Ümgang mit flüchtend Minschen

vun Behrend Böckmann

Tau Tiet sünd up uns Welt knapp 80 Milljonen Minschen up'e Flucht un mihr as dei Hälft dorvon sünd Kinner. Nähmen wi blot por Bispills:

• inne araavsche Republik Syrien towt 'n Börgerkrieg, von 23 Milljonen Inwåhners hemm' mihr as 6 Milljonen as flüchtend Minschen ehr Land verlåten un äbensoväl Minschen sind in't eigen Land ünnerwägens;
• inne Republik Jemen towt 'n Börgerkrieg un 21 Milljonen Minschen läben in gröttste Not. 65.000 flüchtend Minschen künnen in Länner näbenan ünnerkåmen,
  2 Milljonen sünd in't eigen Land flüchtend un versäuken dor tau läben, wo dei Krieg wiet wech is;
• 2011 grünnt sik dei Süd-Sudan-Staat un liekers finnt dei Börgerkrieg kein Enn' un
  von gaud 11 Milljonen Inwåhners hemm' 2,2 Milljonen ehr Heimat verlåten un 1,6 Milljonen sünd in't eigen Land ünnerwägens;
• Dei Jugoslawien- orrer Balkankriege von 1991 bet 2001 wiern ok Börgerkriege üm Eigenstännigkeit un striedig Glöbensfrågen mit mihr as 97.000 Dode in Bosnien-Herzegowina, mihr as 12.000 Dode in Kroatien, üm 5.000 Dode in Serbien un üm 4.000 Dode in Kosovo. Europa un dei Welt hett tauseihn, as mihr as 128.000 Minschen den Dod fünnen. Sülft nedderlännisch Blåchhelms gräpen nich in, as in Srebrenica 8000 muslimisch Männer un Jungs ümbröcht würn.

Nå 20 Johr sinnlosen Krieg an'n Hindukusch gägen dei Taliban un denn IS verlåten dei NATO-Truppen in'n Sommer 2021 Afghanistan. Von Kabul ut geiht dat mit Militärfleigers nå Hus, dei Taliban rücken vör, un ihrer as dat all NATO-Soldaten dat Land verlåten hemm', gifft dat all 'n niege Talibanregierung för dat niege Islamisch Emirat Afghanistan. Harrn sik all af 1980 söss Milljonen as flüchtend Minschen inne Nåwerlänner as Pakistan un Iran begäben, so willen nu ok all dei Minschen dat Land verlåten, dei as "Urtskräfte" för dei NATO-Truppen orrer in'n Deinst för dei niege Gesellschaft stünnen. Un wechtaukåmen is blot mit 'n Fleiger, mit 'n Motorwågen orrer man måkt sik tau Faut up den Wech nå Europa. So sünd inne letzten Johren ok so üm 300.000 Afghanen nå Düütschland kåmen. Väle flüchtend Minschen ut Asien un Afrika keemen nich œwer'n Luft- orrer Landwech, sonnern œwer't Wåder nå Europa, un männigein måkt Bekanntschaft mit Gendarmen vonne Frontex-Agentur, dei sik dei EU schafft hett, üm dei Butengrenzen vonne EU tau kontrolliern. Dat UN-Hülpswark för flüchtend Minschen hett siet 2014 registriert, dat 21.500 Minschen in't Middelmeer den Wåderdod funnen hemm'. Einuntwintigdusend un fiefhunnert!

Un liekers hollen sik Truer un Upschrie in Grenzen, un so is denn 2015 väle Poletikers in EU-Staaten dei Krågen platzt, as œwer dei Balkanrout vonne Türkei un Hellas her 'n dreividdel Milljon flüchtend Minschen in Wien un München bi "Muddi Merkel" ankeemen un an'n 31. Austmånd 2015 von ehr mit dei Wür "Wi schaffen dat" upnåhmen würn. Œwer inne EU kümmt man œwerein, dat Frontex bäder uppassen möt, un hett ok nicks dorgägen, dat dei EU-Staaten anne Balkanrout 'n hogen Tacheldtrahttun upsetten, so dicht un hooch, dat flüchtend Minschen mit düster Huut un annern Globen dor nich dörch- un nich rœwerkåmen.

