tosamendragen vun Marlou Lessing un Billa Frerich

Folg 1
Folg 2
Folg 3
Folg 4
Folg 5

Wenn ik bang bün

Leve Gott, büst du bi mi?
Kann mi wirklich nix passeern?
Mennigmaal do förcht ik mi.
Bün ja bloots en lütte Deern,

un de Welt is bannig groot.
Weetst du, Gott, wat allns passeert?
Op de Eer gifft't Krieg un Noot.
Schuul, leev Gott, doch Minsch un Deert!

Maak op diene Eer doch Freden!
Giff uns Godes, noog för jeden!
Laat den Krieg nie wedderkamen!
Dat kannst du, ik weet dat! Amen.

Oostern

An dat schöne Oosterfest,
dat du uns hüüt geven hest,
laat all Kinner fröhlich ween!
Leve Gott, dat weer so schöön.

Leve Gott, de Eer is bunt.
Hunnert Blomen an'n Grund,
hunnert Vagels in de Bööm,
hunnert Fisch in Diek un Strööm,
un ok hunnert Minschen sünd
nienich gliek, doch gode Frünn'!
Du büst för uns alle dor.
Gott, dien schöne Welt bewohr!
Holl uns fast an diene Hann,
dat jedeen glücklich leven kann!

Amen.

Mi geiht dat good.
Leve Vadder in'n Himmel,
sorg doch daför, dat dat all Minschen op de Eer goodgeiht!
Dat schall keen Krieg un Gewalt mehr geven.
Holl dien Hand över mien Frünnen,
mien Familie un mi.
Nix Leges schall uns anrögen.
Dat dank ik di.
Amen.

An'n Morgen

Leve Gott, de Dag is nieg,
un ik föhl, du büst bi mi.
Diene Sünn steiht hell an'n Heven,
un vun ehr kümmt allens Leven.
As ehr Strahlen schall dien Segen
op de hele Eer sik legen!

Segen in den Diek de Fisch,
Lamm un Schaap dor op de Wisch,
segen Hamster, Hund un Katt
un den Halligstork in't Watt,
de Vagels in'n Knick,
den Worm un de Snick,
de Zeeg un lütt Zick,
ok de Metten in dat Gras
un förwiss den Oosterhaas!
Holl dien leve Segenshand
över all in Stadt un Land,
all de Deerten groot un lütt,
un de Minschen segen mit!
Segen alle, de ik mag!
Fröhlich gah ik in den Dag,
denn ik weet, du büst ümbi.
Leve Gott, so dank ik di.

Amen.