Maat Jan hett Insider-Infos:

De Dwarslöper

De Noricht is in dat politische Berlin as en Bomb inslaan: Bundskanzler Olaf Scholz het nor övereenstimmen Berichte dat Kanzleramt fluchtwies verlaten un is mit de Kanzlermaschien Lufthansa 1 nor Moskau flogen. Dor schall he politisch Asyl beantragt un ok al mit Präsident Putin snackt hebben.

Dorvör hett Scholz in Berlin mit Sarah Wagenknecht (un anschienen ok mit Spood) över en Fusion vun ehr Partein to en "Bündnis Scholz-Wagenknecht" (BSW) verhannelt. Över den Dag harn sik de Anteken vun en Fusion all verdichtet. So is de Innenministersche Nancy Faeser demonstrativ mit en rode Armbinn mit Hammer un Sichel dorop in'n Bundsdach komen. Dat Saskia Esken sik in en Margot-Honecker-revival-Look präsenteert hett, is dorgegen gor nich upfulln.

In en Kabinettsreform hett de Kanzler en överparteiliche Eenheitsregeern formt, wo Alice Schwarzer Familien- un Sarah Wagenknecht Fredensministersche worrn sünd. Na den plaanten Ansluss vun Düütschland an de Russische Föderaschoon schall Wagenknecht as Provinzgouverneursche de ehemolige Bundsrepublik verwalten.
De Jusos hebbt sick dorop hen as Eerste — un ton ersten Mol överhaupt — klor to den Kurs vun ehren Kanzler bekannt.

De düütsche Wedderstand

Op de anner Siet organiseert de CDU-Afordnete un Major vun de Reserve Roderich Kiesewetter de bewaffneten Wedderstand. Knapp ehrdat he verhaft't worn is, hett Verteidigungsminister Pistorius noch de Deelen vun de Bundswehr, de noch halvwegs bi Schick weern, an Kiesewetter övergeven. Dat heet, dat weer mehr as een Transportfahrtüch west!

De CDU-Chef Merz is in de Tied mit een vun siene Privatfleegtüch in de Schweiz landt. In de Finanzmetropole Zürich hett he to Reporters seggt, in Tieden as disse müss jedeen Mann dat beschützen, wat em dat Wichtigste is.

Wat de Bayern sünd, de ehr Ministerpräsident Söder hett as en Reaktion dorop de Unafhängigkeet vun Bayern vun'n Rest vun Düütschland utropen. All 47 Regimenter vun de Bayrischen Gebirgsschützen worn mobilisiert un an de Grenz bröcht. Ehr Updrag na Söder: "Schauts, dass koaner neikummt."

Blooß nich! Keinein dörf ankamen!

Alice Weidel hett verklort, disse Vörgang wiest mol wedder, dat de Systemparteien de AfD kopieren doot. En Pakt mit Russland, seggt Weidel, harrn se all vör 86 Johr sloten.

He — Lindner — regeert beter gornich mehr

De FDP-Vörsitter Lindner meent, Scholz harr sien — Lindners — Plaan vun en "open Feldslacht" (wo he — Lindner — blangenbi nix vun wüsst hett) heel verkehrt verstohn. To sien egen Tokunft seggt Lindner, dat weer better, gornich to regeern as slecht to regeern. He — Lindner — kunn sogor beid.

Sowiet dat Neegste vun'n Dag. Wi meldt us wedder Klock teihn, denn al mit russische Ünnertitel. Bit dorhen wünscht wi jo en goden Abend, do Swidanja, Nastrowje un blievt se tokiekplichtig!