Dat Kruut för'n Maimaand:

Königskerze

vun Anke Nissen

Verbascum thapsiforme un phlomoides (phlomos = Wull)
Familie Scrophulariaceae = Rachenblütler orrer Braunwurzgewächse

 

Anner Namen:

 

Großblumige Königskerze, Bärenkräutchen, Brennkraut, Fackelblume, Fackelkraut, Frauenkunkel, Frauenkerze, Frauakerza (Schwaben), Gewitterkerze, Himmelbrand, Himmelsbrand, Himmelkerze, Jonhannislicht, Kerzenkraut, Königskerzenblumen, Luntenkrüütken, Marienkerze, Neumannskraft, St. Johanniskerze, St. Johanniskraut, Schafschwanz, Unholdenkerze, Unholdenkraut, Wallblume, Welk, Wetterkerze, Wilden Tabak, Wüllen, Wollblume, Wollblumen, Wolle, Wollkraut Wollstange, Wurmkraut, Wüllich, Zöllich

Plattdüütsch Namen: Brennkruut, Fackelbloom, Fackelkruut, Königskerz, Wullbloom, Wullkruut

Bestanddelen: Sliem, Saponine, Zucker, Spuren vun ätherisch Öl, Farvstoff
Sammelt warrt:

Blöden (Flores Verbasci) vun Juli bet August bi sonnig Weder.
Königskerzenblöden warrt in de hütig Tiet meist anbuut, kuum noch in de frie Natur plückt.

Warrt bruukt:

lööst Hoosten un Sliem, beruhigt de Nerven

So warrt't anwendt:

 

mehrstendeels blots in Teemischungen, as Bispill:

  • 30 g Huflattich,
  • 30 g Hagebutten,
  • 20 g Königskerze,
  • dorvun 1-2 Teelöpel mit hitt Water övergeten,
  • 10 Minuten trecken laten.

Königskerze alleen:

  • 1 Teelöpel dröögt Blöden mit 1/5 l kaken Water övergeten,
  • uttrecken laten,
  • goot mit Kandis söten,
  • langsam drinken.

KönigskerzRosspappeln un Königskerzen
sammel för un för;
denn blifft de Winters-Schrecken
buten vör de Döör

In't eerst Johr wasst bi de Plant blots en groot, locker up den Boden liggen Blattrosett. In't tweet Johr drifft se enen kerzengraden Stengel, de oft mannshoch is un de in den ünnern Deel mit Bläder besett is. Bläder un Stengel un Kelche sünd dicht övertrocken vun en wollig, filzig Hoor. Dorher de Namen Wullbloom, Wullkruut... De Königskerz is en staatsche upfallen Plant, de vun'n Juli bet September blöht.
De Blödenstand — he süht ut, as weer he ene Ähre — besteiht ut enkelte 3,5 bet 5 cm grote, lüchen güllen-geel Blöden, de vun Juli bet September blöht.
De Blöden rüükt angenehm, erinnert an Honnig. Se smeckt na Sliem un Mandeln.

Königskerz

Dat Besünnere an de Königskerz is, dat se villicht de empfindlichst Blöden in uns heimisch Flora hett. Al dat lüttst Antippen — as to'n Bispill dörch en anflegen Insekt — maakt, dat sik de Blöden lööst un dalfallt.
De Königskerz hört to de Pollenblomen, dat bedüüdt, se hett kenen Nektar, se lockt de Insekten dörch vele Pollen an.

Neven de "Grootblomig Königskerz" — Verbascum thapsiforme — sünd ok de Blöden un Bläder vun twee anner Orten heilkräftig:

  • Windblomen-Königskerz, Verbascum phlomoides
  • Lüttblöden Königskerz, Verbascum Thapsus

Bi de Windblomen-Königskerz is de filzig Behaarung an Bläder un Stengel so'n beten geel.
Bi de Lüttblöden Königskerz sünd de Blöden man blots half so groot un se sünd hellgeel.
Bi all dree Orten sünd aver de Bläder up beide Sieden wollig-filzig. Bi alle annern Orten sünd meist blots de ünnern Sieden vun de Bläder filzig.

Königskerz vun de Aart "phlomoides"De Königskerz hett en lang Tradition as Heilplant.
Se hett enen heel besünnern, staatschen un dormit upfallen Wuchs. De Minschen fröher hebbt dat natürlich ok sehen un sik Gedanken maakt. So wörr in't Mittelmeergebiet — dor gifft dat över 40 Orten — de Königskerz al fröh as Heilplant bruukt. Hippokrates schrifft vun Verbascum as Mittel to'n Behanneln vun Wunden.

Ok uns Vöröllern hier kennen de Plant. Se hebbt bi Sonnenwend-Fiern de Stengel mit Bienenwachs besmeert un as Fackel bruukt.
Se weern dormals de Meen, dat de Königskerz den Blitz antrecken kann. De Namen Wetterkerz un Gewitterkerz wiest dor up hen.

In't Middelöller hebbt de Lüüd glöövt, de Königskerz kann Ratten un Müüs ut Schüün un Stall wegdrieven. Se weern vun de Meen, de hen- un herhuschen Deerten weern böös Geistervolk un de Königskerz kunn de wegdrieven.

Königskerz vun de Aart "thapsiforme"In't Allgäu warrt hüüt noch seggt: Wenn ene Königskerz up en Graff wasst, denn hett de Dode noch keen Ruh funnen.

Ok in de Weihbuschen — ik heff al oft dorvun vertellt — höört de Königskerz för vele Minschen mit rin.

