Dat Telefonat

vun Behrend Böckmann

"Strastwuitje, lieber Wladimir,
rad mål, wecker schnackt denn hier?" —
"Nå dei Stimm hett dat den Schien,
dat is dei Olaf ut Berlin!"

Dei Kanzler un dei Präsident —
man sik ut olle Tieden kennt —
hemm' sik twei Johr nich doran stürt,
dat einer nicks von'n annern hürt,
doch Olaf denkt, nu is't so wiet,
dat is nu endlich anne Tiet,
miteinanner bäten klœnen,
wenn Gott will, sik ok utsœhnen.

Wat dei beiden sik vertellen,
up wat deit wecker ganz dull schellen,
för all dat grot Geheimnis blifft,
ok wenn't väl tau vertellen gifft,
doch dat lött sik wull eråhnen,
dat dei Ukrain tau Språk is kåmen,
un dat sik jede Sied vörnimmt,
dat dat nich taun Weltkrieg kümmt.

As man dit in Kiew vernähm,
Wolodymir Bang œwerkeem,
denn em hett dat nich gefollen,
mit Putin sik tau ünnerhollen,
un geiht mit Olaf tau Gericht:
"Wat för 'n Schlach in mien Gesicht,
mien leiwer Olaf, låt dat sien,
geef den Putin nich den Schien,
dat man mit em schnacken künn
un en Wech taun Fräden fünn!
Is dei Atem ok sihr lang,
den Putin måkst du keine Bang,
wäs di blot nich gor tau wiss,
dat Putin för den Fräden is!"

Olaf denkt, nu nicks as hen,
sticht in'n Toch, kümmt an, un denn
is dat as bi dat Kordenleggen:
"Wat wür Wolodymir wull seggen,
ward hei mi dei Leviten läsen,
dat ik mi möt düchtig gräsen?",
fråcht Olaf sik so lies in'n Stillen
un wörcht all dei Selenskyj Pillen.

"Du, Olaf", secht Wolodymir,
"taun tweiten Mål büst du nu hier,
wat deist du uns denn hüt verspräken,
up wecke Hülp kœnen wi räken?
Doch, leiwer Olaf, dat mark di,
mit Tyrannen schnackt 'n ni,
låt den Putin Putin sien,
nich tau schnacken bringt em Pien,
leiwer Olaf, wäs doch schlau,
låt dei Pandora-Büss* man tau."

Olaf deit sik fründlich stellen,
ward mit em up den Russen schellen,
hürt, wat dei Kiewer Fründ begiert,
un is denn doch bäten pikiert,
dat dei Fründ blot hett in'n Sinn,
dat hei will inne NATO rin,
un dat em würklich väl dran licht,
dat endlich hei dei Taurus kricht,
denn dei fleigen — as bekannt —
as Kraunen œwer't wiede Land.

Wolodymir, dei Russland kennt,
as Rezept för'n Fräden nennt:
"Blot mit dei allerbesten Waffen
lött sik wedder Fräden schaffen!
Måken wi kort orrer lang
den bösen Putin düchtig bang,
ach Olaf, wat ik glücklich wier,
harrn wi doch por Taurus hier!"

Uns Olaf will dei Wåhl wull winnen,
as Frädenskanzler Wählers finnen.
So kann man nich mit Taurus räken,
doch Olaf ward den Fründ verspräken:
"Solang licht Putin up dei Luer,
is unse Fründschaft ok von Duer!
Ik geef di Drohnen un Haubitzen,
un du löttst dei Russen flitzen,
solang as nödig helpen wi.
Wolodymir, ik holl tau di!
Mien Besäuk sall sik ok lohnen:
Hier hest wedder por Milljonen."

* Die Redewendung vom Öffnen der Büchse der Pandora
entstammt der griechischen Mythologie und symbolisiert
ein Unheil, das - ist es erst mal in der Welt - nicht wiedergutzumachen ist.