun dat nordafrikaansch Karthago (griechisch = Karchedon).

De Chalcedon weer al in heel fröhe Tieden bekannt. He wörr geern bruukt.
ChalcedonUt de Pharaonen-Tiet sünd Skarabäen ut Chalcedon bekannt; meist weern se dörchbohrt un dor weern Hieroglyphen ingraveert. De ollen Ägypter kunnen wohl al recht goot Steen schliepen, snieden un graveern. Se nömen den Chalcedon den "Steen vun't Weder". Se glöven, dat de Chalcedon helpen kunn gegen Besweer dörch dat Weder, also bi "Wetterfühligkeit", as de Hoochdüütsche seggt..

Chalcedon is geern nahmen worrn as Material för Gemmen un allerhand Pötte, Vasen un anner Gefäße.

"Der fürnehmste Gebrauch dieses Steins
ist zu den Pettschaften und Siegeln;
denn er siegelt gar schön
und ziehet kein Wachs in sich.
"
(Johannes Kunkel)

In de Bibel höört wi vun den Chalcedon in de Offenbaren vun Johannes 21, Versen 18-20, över dat Himmlisch Jerusalem:

18. Un de Muur weer buut ut Jaspis...
19. Un de Grundsteen vun de Muur sünd mit allerhand Edelsteen smückt.
De eerste Grundsteen is en Jaspis, Chalcedon
de anner en Saphir,
de drüdde en Chalkedon,
de veerte en Smaragd,
20. de föffte en Sardonix,
de sößte en Sardion,
de sövente en Chrysolith,
de achte en Beryll,
de negente en Topas,
de teihnte en Chrysopas,
de elfte en Hyazinth,
de twölvte en Amethist.

Wirken un Legenden

Vele vun de edlen Steen hett man in ganz fröhe Tieden — un ok noch in't Middelöller — övernatüürlich Kräft toschreven. De Steen gellen as Schutzsteen gegen Gefohr. Se sullen Krankheit afwehren orrer heilen. Se sullen de Lüüd, de so enen Steen bi sik harrn, mit besünner Fähigkeiten utstatten. — Utföhlicher heff ik hiervun schreven bi den Axinit.

ChalcedonSo gell de Chalcedon as Talisman gegen dat "Nich-tofreden-Sien" un ok as Steen gegen Toständ, in den de Minsch sik swak föhlt.

Hildegard vun Bingen seggt, dat uns' Chalcedon den Minschen friedfardig maakt.

Albertus Magnus weer de Meen, dat de Chalcedon Schwermut un Melancholie verdrieven kann.

Ut dat Krüderbook vun Adamus Lonicerus:

"Siene Kraft ist wider die böse Gespenst
Traurigkeit und Forcht
und macht den Menschen sieghafft.
"

De Lüüd hebbt glöövt, wenn se den Chalzedon anhaucht orrer sik up de Tung leggt, denn kunnen se goot un veel snacken. Mit en Steen op de Tung beter snacken könen as ahn em — da mutt de Steen ja würklich Töverkräfft hebben!

Chalcedon op de HandHett en Minsch dissen Steen in de Hand, wenn he en Reed höllt — orrer ok bi Versammeln orrer Besnacken — denn sall de Steen helpen, dat keen Mißverstahn upkümmt un ok, dat beter un frier snackt warrt.

De Chalcedon symboliseert Gelassenheit. Disse Eigenschaft kann he — so seggt miene kloken Böker (vun de mien leef Mann meent, dat weern Hexenböker) — up den Minschen utstrahlen. Dörch sien hellblaag Faarv kann de Steen Ruh för Seel un för unsen Geist bringen. He schenkt uns Gelassenheit, minnert uns Reizbarkeit un unsen Jähzorn, un he maakt dat Gemüt ruhig.

Wenn man enen Chalcedon bi sik driggt — as Bispill as Keed, as Armband orrer ok as Schmeichelsteen —, sall dat bannig goot helpen gegen Hemmungen bi't Snacken:

  • dat Snacken, dat Reden vun den Minschen warrt beter fleten,
  • dat Heisersien (wiel de Minsch unseker is) warrt minner,
  • dat Räuspern warrt minner
  • un ok dat Stottern un Lispeln.

Chalcedon-KeedChalcedon gellt ok hüüt noch as Steen gegen Stress, he kann Ruh un Gelassensien in Tieden vun Stress bringen.

Chalcedon gellt wieder ok as de Steen, de helpen kann gegen Schwanken vun de Stimmung,
he is dorüm goot för Lüüd, de licht reizbar sünd, as to'n Bispill in de Pubertät, orrer in dat Klimakterium. Dorüm kann de Chalcedon ok goot gegen dat Utbreken vun Sweet wirken, wenn dat dörch Hemmungen, Nervosität orrer Lampenfever kümmt.

Chalcedon gellt as Steen gegen Jähzorn, he kann erhitzt Gemüter ruhig warrn laten.

Mi höört twee Chalcedone to, beide heff ik sülms köfft, un ik harr blots enen eenzig Grund dorför: Mi gefallt de blaag Farv so goot. Een dorvun is milchig-blaag, de lett sik goot in de Hand hollen, as mien leef Mann dat up dat Photo wiest.

Richtig geern heff ik miene Chalcedon-Ohrclips, man blots, een vun de Clips is dal fullen, un ik heff dor rup peddt — un nu heff ik blots noch enen.Chalcedon

Uns lütt Swiegerdochter heff ik mal en Keed ut Chalcedon-Perlen schenkt. De jung Fru is hellblond un hett blaag Ogen, dor passt disse Steen richtig goot. Un wenn ik dorto denn noch all dat gode Wirken un de feinen Eigenschaften vun dissen Steen bedenk — denn heff ik uns lütt Swiegerdochter doch ein bannig kostbor Geschenk maakt, dücht mi.



na baven