Bläder un Blöden vun de SommerlinnDat Kruut för'n Aarnmaand:
Lindenblöden

vun Anke Nissen

Tilia platyphyllos (grandifolia) = Sommerlinde, se hett grote Bläder
Tilia cordata (parvifolia) = Winterlinde, se hett lüttere Bläder un blöht so twee Weken later as de Sommerlinde
Familie Tiliaceae = Lindengewächse

 

Lindenblöden

 

Anner Namen:

 "Am Brunnen vor dem Tore, da steht"... jüst düsse Boom!Sommerlinde: Frühlinde, großblättrige Linde, Sommerlinn, Linn, Linnenboom
Winterlinde: August-, Berg-, Hart-, Spät-, Stein-, Waldlinde, kleinblättrige Linde
Sammelt warrt:
 Blöden (Flores Tiliae): in'n Juni de Blöden vun de Sommerlinn, in'n Juli de Blöden vun de Winterlinn.
De Wirkstoffe (Flavonoide un ätherische Öle) vun de Blöden sünd veer Daag na't Upblöhen an'n besten.

Warrt bruukt:

 Lindenblöden sorgt för Sweet.
Gegen Verköhlung, Katarrh, Grippe
So warrt't anwennt: 1 Eetlöpel Linden-Blöden-Tee mit ¼ l kaken Water övergeten, 10 Minuten trecken laten.
Ok good in Teemischungen.
As Heilplant warrt bloots de Blöden vun Sommer- un Winterlinn bruukt. De Blöden vun anner Linden-Oorten smeckt un rüükt nich goot. Bläder un Blöden vun de Winterlinn (lüttere Bläder as de Sommerlinn)

Ik drink geern, wenn mi kolt is, enen Beker Lindenblödentee.
De warmt mi, un de smeckt — binah — na gor nix.

Linden wörrn geern as Schutzboom plant, vör'n Hoff orrer in't Dörp.

De Asch vun Lindenholt wörr fröher up't Feld streut. Se schull dat Ungeziefer afhollen.

"Am Brunnen vor dem Tore, da steht"... jüst düsse Boom!Wenn en Buur de Meen weer, sien Veeh weer verhext, denn hett he de Deerten mit Telgen vun'n Lindenboom haut. Denn jaulen de Hexen un lepen weg.

Krüderfruun, de Püüstern kunnen, hebbt geern en Krankheit (Gicht orrer Pest) an enen Lindenboom anplockt.

En Mann dörv nie gegen enen Lindenboom sien Water laten, anners kriggt he en Gassenkoorn in't Oog.

En Ring ut Lindenholt sall na de Meen vun Hildegard von Bingen vör vele slimme Krankheiten schützen. Un denn schrifft se noch:

"Die Linde hat große Wärme, und jene Wärme ist ganz in der Wurzel und sie steigt in die Zweige und in die Blätter auf . . . . Un wer Gicht hat, der nehme von der Erde, welche um die Wurzel der Linde liegt, und bringe sie ins Feuer und mache sie glühend. Und im Dampfbad gieße man Wasser darüber und bade so. Er tus es über neun Tage, und er wird geheilt werden."

Deit de Hals weh, denn kann en Tee ut half Kamillenblöden un half Lindenblöden helpen.
Goot is, wenn dor en beten Honnig inröögt warrt.
Mehrmals an'n Dag en Tass lauwarm Tee in lütte Slucke drinken!

Wo Oma uns to'n Sweten bröcht hett

Bläder un Blöden vun de SommerlinnBi de allerersten Teken, dat sik en Verkühlen wiest, hett Oma uns mit Lindenblöden behannelt. Se meen, dordörch wörrn uns egen Heilungs-Kräft aktiviert.
Toeerst müssen wi 2 Beker Lindenblödentee drinken, — so hitt as't geiht.
Denn wörrn wi för 20 Minuten in de Baadwann steken.
Füngen wi an to sweten, hett se uns in dat vörwarmt Bett leggt, wo wi so lang as mööglich sweten müssen.
Dorna hett se uns afrubbelt, un wi kemen in en dröög Bett.


na baven