Korrupschon up all Sieden in dei Ukrain

Nu hemm' wi dei ukrain'sche Maless, wo dei Lütten wedder dat utbåden möten, wat dei Groten nich up'e Reich krägen hemm'. Dei NATO-Staaten wullen ümmer dichter an Russland rankrupen, hemm' dortau noch 'n Russenphobie schürt un ümmer mihr Geld nå Kiew gäben, dat dei ukrainsche Oppositschon an'n Westen binnen süll, dat œwer nich ümmer dor lannt is, wo dat hen süll. Woans künn dat süss angåhn, dat einstig Sowjetbörger mit ukrainsche Wöddeln in'n korte Tiet tau dei rieksten Minschen up'e Welt würn? Nähmen wi blot dei ukrainsche "Gasprinzessin" Julia Timoschenko (Johrgang 1960) mit ehr BDM-Kranz-Frisur, dei mit 'n Videothek anfüng un dormit soväl Geld måkt, dat sei sik in't Öl- un Gasgeschäft inschlicken künn, un dörch dei mœgliche Schattenwirtschaft un mit Hülp von Schmeergeller bald 25 Purzent vonne ukrainsch Wirtschaft kontrolliert. So hümpelt sik allerlei up un all 1997 belöppt sik ehr Vermœgen up söss Milljonen Pund, wenn denn dei Londoner "Times" dei Wohrheit schreef. Näbenbi seet s' in't Parlement, wier 2005 för 7 Månde Ministerpräsidentin un af 2007 för drei Johr noch eins up den Posten. Dat wier sülfst dei Mannslüd üm sei rüm tauväl, un sei wür korter Hand fastsett't, wieldat sei dat tau dull dräben harr. Doch dei friee Welt un ok Düütschland fäuhlen mit disse uprecht gåhend Fru, Düütschland will ehr sogor medizinsche Behandlung taukåmen låten, wieldess ehr Dochter döch dei Welt treckt un all dei anklåcht, dei ehr Mudder achter Schlott un Riegel bröcht hemm'. Ok ehr Kompanjong Pawlo Lasarfenko (Johrgang 1953), dei von 1996/97 för 'n Johr Ministerpräsident wier, hett düchtig in sien Taschen wirtschaftet un em wür 2006 wägen Geldwäsch un Korrupschon in San Francisco dei Prozess måkt, hei wür mit 10 Milljonen Dollar Geldstråf belecht un nägen Johr achter Trallen bröcht. Wat blåchögig kœnen dorch wohre Demokraten sien!

Dörch dei "orange Revolutschon" kümmt's wedder rut ut'n Knast. Dei Europäisch Gerichtshoff rüffelt dei, dei Timoschenko fastssett't harrn, för 'n Akt von Willkür un Unrecht, un denn kümmt dat böbelst ukrainsche Gericht ok dorhen, dat disse Fru kein Verbräken begåhn hett. Nå dei Afwåhl von Timoschenko wür 2010 Nikolai Asarow (Johrgang 1947) taun Ministerpräsidenten wählt un hei hett sik ok as Berader von Wiktor Janukowitsch, dei Präsident von 2010 bet 2014 wier, 'n Nåmen måkt.

