Dei fleigend Robert

vun Behrend Böckmann

Inne Struwwelpeitergeschicht von den fleigenden Robert kricht dei Läser orrer Tauhürer mit, dat dei lichtsinnig Robert bi Storm mit 'n Schirm nå buten geiht, dei Storm em un den Schirm fåten deit, un af geiht dei Reis in'n Wulkenhäben, keinein hürt em nu bölken un keinein weit, wo hei afblifft. Robert geiht dei Bodden ünner dei Fäut verlustig, ok wenn hei ümmer noch denkt, dat dat buten hålich sien möt.

So mach dat unsen Dichter un Philosophen as Wirtschaftsminister un Vizekanzler gåhn, dei all Ratschlääch för sien gräune Klimawenn ut'n Wind schlågen hett, dei sik äbenso as dei fleigend Robert nich von'n Stormwind up'n Wech in'n Häben afhollen leet.

Hier is Robert vör sienen Höhenfloog bi typisch norddüütsch Wäder tau seihn.
As'n süht, hett dei Energiewenn för allens dat Rechte paråt:
Ein Solarpanel wöör em hier nich väl nützen!

So'n Aggewars! Mit dei Windenergie schulln dei Gräunen sik ja doch eigentlich besünners gaut utkennen! Un nu dat! Wecker hett sik verkalkuliert? Hett Robert villicht tau väl Wind ünner dei Flüchten krägen? Oewerschätt hei sik?

Wat Robert Habeck in Sleswig-Holstein as Landwirtschaftsminister henkrägen hett, dat sall in'n Bund mit "Yes, we can vonne Wåterkant" wull noch bäder hentaukriegen sien? Stimmt! Dei Energiewenn hett twor tauierst rumpelt, œwer sei löppt nu, un dei Gräunen hemm up dit Rebett dörchut Erfolge taustann krägen, dei internatschonål bewunnert warrn. Dat klappt, un Robert dörf nu (nå Tucholsky) up dat Klosett gåhn, dat vördem blot för Minister vörseihn wier.

Anne Macht kåmen, hett hei ut dat Wirtschaftministerium sien Hauptquartier för den ökologischen un klimapolitschen Ümbu von Düütschland måkt un sik mit väle ganz düstergräune Mitarbeiter inbunkert — Frünn, dei em ok dorvon afhollen hemm', wiederhen mit Atomstrom Licht tau måken. Doch unsen Robert geiht dat leger as Hans in'n Glück. Dat geiht mit Gräun barchaf. Dat Heizungsgesetz hett dei Gräunen dorhen bröcht hett, wo's hüt ankåmen sünd, dat's in Sassen mit bäten Glück noch in'n Landdach bläben un in Bramborg un Thüringen ut't Landdach verschwunnen sünd. Hentau kümmt ja noch, dat ünner Habeck as Wirtschaftsminister dei düütsche Wirtschaft dat schwoor hett un hei näbenbi grotmulig den ukrain'schen Fründ Wolodymyr Selenskiy Taurusraketen tauspälen wür, wenn nich Olaf dei Kanzler, ok 'n Fründ von Wolodymyr, ümmer noch den Bremser spälen däd.

Lift off! Ok Robert versöcht hier tau bremsen — tau låt!
Man eins mutt'n anerkennen: Dei (rode!) Schirm is von utermaten gaude Qualität!!!

Denn wier't so wiet: Man spält tau drüdd "Minsch arger di nich" un schmitt furtsens den Gälen rut — dei hett ja lang nauch dorüm bedelt un kunn't kuum gläuwen, dat sei sik ümmer noch von em up dei Näs rümdanzen leten... Rod-Gräun hœgt sik, Niewåhlen warden nödig. In gaut hunnert Dåch sall't passieren. Kannedaten möten her, Koalitschonen all andacht warden... Süh dor, Habeck un sien Pulk bi dei Gräunen in't gräune Ministerium un mit Panzertoni inne gräune Bundsdachsfrakschon seggen sik: Wat in Sleswig-Holstein mit Günther un in NRW mit Wüst löppt, dat künn doch ok in'n Bund mit Merz lopen, denn Merz will äbenso as Habeck Taurusraketen in ukrain'sche Hänn gäben — un dat is ja al mål ein Gemeinsamkeit, wenn't ok sünst nich miehr väl gifft. (Ut dei Ampelkoalitschon harrrn sei ja al mal liehrn kunnt, dat dat nich flutschen warrt mit bloß ein Gemeinsamkeit. Hemm sei œwer åpensichtlich nich liehrt.)

