Bildungsschnack un Blödschnack

vun Behrend Böckmann

Uns' Politikers hemm ja nich so väl Gelegenheit, ehr Bildung tau wiesen. Sei kunnen dat ja dörch gaude Politik versöken, man dat daut sei taumiehrst nich — ut wat för Grünn ok jümmer. Dor helpt denn bloß noch Klaukschnackerie. Hier poor Bispelen.

As Krischan Lindner noch Finanzminister inne "Taukunftskoalitschon" wier, wull hei nich so as dei annern Koalitschonäre dei Schullenbrems lockern, denn för em keem dat Lockern vonne Schullenbrems mit dat Upmåken vonne Pandorabüss gliek. Œwer wat is denn dei Pandorabüss, un wat is doran so schlimm, wenn man s' upmåkt un rinkieken will?

Disse Geschicht geiht up'e antike Sagenwelt taurüch: Inne hellenistisch Götterwelt harr Zeus mit sien Fru Hera 'n Sœhn, dei mit 'n Hinkebein up'e Welt keem un ut dissen Grund von Zeus un Hera utsett't wür. Sei schmeten ehrn Sœhn in'n Ozean un as dei Taufall dat so will, deit dei allerschönste Meeresnymphe em redden. Hei ward mit sien Hinkebein 'n Gottheit, dei för dat Füer, dei Vulkans un dei Schmitts taustännig is un as Gott will hei ok 'n Fru hemm' un brennt sik ein ut Leihm. Mit disse ut Leihm brannte Fru wull sik Zeus an Prometheus dorför rächen, dat hei em dat Füer muust hett. Un hei näumt 's Pandora, up düütsch dei "Allbegawte". Sei wür nich blot ut Leihm brennt, sonnern sei kreech von Zeus noch 'n groten irden Krauch, dei mit all dei Welt-Œwel in't Binnelste füllt wier un den s' tauig mit väl Schmuck verseihn dei Minschheit schenken süll un tau glieken Tiet dei Minschen afråden süll, in den Krauch tau kieken. Denn wecker den Krauch vonne Pandora upmåkt, den œwerkåmen Süken, Dod un Œwel. — Un dor dat inne Götterwelt wull ok Wunner gifft, friecht Pandora den Brauder von Prometheus, ward niegelich, wat wull in den irden Krauch sien künn — un dor wier't passiert: Von dissen Dach an möt dei Minschheit mit Süken, Dod un Œwel läben. Un so is dat tau den Lüdschnack "Dei Pandorabüss upmåken" kåmen, wenn einer 'n Schåden anrichten deit orrer 'n böset Späl drifft.

Dei humanoide Panzerhaubitze Marie-Agnes Strack-Zimmermann höll 'n Breif, in den ostdüütsche Börger Sahra Wagenknecht in ehr Denken œwer Krieg un Fräden taustimmen, för'n "Kotau". Un glöwt wull, dat dei Ostdüütschen 'n Kotau för ganz wat Leget hollen. Doch dei Ostdüütschen sünd gor nich so dœmlich, as Strack-Zimmermann dat wull annähmen deit, denn ok in Ostdüütschland weit man, dat dei "Kotau" bet 1912 in't chinesich Kaiserriek dei Kneifall wier — un twors so deip, dat dei Stirn dei Ierd tuschiert. Dei "Kotau" is tau verglieken mit den Knicks orrer Dener vör blåchbläudig Vöröllern.

Von Lauterbach keem in Verbinnung mit dei Sprütt gägen dei Coronasük dei Schnack vonne "Boosterimpfung" up, dei tweite Sprütt för noch bäderen Schutz. Dat hett wull Klingbeil — nieger Finanzminister un Vize bi Kanzler Merz — so gefollen, dat hei nu von'n "Wachstumsbooster" dörch weniger Stüern schnackt.

Ricarda Lang hett as 'n Gräune den Haut nåhmen, œwer wull blot inne Partei un nich in'n Bundsdach, denn sei hett utposaunt: "An all dei Trolls, dei dor dachten, dat's mi nu los sünd, dei hemm' sik tau fräuh hœcht!" Wiern för mi Trolls dei grugeligen un malligen norweg'schen Wäsen, dei leiwers bi Nacht ünnerwägens sünd, as dat's an'n hellerlichen Dach ümherströpern, so sünd för Lang dei Verdeilers von Lœgen un Ihrverletzungen Trolls inne digitale Welt, dei dat Tüüchs afsichtlich onleihn posten, üm ehr einen uttauwischen un noch as "moppen" un "stoken" is.

Un Poletikers ut'e Midd hollen Gedanken vonne Ränner nicht blot för populistisch un rechtsextrem, sonnern för "krude" — 'n Biwurt, dat latiensche Wöddeln hett un as "crudus" dei Bedüdung von roh, grässlich, nich kåkt, nich verdaulich hett. Af dat 18. Johrhunnert wür mit dit gelihrig Wurt ordinär, vulgär, nich fien, nich utgoren, nich bet tau Enn' dacht orrer dei Würklichkeit nich seihn ümschräben. Deit einer hüt dat Wurt krude läsen orrer hürn, denn denkt hei doch, dat dat wat ganz Leget is. Un dat is wull ok dei Afsicht von den einen un annern Poletiker.

Ganz nå achtern los güng dat ja, as Björn Engholm dat mål versöcht hett, as hei noch Ministerpräsident von Schleswig-Holstein wier. Dei Utdruck "vice versa" heit up Latiensch "annersrüm". Engholm harr dat wull bloots läst, nich utspråken hürt, œwer dat wüür ümmer von fiene un "gebüldete" Lüüd brukt. Un dei arme Engholm höll "vice versa" för Ingelsch un sä doch wirklich in ein Interview sowat as "Die Kultur nützt der Wirtschaft und weiß wörsa." "Weiß wörsa" schull "vice versa" heiten. Dormalen geev dat in't Kiekschapp so Serien as "Miami vice", dat mutt natüürlich ingelsch utspraken warrn. — Tja, jederein blameert sik, as hei kann. Un dei eine kann dat gaud un dei anner bäter.