Wiktor Janukowitsch (Johrgang 1950), dei hüt as Putin-Marionette gellt un dörch Putin all as ukrainscher Nåfolger von Selenskyj hannelt ward, dei wier twüschen 2002 un 2007 ukrainscher Ministerpräsident un 2010 Präsident, doch hei wür wägen dei orange Revolution up'n Maidan-Platz afsett't un flücht nå Russland. As Russlandfründ wull hei, dat dei Ukrain inne euro-asiatische Zollunion Russland-Kasachstan-Wittrussland ünnerkeem, un ünnerschrifft nich dat Afkåmen, dat dei Ukrain mit dei EU verbänneln süll. Dat nimmt dei Oppositschon as Vörwand för 'n Uplop up'n Maidan, dei nå Asarow inne Ogen von Realpoletikers 'n Schelmenstück mit 'n demokratisch Biwark wier, dat por Aktivisten mit Waffen inröchten. Inne Ogen von EU- un NATO-Drömer wür dit Upböömen gägen Russland un för den Westen 'n ihrenwierte Revolutschon, dei as 'n Erfolg för dei Demokratie hollen wür. Doch dei Westen is blennt un glöwt an 'n demokratisch Revolution, dei œwer in Würklichkeit wull mihr 'n Revolt vonne rechte nationalistische vermummte Oppositschon wier, ok wenn sik Studenten anschluten. Janukowitsch versöcht, mit disse Lüd tau schnacken, un ut'n Westen kåmen ok Poletikers, üm tau schnacken. Joe Biden, dunnemåls US-Vize, hett Janukowitsch, dei drei Månde lang versöcht hett, mit dei Demostranten tau schnacken, mit Nådruck verklort, dat hei, wür hei mit Hülp von't Miltär dei Maidan-Demonstratschonen uplösen, furtsens taun "persona non grata" in Europa un inne ganze Welt ward, denn dei Staaten hemm' fief Milllonen Dollar för dei orange Revolutschon nich ümsüss utgäben. Von Janukowitsch is ok bekannt, dat hei in'n Breif Putin bäden hett, mit Hülp vonne russ'sche Armee wedder "Recht un Ordnung" inne Ukrain hertaustellen.

Un so måkt Putin dat

Ministerpräsident Asarow fråcht: "Wo keemen dei Scharpschützen up' Maidan her, dei dei Gendarmen mit Gnickschuss ümlecht harrn?" Un hei fråcht ok, wecker wull dei utlännischen westlichen Journalisten den Tipp gäben harr, nachts Klock vier up'n Maidan tau kåmen, üm von den "Upstand" tau berichten, von dei "rechten Aktivisten", von disse prowestliche Oppositschon üm Vitali Klischko? Janukowitsch möt afdanken, Poroschenko kümmt, dei Börgerkrieg is nich mihr uptauhollen; in'n Donbass orrer Lüttrussland, wo väle Russen läben un sik blot noch ünnereinanner in ehr eigen Språk ünnerhollen dörpen, towt hei besonners dull.

Janukowitsch, Dr. oec., Maat vonne ukrainisch Akademie vonne Weitenschåpen un Baas von Ukrain'sche Olympisch Komitee, künn sik nich mihr hollen un neiht 2014 ut.
1,3 Milljarden Euro harr hei in'n korte Tiet in sien Taschen wirtschaftet un 145 Milljonen Franken inne Schwiez hinnerlecht. Dorför wür em 2014 in Afwäsenheit dei Prozess wägen Hochverråt måkt, un 13 Johr süll hei achter Trallen. Nu künn hei dei 2.600 Quadratmeter grote un düre Privatresidenz as bavarisch Wiertarbeit up 'n 137 Hektar grote Grundstück an einen Dnepr-Stausee in'n Nuurden von Kiew mit Piratenschäp, Zoo, Warmhus, Meierie un Tankstell, den Lanneplatz för Flœgelschruber, dei Parkplätz för dei Luxus-Karossen, dei Sportanlagen, dei Kœk mit Vörkoster un all den höfischen Prunk noch väl mihr vergäten. Dor, wo einst dat Kloster Meschigorje stünn, sorchten mihr as 1000 Deinstlüd för Säkerheit, Technik, Putzen, Gärtnern un Kåken för dat komodig Läben von den Präsidenten un sien Angturåsch. Hüt sall dat 'n Museum sien.

