Wahlen in'n Winter

vun Behrend Böckmann

Dei Boss von't irisch Fleiger-Ünnernähmen Ryanair secht, so is dat tau läsen, "In'n Momang is dei Markt komplett kaputt un inne Regierung hemm' wi Idjoten, dei einfach taukieken, woans dei düütsche Wirtschaft ümmer mihr taun Ståhn kümmt orrer gor barchaf geiht."

Ok dei bavarisch Baas Markus Söder höllt nich achtern Barch un gifft von sik: "Dei Ampel is dei leechste Bundsregierung, dei Düütschland in all sien Johren harr. Dei Bundsregierung möt sik för düütsche Int'ressen insetten un nich versäuken, dei Welt up Schritt un Tritt gräun uttaurichten." So urdeilt einer ut'e Wirtschaft un ein anner ut'e Poletik œwer dei "Taukunftskoalitschon", dei nu Geschicht is. "Ampel" wier dat Wunnerwurt: rod-gräun-gäl will tausåmen ünner den niegen Kanzler Olaf Scholz dorför sorgen, dat dat nich so wiedergåhn sall, as dat 16 Johr schwatt-rod güng. Man lüert dei gräune Tiedenwenn mit "Dekarbonisierung" un dat Ut för dei Atomkraftwarken in, un denn kriegen sik Russland un dei Ukrain inne Plünnen. Mit 5000 Stahlhelms as Hülp füng allens an — un belöppt sik bet up'n hütigen Dach up mihr as 37 Milljarden Euros. Un in'n Bundsdach un inne Koalitschon höllt 'n nich achtern Barch, man bläfft sik gägensiedig an, schüfft sik gägensiedig wat inne Schauh, is sik oft uneins, un dei Börger glöwt, dat bi dei dor Båben dei Verstand uthåkt. Männigein Poletiker hett all Fusseln an'n Mund, wenn't üm Mietpreisbremse, Mindestlohn, Kindergeld, Bürgergeld, Schuldenbremse, Strompreisbremse, Demokratiefördergesetzes, Krankenhausreform, Cannabisgesetz, Lieferkettengesetz, Selbstbestimmungsgesetz... geiht.

"Bremse! Bremse! Woneeem is hier denn dei Bremse???"

Koalitschonär Lindner vonne FDP drifft dat so wiet, dat Scholz dei Krågen platzt un hei schmitt Lindner rut. Hei hett sik anne Schullenbrems fastbäten un harr Ansichten tau't Wirtschaften, dei nich afspråken wiern un so ward em dat Vertrugen upkünnigt. Un hüüt is "Ampel-Aus" dat Wuurt von't Johr 2024. Offiziell.

Lindner harr dat ja all 2017 versöcht, 'n Regierungsposten in'n Jamaika-Koalitschon aftaukriegen, œwer denn dat Verhanneln mit den Henwies "Dat is bäder, nich tau regiern, as falsch tau regiern!" upgäben. 2021 hett dat denn mit dei Ampel klappt, Lindner ward Finanzminister. Dei Koalitschon is nu an'n Enn'. Lindner ward schasst un sien Ministerkollegen nähmen bet up einen ok den Haut, inne Wählergunst lannt dei FDP sogor ünner fief Purzent. Nu kümmt noch rut, dat inne Achterstuf von Lindner all 'n Popier för't Utstiegen ut'e Koalitschon beschräben wür, dat den Dach hofiert, an den so as an'n 6. Juni 1944, den "D-Day", dei Westalliierten inne Normandie an Land keemen, üm Westeuropa vonne Hitlerherrschaft tau befrieen. Ja, dei FDP befriet uns — von liekso ein grotes Œvel! Helden!!! Bloß keine falsche Bescheidenheit! — Kein Bang, för Bescheidenheit is dei FDP ja sowiso nich anfällig.

Ok Dichter Habeck hett as gräuner Wirtschaftsminister un Vizekanzler mit sien gräune Poletik un dei gräune Veddernwirtschaft dei Börger gägen sik upbröcht un dei Wirtschaft kaputtspält. Sogor Parteivörstänn vonne gräune Partei un dei gräune Jugend schmieten hen, Robert versöcht tau beschwichtigen un röppt Wählers tau: "Mell di — Kåm tau mi — Allens is för Düütschland mœglich — wi sorgen för Gerechtigkeit un bringen tausåmen, wat tausåmen gehürt: Klima un Wirtschaft, Demokratie un Frieheit, Fräden un Säkerheit." Nå denn man tau! Dei Upgåf is ja al nich licht, œwer in dei Taukumst mœt dei Minschen noch annere Kombinatschonen tausåmenbringen: Frieheit mit Säkerheit (Datenschuul oder allens överwachen?), Klima mit Fräden (woans bögen wi Kriege üm Ressourcen, Land un Warer vör?), Demokratie un Wirtschaft (is dat noch Demokratie, wenn dei Lobbys sik ehr Gesetten bestellen kœnen?). Dei Gräunen stelln sik dei disse Herutföddern up ehr typische naive, tutige Wies. Dei annern, stelln dei sik œverhaupt?

