HildegardHildegard von Bingen un ehr Musik

vun Rudi Witzke


Vadder Gott? Wokeen is dat? ——
Wokeen dat bit hüüt hen mit Vadder Gott's Hülp nich trecht kregen hett, tofreden mit sien Leven to sien, de sett faken up annere Wies allens up een Koort. He versöcht dat mit'n Dreih up annere Weeg, to Macht, Anseihn un Geld, to sien "Glück" to kamen.

Uns Welt is vull vun Töverie, "Okkultisten" un Lüüd, de sik sülfst Kureerer nömen. För veel Geld kannst diene "Aura" kennen liernen, up diene "Akkupressur-Meridiane" rümmerfummeln, mit Rüüköl di beneveln un "Mandalas" utmalen. De "Tarot"-Koorten beraden di.

spelen

 

spelen

Up disse Weeg vun "Selbstfindung" truun se nich Vadder Gott, sünnern sik sülfst. Un wenn di so een Minsch in'e Mööt kümmt, wohr di weg: He weit allens beder. He hett keen Rooh nich, di totohören. Wat annere denken, glöven un maken, is minnhaftigen Kraam. He hett sik un sien "Midd" funnen, wo för annere keen Platz nich is. To groot hett he sik upplustert. Een, de up disse Tuur ünnerwegens is, hett avers bloots een Krink ahn Midd funnen. He glöövt, dat he den Born mit Levens-Wader funnen hett. Dorbi is dat een Pütt, de utdröögt. He glöövt, dat he sik in den Loop vun de Natuur inslaten hett un in de Höcht dragen ward. Wenn de Storms avers över ehm kaamt, föllt hei koppheister in en deipes, swattes Lock.

Tarot
Foto: Rudi Witzke

Minschen, de glöven, de Gesetten vun't Tosamenspeel vun Eer, Maand, Sünn un Stierns to kennen un för sik to nütten, de plattbarft dörch nattes Gras lopen un meenen, nu weern se an den sund makenden Saftstrom vun leviges Leven anslaten, de hett de Düvel de Ogen tokleistert, de Ohren tostoppt, Grappen in'n Kopp sett.

Wokeen so inbildsch is, dat hei de uurolen Radels knackt hett, de maakt sien Seel höhnerblind. Licht griepen Hochmoot, Hatt, Raffsucht, Maatlosigkeit na ehm. Un wokeen sien Maat nich kennt un över de ehm todeilte Scheid geiht, de drifft in'n Afgrund. De dammelt in't Verdarven.

Hildegard
Hildegard vun Bingen seggt to disse Minschen:
"Ji mütten ümkehren un to Vadder Gott lopen."

Nu segg mi aver maal:
Wokeen is Hildegard vun Bingen?

Se is een vun de bedüdenst Fruuns in't düütsche Middelöller. Se levte vun 1098 bit 1179. Hüüt is se binah överall, wo Christenlüüd tohoop kaamt, bekannt.
To ehr Levtieden tröök se de Lüüd an, liek as hüdigendags, Lüüd, de na Sinn un Heil söken. Se wüßt aver ok in de Welt, woans dat lang geiht. So söchten veele Lüüd ehren Raat in weltlich Fragen. Nich blots Karkenlüüd!
Vision vun Hildegard

Hildegards Doon un Sülvsterständnis is vör allen dörchweevt vun dat, wat se propheetsch höört un seihn hett.
Se hett allens daalschreven un en' Mönk beschreven, wat se seihn hett. De hett na ehr Anwiesen de visonärschen Biller maalt.

(Wenn Se de Biller hier anklickt, köönt Se ehr vergröttert sehn.)

Vision vun Hildegard
Se wull ehr Lüüd waakrüddeln un gegen dat Gottvergeten antreden laten. Se hett dorbi vun bedüden Saken snackt un schreven: Dat religiöös Düden vun dat Universum! Vun graadut christlich Leven!
Vision vun Hildegard
Allens, Himmel un Eerd, Gloov un Naturkunn, allens, wat de Minsch is, is för se en Speigel vun Vadder Gott sien Leev, is Geschenk un Upgaav togliek.
Dree groote theoloogsch Warken hett se uns schenkt. Dat eerste heit "Sci Vias", wat heit "Wisse den Weg!" De ewig Geschicht vun Gott un de Minschen ward an Biller, de se beschrifft, verklart. Se schrifft in en mitrieten Spraak. Se is aver nich blots Theologin un Dichterin. Se is ok Komponistin. "Ordo Virtutum — Spiel der Kräfte" heit ehr Singspeel, in dat se in 33 Dialoge dat Goode mit dat Böse strieden lött.
Schöön antohören is ok ehr Musik "Symphoniae".

Veele Minschen is se mehr bekannt as Natuurheilersch un een, de wat vun gesunnes Eten versteiht. Vun beides hett se ok schreven, aver so blots nevenbi. Se hett beraden, woans en Goorn anleggt ward, woans Kranke pleegt warden mütt, wat för Krüder goot doon. Un noch veel mehr. Wokeen aver disse Saken to de Hauptsaak maakt, de Hildgard vun Bingen uns to seggen hett, de is bannig up'n Holtweg. Wenn wi de wohre Hildegard vun Bingen ehr begegen willn, schulln wi mit ehr Musik anfangen. — So denk ik mi, ik wies maal up hen, dat Hildegards Musik ok op CD to köpen is.

Vision vun Hildegard
Vision vun Hildegard
Wi weern maal wedder ünnerwegens in de Hochbargen vun'n Sinai mit en Grupp vun de Evangeelsch Akademie in Hamborg. Nachtens slöpen wi ünner frien Himmel. Bevör wi aver in de Slaapsäck kröpen, keemen wi to en Meditatschoon tosamen. Elkeen vun uns weer beden, so wat för de Grupp to maken.
Ik harr en Batterie-Recorder un Hildegards Musik bi mi. Ik heff beten vun ehr vertellt. Un denn hebbt wi ünner de Stierns ehr Musik höört. — Musingstill weer dat.
Nahsten hebbt mi de Wannermaten vertellt, dat se deep anröögt worrn sünd un sik neeg to Gott föhlt hebbt. Na Johren seggt de een orrer anner jümmer noch: "Erinnern Se noch de Nacht mit de Musik vun Hildegard vun Bingen?"

Ik legg Se de Musik an't Hart. Villicht begifft sik dat ja maal, dat Se in uns Welt vun Unrooh, Ängsten un Noot, Töverie un Snackerie so een Stunn beleven köönt un Hildegards schöön Töön hören.

Dat wünsch ik vun Harten.


Rudi Witzke

15.2.2004


na baven