Einer is nich bäder as dei anner. Nå em œwernimmt Petro Poroschenko (Johrgang 1965) mit den Ökelnåm "Schokelorkönig" orrer "Zuckerbaron" dat Zepter. Hei keem in'n Oblast Odessa up'e Welt, füng as studierter Sowjetminsch in den 1991 grünnten sülfstännigen Staat Ukraine an Poletik tau måken, un dörch den Hannel mit Kakaobohnen lecht hei den Grundstein för sien Ünnernähmen "Roshen", dat denn all 2013 so anne 450.000 Tonnen Schokelorenworen up'n Markt bringt un em so väl inbringt, dat hei ok bi Warften, Banken, Fabriken, Lännerien, Medien dat Seggen hett un düchtig afsåhnt. Hei sträwt Regierungsämter un dat Präsidentenamt an, ward 2014 för fief Johr "ukrain'scher Sünnenkönig" un sien Privatvermögen vergröttert sik von 950 Milljonen Dollar up 1,6 Milljarden. As hei sik denn 2019 taun Wedderwåhl stellt, dor kümmt em dei Afkat un Spälmann Wolodymiyr Selenskyj (Johrgang 1978) tauvör un ward dei sösste ukrainsche Präsident. Hei wull as Präsident gägen dei Oligarchen vörgåhn, sall œwer sülben 'n Breifkastenfirma in'n Stüeroas' ünnerhollen. As Präsident hett hei Donald Trump verspråken, dat hei för 400 Milljonen Dollar Militärhülp gägen Joe Biden ermiddeln wür, denn Biden sall as US-Vize dorför sorcht hemm', dat dei ukrainsche Generalstaatsanwalt Wiktor Schokin schasst wür, üm sienen korrupten Sœhn Hunter Biden (Johrgang 1970) in'n Verwaltungsrat von den ukrainschen Ierdgaskonzern Burisma Holdings tau schützen.

Noch ünnner Poroschenko wür inne ukrainsche Verfåtung fast schräben, dat dat Land dei faste Afsicht hett, 'n vullstännig Maat inne EU un NATO tau warden. Dorgägen is Putin; hei will dei NATO nich vör dei eigen Husdör hemm' un erinnert nu mit Hülp von russlandfründlich Kräft inne Ukraine an dat, wat Kohl un Gorbi inne Sauna afmåkt hemm', un is vergnatzt, dat dei Westen sien Verspräken nich höllt un dei NATO Russland ümmer neeger up'e Pell rückt.

Selenskyj as nieger Präsident boddert hengägen düchtig, dat dei Ukraine inne EU un NATO Anker schmitt, un dei NATO-Staaten schmeern em düchtig Bodder üm't Muul un schmieten tauversichtlich mit Milljonen üm sik, dormit dei Ukrain an'n Westen bunnen ward.

Flüchtlinge von 1. un 2. Klass?

Dei abendlännisch Sichtwies up Frieheit un Demokratie, up Minschenwür un Minschnihr sall œwerall gellen — un gellt doch nich œwerall. Dei öllst Demokratie up uns Welt schert sik nich doran, wenn man blot an dei denken deit, dei in't Gefangenenlåger Guantanamo insitten un malträtiert warden. Orrer as anfangs all anmarkt, dei twinnig Johr in Afghanistan — wat hemm's uns Welt för Frieheit un Demokratie bröcht? Älend, Hunger un Milljonen flüchtend Minschen, un uns Hülp bi dei Flucht wier man schäwig. Un näbenbi, dei Taliban sünd ja ierst stark worden, nådem dei Westen sei in'n Kampf gägen dei bösen Russen stark måkt harr un dei denn Spieß ümdreihten. Œwer woans heit dat so schön: "Quod licet Iovi, non licet bovi" — "Wat dei ein dörp, dat dörp dei anner noch lang nich!"

Dat is ümmer noch wohr. Dat gifft ümmer noch dei Gauden, dei Zivilgesellschaft mit Frieheit un Demokratie un dei Bösen, dei Diktatoren un Minschenünnerdrücker, dei Machthåber in Russland, Kuba un Nuurdkorea. Putin is twors nich Iwan Grosny ut't 16. Johrhunnert, œwer hei is dei Poletiker, dei Russland ok in't 21. Johrhunnert tausåmenhöllt un dörch dei Fründschaft tau un mit China dei weltwiede wirtschaftliche Globalisatischon taun Wackeln bröcht hett. Hei hett wat gägen denn Willen vonne EU-Poletikers, dei in Verbinnung mit denn Bündnispartner in Œwersee dei Ukrain an sik binnen un nich taulåten willen, dat dit Land äbenso as dat neutrale Finnland 'n gauder russ'scher Nåwer sien künn.