De Königskerz hett Saponine in sik, un de sünd giftig för Fisch — so warrt seggt. Aristoteles schrifft, dat de Samen vun de Königskerz in't Water streut warrt. Dorvun sünd denn de Fisch so benusselt, dat se ganz licht fungen warrn köönt.

Hildegard von Bingen nöömt uns Königskerz "wullena". Se meent, disse Plant is en goot Heilmittel för en "trurig Hart".

De Stengel hett een fröher in Harz orrer in Pech dükert, so wörr dat en lang brennen Fackel — dorher de Namen Fackelbloom, Fackelkruut.

De Blöden vun de Königskerz (Flores verbasci) lööst den Sliem. Se warrt mehrstendeels tohoop mit anner Krüder bruukt, as Bispill mit Eibischwörtel, Söötholtwörtel, Veilchenwörtel, Anis...

Königskerzenöl gegen Smarten in de Ohren:

  • En Handvull Königskerzenblöden
  • mit 100 g Olivenöl in en Glasbuddel füllen.
  • De Flasch an enen goot Sünnen-Platz buten henstellen.Königskerz vun de Aart "thapsiforme"
  • Oft schütteln.
  • Na 3 bet 4 Weken afseihen
  • un as Ohrendrüppen bruken.

Tee-Mischen gegen beginnen Hoosten:

Liek veel:

  • Königskerzenblöden
  • Spitzwegerichbläder
  • Eibischwörteln
  • Malvenbläder un Malvenblöden

  • 1 Teelöpel vun disse Tee-Mischen mit 1 Tass kolt Water övergeten
  • en beten hitt maken,
  • 5 Minuten trecken laten,
  • afseihen.
  • Mit Honnig söten.

Tee-Mischen gegen Reiz-Hoosten

  • 20 g Königskerzen-Blöden
  • 20 g Söötholtwörtel
  • 10 g Anis-Früchte
  • 50 g Eibischwörtel

  • ½ Teelöpel vun disse Tee-Mischen mit enen Mörser twei drücken,
  • mit 1 Tass hitt Water övergeten,
  • todeckt 10 Minuten trecken laten,
  • afseihen.

Königskerzentee gegen Reiz-Hoosten, ok för Kinner to bruken

  • 1 Eetlöpel lüttsneden Königskerzen-Blöden
  • mit 1 Tass kaken Water övergeten,
  • 15 Minuten trecken laten,
  • goot mit Honnig sööt maken.

 

Tee-Mischen gegen Keuch-Hoosten, för öllere Kinner

KönigskerzDisse Tee hemmt de Entzünden, lindert den Hoostenreiz, lööst Sliem un Krampf

  • 5 g Königskerzen-Blöden
  • 10 g Slötelbloom-Wörtel
  • 15 g Anis-Früchte
  • 40 g Thymian-Kruut

  • 1 Teelöpel vun disse Tee-Mischen mit enen Mörser twei drücken,
  • mit 1 Tass kaken Water övergeten,
  • todeckt 10 Minuten trecken laten,
  • afseihen,
  • licht mit Honnig sööt maken.

Königskerz
Ut Martinas Krüderbook
Plattdüütsch: Ludgerd Lüske

So as dit Krüütken driff de Bloom'
up lange Stengels moje rundüm,
so teiert de Heergott de hogen Herrn
un bringt de to grote Ehrn!
(Ut den lütten Paradiesgoorn)

As Wullbloom un as Königskerz,
J'hannslicht un Himmelbrand,
as Bären-, Brenn- un Luntenkrüütken
bün ik bi Minschen lang bekannt.

Bruken deit man miene Bläder,
sliemig-bitter smecken de.
Sööt un sliemig sünd mien Blöden;
un kloke Lüüd, de söökt na mi.

Dörch Tee ut Blatt un Blöden
deit de Hoosten minner weh
un wirkt bi Bostversliemen
bald as de Linnenblödentee.

Dörch Mischen ok mit anner Orten
warr ik en goden Hoostentee.
Geev bi Katarrh de heilen Warmte
un help bi Lungentimpenweh.

So bün ik nich blots moj' un lüchen
un teier heerlik Hang un Rien;
so kann ik juuch an't Heilen bringen
un en Gesundheitshelper sien.

Düsse Äöversetten in originaol Südollenborger Platt: hier

Königskerz

Königskerze
Original Martinas Kräuterbuch

So wie dies Kräutlein zeugt die Blum
auf langen Stengeln schön ringsum,
so zieret Gott die hohen Herrn
und bringet sie zu großen Ehrn!
(Aus dem Paradiesgärtlein)

"Als Wollblume und Königskerze,
Johannislicht und Himmelsbrand,
als Bären-, Brenn- und Fackelkräutchen
bin ich dem Menschen längst bekannt.

Verwendet werden meine Blätter.
Sie schmecken schleimig-bitterlich.
Man liebt die Blüten, süßlich-schleimig;
und jeder Kluge sammelt mich.

Der Tee aus Blättern und den Blüten
wirkt lindernd auf den Husten ein
und hat sehr viel bei Brustverschleimung
mit Lindenblütentee gemein.

Man mischt mich auch mit andern Arten,
besonders gern zum Hustentee.
Gib bei Katarrhen heilend Wärme
und stille Lungenspitzenweh.

So bin ich nicht nur schön und prangend
und schmücke herrlich Hang und Rain.
So kann ich Euch auch Heilung bringen
Und Euch Gesundheitshelfer sein."


29.4.2008


na baven