Späukenkieker Roderich Kiesewetter


Kriegt wi villicht bald en Kriegsminister,
dei dat Wäder vörutseggen kann?

vun Behrend Böckmann


Dat süht so ut, as dat dei Kiesewetters wull von'n Nobless ut Sassen afstammen, dei dat dor inne Midd von't 16. Johrhunnert geef. Dei Nåm "Kiesewetter" kann taun einen von "kieseln" kåmen, wat in't schwäb'sche hüt noch dat Wurt för "hageln" is un up 'n mulmig Wäder hendüden deit un künn taun annern ok von't middelnedderdüütsche Wurt "kesen" kåmen, dat soväl as prüfen, erkennen bedüden deit un dornå 'n Kiesewetter denn sowat as'n Wäderpogg is.


Priesfråg: Wat stimmt nich an dat Bild?
Anter: Roderich Kiesewetter is kein Gräuner!

Bi den Vörnåmen Roderich möten wi bet inne Germanentiet taurüchgåhn: ut Hruod (Ruhm) un Erich (reich, Herrscher, Fürst, König) ward Roderich, dei Ruhmrieke. Hüt gifft dat väle Kiesewetters in Düütschland, in Nuurden väle Künstler mit dissen Nåmen un in'n Süden dei Militärs as taun Bispill Roderich Kiesewetter (Johrgang 1963), 'n evangel'scher Christ, den Fomilie noch wat bedüden deit un dei sik för den Schutz vonne Natur in sien schwäbsche Heimat hergifft.


"Ja, wi Wäderpoggen sünd ein stolt Familie!"

As Afkömmling ut 'n Soldaten- un Offiziersfomilie geiht hei nå't Abitur tau dei Bundswehr, kladdert in 30 Johr œwer'n Offizier taun General up, deint as Generalstabsoffizier un Kommandeur, is up'n Balkan un in Afghanistan ünnerwägens, höllt sik bi dei NATO in Brüssel up orrer hett in't Bonner Ministerium för Verdeffendierung (Verteidigung) wat tau seggen. Hei wier af 1990 för twei Johr in Thüringen, üm dei Volksarmee uptaulösen, un hei bringt sik von dor sien taukünftig Fru inne schwäb'sche Heimat mit, dei von nu an mit 'n Bataillonskommandeur verfriecht is. As Gymnasiast wür Roderich all 1979 Maat vonne Junge Union un 1981 CDU-Maat. Un so kümmt dat, dat hei 2009 'n Direktmandat för'n Bundsdach winnt un näbenbi von 2011-2016 Präsident von'n Reservistenverband vonne Bundswehr is.


"Jaja, as Wäderpogg bün ik al teemlich hooch op dei Ledder klabastert!"

In'n Bundsdach höllt hei sik taustännig för Verdeffendierung, Rüstung un Butenangelägenheiten. Hei deit mit dei Gräunen un Gälen in't glieke Huurn tuten, wat Taurusraketen för dei Ukrain angeiht, dormit denn disse 950.000 €uros düren, gaut 27 Zentner schworen Apparaten, dei liek as Raketenähnlichen 500 km dörch dei Luft marschieren könen, den Krieg "nå Russland bringen". För em gellt nich, dat dei Noch-Kanzler mit sien sprickwörtliche Besonnenheit dorvon afsüht, Selenskyj dissen Wunsch tau erfüllen. Dei Roderich mücht, dat 'n Moskau un militärisch Inrichtungen bombardiert, ok üm dei CRINK-Gefohr lütt tau hollen. Denn CRINK, dat is dei Verbinnung vonne sülfstherrlichen Herrscher von China, Russland, Iran un Nuurdkorea. Dei Wäderpogg Kiesewetter wittert dorin ein Gefohrt för uns Demokratie.

Dei Roderich sett sogor Fäknjus (Olaf Scholz wöör "Tüdelkram" seggen) inne Welt: Hei gifft von sik, dat sik Scholz noch vör dei Wåhlen mit Putin dräpen will. Dat wunnert nich (also dat Roderich dat secht), denn hei is ok as Habeck 'n Dichter un hett sienen Gedichtband "Auszeit" 2014 up'e Baukmess tau Leipzig vörstellt. In'n Momang drömt hei villicht von't Mongolenriek, dat inglisch Weltriek orrer dat olle Röm'sche Riek... Up jeden Fall will hei sienen Baas Fiete Merz wiesen, dat hei dei doch bädere Kriegsminister as SPD-Pistorius sien künn, wenn denn dei Christdemokraten dei Wåhlen so winnen süllen, as sei sik dat wünschen.


Wier so'n Wäderkünnige nich veel beter as Minister för Landwirtschap un Energie...? Denn warrt hei opletzt doch noch gräun, ok wenn hei kein Pogg is!

1932 hemm' besonnen Minschen dat Volk wohrschucht: Wecker Krieg will, dei wählt Hindenburg, un wecker Hindenburg wählt, dei wählt... Dat Volk hett dat nich glöwt, un 1945 würn ünnern Strich 60 Milljonen Dode tellt...


"Kiesewetter! Wees kein Frosch! Maak den Landwirtschapsminister!
In dien Hart büst du doch ok gräun, so as wi Poggen all!"


Mooomang! Wat is hier los? Is düt etwa ein Henwies op dat unstarvliche Leed —
ein echten Evergreen — von —— ja!! —— Knut Kiesewetter...???

Un dat wier denn dat Happy End von Kiesewetters Karriere!


Foto Kiesewetter: wikimedia commons

17.1.2025


na baven