vun Behrend Böckmann

Wat harr dei Minsch för'n gaudet Läben,
mösst hei an'n Staat kein Stüern gäben,
doch all in't olle Tweistromland
wier Deinst as Stüer gaut bekannt,
Kuurn un Veih würn ok giern nåhmen
un so is man tau Riekdaun kåmen,
un dei Minschheit hüt nu weit,
dat dat in einen Codex steiht,
dat Babylon sik musert sihr,
as Hammurabi* König wier.

Nå den Nil sienen Wåderstand
däd Ramses** in't Ägyptenland
von sien Buern åhn grot Bangen
'n Nilschlammstüer afverlangen,
denn schwemmt dei Nil väl Schlamm up't Feld,
wier't mit dei Aust sihr gaut bestellt,
denn mössten Buern väl afgäben,
un sorgenfrie künn Ramses läben.

In Rom harr man den Bågen rut:
jedein Börger tåhlt Tribut,
denn jeder, dei sik Slawen höll,
in Rom as frieer Börger göll.
Un dei Kaisers hemm' allens dån,
dat ehr Riek denn künn entståhn
von'n Rhin bät an den Bosporus,
ierst in Kathargo måkten's Schluss.
Jupiter däd in'n Häben tronen
un wåkte œwer Legionen
von Augustus, Nero un Trajan.
Nå Nero leet Vespasian***,
åhn wat Leget sik tau denken,
Piss as Stüer sik denn schenken —
as Rom œwer dei Latrinenstüer lacht,
hett hei blot "pecunia non olet" dacht.

In't Middelöller mösst 'n tåhlen
för Dickdaun un för düchtig Pråhlen
för Kleider ut denn fiensten Stoff,
üm so tau läben as an'n Hoff.
Wecker wull as Grotmul läben,
dei mösst up Prunk ok Tinsen**** gäben,
wull hei von sülwern Töllern äten
dörst hei dei Stüer nich vergäten.
Wecker sik wull sichtbor schmücken
mit güllen Ringen un Perücken,
wecker sik 'n "Mohren" höll,
dei as Luxusslav göll,
dei mösst dorför väl Stüern gäben,
dormit dei Herrscher künn gaut läben.

Gägen Napoleon hett hei wunnen
un ok dei Soltstüer erfunnen,
dei Prussen-König ***** wier sik klor,
dat Solt för'n Minsch is wunnerbor,
nich blot dei Zääch süll von't Solt lecken,
soltig süll dat Äten schmecken,
denn in'n Soltlak höll sik frisch
Gräuntüch, Fleisch un männig Fisch.
Denn wädert Willem II.****** ganz dull
up den Inglänner John Bull
un deit sik bannig dormit brüsten,
dat hei deit gägen Ingland rüsten,
un so fünn't Kaiser Willem fien
tau bestüern den Schumwien,
dormit Geld inne Kassen kümmt,
dat man taun Bu von Kriegsschäp nimmt.
Disse Stüer hett so gefollen,
dat sei sik bet hüt hett hollen!

Ok männig Minsch sik hüt verfihrt,
wenn hei wat œwer Stüern hürt:
Mihrwiert- orrer Ümsatzstüer —
ein gägen Storm, ein gägen Füer —
wecker ein Hus sien eigen nennt
ok dei Grundstüer denn kennt,
verstüert warden all Innåhmen —
sülfst wecker up 'n Hund is kåmen,
is von 'n Stüer nich utnåhmen,
blot Katt un Tweirad kannst di hollen
dei ut't Stüerrecht rutfollen,
doch Motorwågen sünd hengägen
mit gaude Stüern tau belägen.
Wecker utwarts mål loschiert
'n Bettenstüer denn verfihrt,
dei mål in'n Hotel inkihrt,
un wecker mit sien Loophuus******* pråhlt
ok fien Vergnäugungsstüer tåhlt.
Dormit dei Preisters kœnen läben
is Karkenstüer aftaugäben —
dormit dei Bund tau Geller kümmt,
för gräunen Strom hei Stüern nimmt.

Börger hemm' oft grote Pien
mit dei Stüer up Benzin,
ok dei up Tabak un den Kœm
finnt dei Börger nich so schön,
ok wenn dei, dei Fluppen pafft,
Stüern för dei Rente schafft...

Stüern hier un Stüern dor,
ümmer mihr von Johr tau Johr.
Dei Staat, hei räkent mit Innåhmen,
dei bald vonne Zuckerstüer kåmen
un ok Verpackungen ut Plast
warden bald taun Stüerlast!
Mit Stüern von den lütten Mann
dei Staat Kanonen bugen kann
un as Infall bannig quält,
dat 'n Rüstungsstüer fählt!

So ein Rüstungsstüer sull
funktschoniern, as ik dat wull:
För jeden Cent in Rüstungsräken
warrn drei Cent in't Soziale stäken,
drei Cent in Wahnungsbu un Lihr,
ok in Naturschuul drei Cent mihr...
Ja, düsse Stüer blecht dei Staat!
Dat säkert unsen Bunds-Etat
vör hemmungslosen Rüstungswahn,
un bald warrt't alle bäter gahn.
Denn warrn sei tweimål överleggen,
mihr Geld in Rüstung rintaustecken,
denn allens annre warrt denn düer.
— So geiht mien Vörslach för dei Stüer.

* Hammurabi — babylonischer König (19. Jahrhundert v. Chr. - 1750 v. Chr.)
** Ramses II. — altägyptischer Pharao (1303 v.J.C. - 1213v.J.C.)
*** Vespasian (9-79 n.J.C.) war als römischer Kaiser von 69 - 79 n. J. C. Nachfolger von Nero und führte die Latrinensteuer (37-68 n. J.C.) ein
**** Der mittelalterliche "Zins der Eitelkeit" ist zu vergleichen mit einer heutigen Luxussteuer
***** Preußenkönig Wilhelm I. (1797-1888) war von 1861 bis zu seinem Tod König von Preußen und ab 1871 der erste Deutsche Kaiser
******Kaiser Wilhelm II. (1859 - 1941) war von von 1888 bis 1918 letzter
Deutscher Kaiser un König von Preußen
******* Loophuus — plattdeutsches Wort für Puff, Freudenhaus