Annalena Baerbock hett keinen Bock, noch eins för'n Kanzlerposten tau kannediern, Robert sall dat måken, un sei röppt in'n Saal: "Lieber Robert, ich will genau das: Dich als Kanzler!" Dei Gräunen kœnen näben Robert wull keinen annern mihr in't Rennen schicken, un so hett 'n all T-Shirts mit'n Updruck "Habeck for Kanzler" un äbenso in so'n Oort Taylor-Swift-Manier Kanzler-Armbändchen verdeilt. Anfüert von Annalena Baerbock, höllt dei Pulk em för den "Kannedaten för dei Minschen in Düütschland" ("Kanzlerkannedåt" muchen sei nich offiziell seggen, dat schaneert sei denn woll doch) un spendeert natüürlich œwer 90% Parteidagsstimmen, denn bi ünner teihn Purzent Wählergunst brukt Robert dat as Trost un tau'n Mautmåken.

Sei hemm sik all so leiw!

Wat kümmt dor in Wiesbaden för gräune Freud up! Hier finnt dei 50. Delegierten-
konferenz (so näumen dei Gräunen ehr Parteidach) statt. Räden œwer Räden. Habeck hett sien œwer't Knei bråken Heizungsgesetz vergäten un fråcht sik sülben as 'n Dichter, ob hei dei Richtige is, un antert: "Ik will mi nich drücken, ik bün dei Richtige, dei mihr Geld för'n Klimaschutz inne Hand nähmen ward, den Strom billig måkt un dei Schullenbrems afwannelt."

Seet hei vör por Dåch mit 'n Stoppelbort an'n Kœkendisch, so steiht hei nu as 'n glatt rasierte Käthe-Kruse-Popp mit Hand up't Hart as Hans in'n Glück vör dei gräune Wand, up dei "Neu.Start" tau läsen is. Un dorvor dat Rädnerpult, an dat Robert steiht un up all dei schellt, dei Düütschland nich tau dat måkt hemm', wat sik dei Gräunen von Düütschland wünschen. So måken dat ja all Partein up ehr Wahlparteidaag — jedein Partei mit ehr eigen Programm.

Säker sünd nich all dormit inverståhn, wat Robert von Schullen un dei Schullenbrems, von Migranten un dat kommodig Läben von männigeinen in Düütschland, vonne klimafründlich Transformatschon vonne Wirtschaft, von 'n Ümgang mit Orban, Meloni, Le Pen, Fico, Kickl, Wilders as rechte Populisten un hei sik sülben för den Buuknåwel inne Midd vonne Sellschåp höllt. Œwer man hett keinen annern Kannedaten. Lang un Nouripour låten ut Freud för Robert Trånen lopen — orrer rorn's, dor sei ehre Posten henschmäten hemm' un nu trurig sünd, dat dei niegen Bessen Brantner un Banaszak von nu an bi männig Runn dat Wåhlvolk verkloren warden, dat Robert dei Motor vonne Gräunen is, dei as einzige würklich dei Taukunft vör Ogen hemm'. Bi 'n einhellig Taustimmung mellt sik denn noch dei gräune Luisa Niebuer tau Wurt, nich wägen "Fridays for future" — orrer doch, wenn s' klorstellt, dat 'n Wåhlkampf åhn Klimapoletik sowat as 'n Harikiri is.