Inne Ostunkrain, den mierstendeils von Russen bewåhnten Donbass orrer ok Lüttrussland kümmt Gägenwind up, man is mit Kiew nich inverståhn, geiht up'e Stråt, man revoltiert un grünnt dei "Republiken" Luhansk (tau Sowjettieden Woroschilowgrad) un Donezk, man kümmt œwerein, disse Regionen 'n Sonnerstatus in Richtung Sülfstännigkeit tautauspräken. Doch dortau kümmt dat nich, Scheiterien nähmen nich af, sonnern warden grötter, un denn ward Putin tau Hülp raupen un sien Truppen griepen an. Wat för em 'n militärisch Operatschon is, dat is för Selenskyj un Co. Krieg. Hei gifft sik heldenhaft un verlangt von sien westlichen Frünn Waffen, Geld un densülwigen Russlandhass, den hei an'n Dach lecht. Ok dei ukrainsche Botschafter Melnik schrifft ut Russlandhass vör, wat Düütschland un sien Kanzler daun un låten sall. Un Düütschland schickt nich blot Waffen un Geld, Düütschland nimmt nu ok flüchtend Minschen ut'e Ukraine up. Fäuhlt 'n sik nu bäten schullig, dat up eins nich Frontex insett't ward, üm Frömde doran tau hinnern, ehrn Faut up uns hillig EU-Rebeit tau setten? Wat dat so noch nie gäben hett, wenn flüchtend Minschen œwer't Middelmeer tau uns wullen, ward up eins wohr. Flüchtend Minschen ut'e Ukrain warden anne Butengrenz vonne EU afhålt, sei dörpen inne EU ümsüss mit Bus un Bahn reisen, warden gliek gaut ünnerbröcht, mit'n Fleiger ut Moldau inflågen, dei Kinner warden furtsens inne Schaul gåhn un dei flüchtend Minschen gliek 'n Anstellung kriegen. Näben den Staat helpen väle Privatlüd hüt äbenso as 2015 wihrend dei grote Flüchtlingswell.

Dörchhollen bet tauletzt is wull dei Devis' von Selenskyj. Un hei wiest sik ümmer wedder un röppt taun Wedderstand up, taun Wedderstand, dei einen as 'n Mischung ut Lenigrader Blockad', Adolf sien Volksstorm un Interbrigaden in'n span'schen Börgerkrieg vörkümmt. Un all, wat em nich taupass kümmt, ward dei Russen ünnerschåben, jederein, dei russlandfründlich un insichtig is, gellt as Russenspion, un dei Drohn, dei œwer Zagreb afstört is, steech inne Ukrain inne Luft.

Dor fählt blot noch Franz Liszt sien "Les Préludes", dat musikalisch Vörspäl, dat all eins för Siegesmellungen missbrukt wür.

So as Selenskyj hemm' ok anner an den Sieg glöwt. Taun Bispill mien Tant in Kiel, dei noch an'n 10. Maimånd 1945 an den Endsieg glöwte, wieldat sik 'n lütter verbiesterter Wehrmachtstrupp in Schleswig-Holstein noch nich ergäben harr. Krieg is schlimm, besonners för Kinner. So kröpen mien lütter Brauder un ik nå dei Kaptulatschon ümmer noch ut Bang vör Deipfleigers ünner Vadders Schriefdisch twüschen dei beiden Stuwenfinster, wenn 'n Fleiger inne Luft tau hürn wier. Un weck Wunner, dat Hus von Tante Käthe inne Hamborger Hallerstråt harr nicks afkrägen, doch rundüm lech blot Schutt un Asch. Sei mösste nich as väle utbombt Börger in'n Nissenhütt ut Wellblech läben. Dat sünd dei schwachen Erinnerungen von uns Ollen, dei Kriegskinner von dunnemåls, dei sik vörnåhmen harrn, dat dat nie nich wedder 'n Krieg gäben süll. Un dorvon sünd wi in'n Momang ganz wiet af, denn plietsch wier't, nich mit Sankschonen wieder antaubäuten, sonnern allens tau daun, dat dei Krieg 'n Enn' hett, dat nich mihr schåten ward un Bomben nich mihr fallen, Raketen nich mihr inschlåhn un Minschen in ehr Hüs schlåpen kœnen.