"Wi harrn giern dei Gesetten von dei Schwoorkraft — afschafft!"

Dei Kanzler will dei Vertrugensfråch stellen, denn sall't Niewåhlen gäben un dei niege Bundsdach Düütschland wedder in Fohrt bringen. All in 'n Bundsdach hemm' nu Bang üm ehrn Sessel un wat dormit an Diäten verbunnen is. Wåhlkampf üm Wählerstimmen is ansecht. Man eentlich geiht dat nich üm dei Wählerstimmen, dat geiht üm dei eigen Huut.

Bi dei Sozialdemokraten rumort dat düchtig inne eigen Reigen, süll nich leiwers Kriegsminister Pistorius wägen sien gaudet Anseihn ünner't Volk dei bädere Kanzlerkannedat sien? Ne, Scholz sien "Besonnenheit" is dat, wat 'n Kanzler nödig hett. Besonnenheit is Olaf sien Superkraft! Un so fieert dei SPD ehrn Kannedaten un schwört up Olaf Scholz up'n "Wahlsiegkonferenz" (is al Karneval?) un verkünnt: "Wi kämpfen för di un Düütschland" un dei Genossen sünd sik einig, dat 'n Fiete Merz, dei — as dei Parteilinke Ralf Stegner genüsslich betont — noch nie nich Baas von 'n Kreisverwaltung wier, nich denn Kanzlerstauhl œwerlåten süll. Orrer kiekt Stegner blot afgünstig up Merz sienen Privatfleiger un sien bummelig 12 Milljonen Euros Kapital? Œwer hei is dorför, dat dei olle Kanzler ok dei niege Kanzler ward, denn dat is doch dei SPD, dei sik för mihr Minnestlohn, Kinnergeld, Düütschlandticket, Klimaschutz, 'n starke Bundswehr un 'n gaude Frömdenpoletik stark måkt.

Wecker, as Merz, ein orrer twei Privatfleiger hett, brukt doch kein Ryanair!

Anners as Stegner süht Siegmar Gabriel dat Parteiengerangel. As SPD-Maat wier hei upstägen un tauletzt von 2013-2018 Vize von Angela Merkel. Un hei möt vör't BSW bannig Schiss hemm', denn süss wür hei Sahra Wagenknecht nich 'n "Nationalbolschewistin" schellen, mit dei man up keinen Fall 'n Koalitschon ingåhn süll.

Un Merz vonne Schwatten? Hei sülben räkent sik tau dei Midd un schellt up den rechten un linken Rand. "Wedder nå vörn" ward as Devis för dei Niewåhlen utgäben. Dorbi sall wiederhen dei "Brandmuer" nå rechts un links gellen, œwer ok mit dat BSW hett hei nix an'n Haut, höllt dei Infäll von BSW-Baas Sahra Wagenknecht för 'n "Sozialismus in Chanel, för'n Mischung ut Sozialismus un Nationalismus". Dei Politikwessel, den dei Schwatten verkünnen, süht ok vör, dat Frugens so as dei Mannslüd bi dei Bundswehr deinen sallen. Upps! Dor warrt dei Gliekstellung tau'n Bumerang.

Kein Wunner, dei Börger fäuhlen sik vonne Parteien anmeiert — un üm dorgägen tau hollen, verkünnen Gräune, Linke un FDP, dat nu massenhaft niege Maaten üm Upnåhm bäden. Dat hett sei villicht sülwen œverrascht.

Dei Linken, dei ünner fief Purzent lannen künnen, griepen inne Trickkist un willen mit dei "Sülwerlocken" Gregor Gysi, Bodo Ramelow un Dietmar Bartsch œwer Direktmandate in'n Bundsdach intrecken un sik denn ünner dei Devis "Wi hier ünnen gägen dei dor båben" dorför insetten, dat dat mihr Gerechtigkeit un Vernunft gäben ward, dat dei Superrieken bäten mihr von ehr Geld afgäben sallen, as dat tau Tiet dei Fall is.

Locken?! Süht ein hier Locken? Gysi hett sik woll mal sülwen buukpinselt!

Dat niegrünnt BSW, dat ierstmålig in Sassen, Thüringen un Bramborg in Landsparlemente keem, verlangt, dat dat endlich 'n Expertenregierung gäben möt un dat dei Regierung sik dorför insetten sall, dat dat dörch diplomatisch Verhanneln taun Fräden inne Ukrain kümmt.

Ach ja, Fräden mit Säkerheit is ok ein vigeliensche Kombinatschon!

Dei sik Alternative näumen, liggen up Platz twei inne Wählergunst, hemm' œwer wägen dei lästige "Brandmuer" tau Tiet kein Utsichten, dat's an't Ruder kåmen. Œwer för den Fall — un man weit ja nie — kœnen wi uns warm antrecken. Passt tau dei Wahlen in'n Winter!