Harakiri, jawoll! Hier warrt Robert sülwen Opper von dei niegen Klimaextreme
in Foorm von jümmer heftigere Storms!
Dei Gräunen hemm dorvör jümmer wohrschuut —
un doch bringt dat sei sülwen üm! Ungerecht!
(Man Hoot af vör den robusten Schirm!)

Œwer woans för't Klima wat daun, wenn Annalena faststellt, dat dei soziale Säkerheit barchaf geiht, wenn dei Normalverdeiner för'n Döner an'n Happenstand nich mihr 4 Euros, sonnern all 7,50 Euros henleggen möt? Vör dit Problem ståhn ok all annern Partein. Sei ståhn all vör deisülwigen Probleme! — Tauletzt stellen sik Realos un Linke achter Habeck, denn sei hemm' keinen annern un kœnen blot mit em punkten. So warrn dat ok dei annern måken.
96 Purzent vonne Delegierten stimmen för em, dat sünd binå soväl Purzente, as Honecker vör Johren kreech. Merz up sienen Parteidag mit 90% steiht dorgägen erbärmlich dor — ü nner 90% is up ein Parteidag meist ein Schann. Ganz vörn liggt natüürlich dei CSU, Söder kreech toletzt 96,6% un överhålt natüürlich Honecker. Dat schull Habeck tau denken geven! Dor mutt hei mål Gas geven — ik mein natüürlich, Biogas!

Kein anner Gräuner kann so mank dei Fronten lawiern un von sik gäben, dat em dat gaut deit, wenn hei weit, dat Annalena vör, näben un achter em steiht. Tausåmen mit dei Niegen anne Parteispitz warden's dei Düütschen Orientierung gäben un sei verkloren, wat inne Welt los is.

Woans dat mit dei Orientierung bestellt is, süht man in't Congress Center Wiesbaden, wo mihr as 800 Delegierte un bummelig 3700 Beobachter ut Poletik, Wirtschaft, Gewarkschaften un noch anner politsch Krings näben dei Klosetts för Manns- un Frugenslüd ok dei "All-Gender-Toilette" besäuken kœnen, dat 'n mitbröcht Kinner, dei noch an'n Titt liggen, in'n Stillstuf anleggen kann un dat all tausåmen up dei gräune Taukunft mit Discjockey Omid Nouripour dat Danzbein schwingen künnen.

"Neu.Start" — dat sünd noch hunnert Dåch Wåhlkampf mit dei gräune Afsicht, "wiederhen Taukunft tau måken, wiederhen tau regiern". Weit Robert nich, wu väle al eins Kanzler warden wullen, dei ehr Nåmen hüüt nüms miehr kennt? Denkt hei mål an Armin Laschet, dei anne falsche Stell lacht hett un ok wech von't Finster wier? Ja, dor denkt hei woll an — un mit väl Behågen, denn anne falsche Stell lachen, dat warrt Habeck nich passeern. Hei måkt bloots handwarkliche Fehlers, œwer snackt wunnerbor glatt dortau. Hei is ja sowat von "medientauglich"!

Deit man dit gräune Spektakel bekieken, denn blifft blot dei Tauversicht, dat Robert nich as einst Stalin up'n Sockel stellt ward orrer as Mao dei Besäuker anstråhlt, sobald dei Lappen tau den Empfang inne Hööchde treckt würn. Œwer wi möten gor nich so wiet taurüch kieken, em künn dat ja ok so as Kamala Harris gåhn, huushoch gägen den Konkurrenten verliern (mit den hei wat låter denn doch koaliern mutt, anners as in Amerika).

Gägen welk Konkurrenten œwer schall Robert verliern? Wecker måkt den Trump för em? De dröge Merz etwa? Ha! Ein geniåle Populist as Trump is bi uns tau'n Glück wied un sied nich tau seihn — orrer, täuw man, is dor nich Sahra Wagenknecht? Twei begnådete Snacksnuten, wenn dei sik duelliern, dat's as King Kong gägen Godzilla! Na dat wier doch mål wat!

Ik sech blots: Geevt Gas! Biogas.