 |
|
Russenhass? Anter op den Artikel vun Behrend Böckmann vun Marlou Lessing Leve Behrend, nu mutt ik avers doch en poor Wöör to Dien Bidrag "Ümgang mit flüchtend Minschen" dalschrieven. Ik nehm mi dorför Tied; ik do dat, wieldat dat mi sülven wichtig is, ganz eendoon, wat dat jichenseen annern intresseert. Ik fang bi ganz elementare Saken an: de Spraak. Du schriffst vun de "russlandfründlichen Kräft" in de Ukraine, vun de, de "russlandfründlich un insichtig" sünd. Dat sünd Wöör, de en besunnen, rationale Wesensaart betekent. Op de anner Siet sühst Du "Russlandhass" un "Russlandphobie". Dat sünd Vokabeln, de en irrationale, rein geföhlsaardige Haltung beschrievt. "Phobie" is sogor en krankhafte Bang, "Hass" is moraalsch verwerflich. Ünner de Hand swiesterst Du so de Leser*schen in: De gegen Putin sünd, sünd also de Slechten un togliek panischen Büxenschieters ahn realen Grund. De Kloken, Fründlichen sünd för Russland. Dat schallt de Leser*schen denken — all ehrdat een eenzig Argument fallt. Leve Behrend, düsse Spraak is nich ehrlich un nich fair. Un wieldat de Spraak de Basis vun all uns Uttuusch is, schull se fair ween. Wat, wenn ik nu Dien Terminologie utwessel: Ik nööm de Russlandfrünnen "Russlandfanatikers" (dat klingt irrational un gefährlich) un de annern "Russlandskeptikers" (dat is rational un vörsichtig) orr op't best glieks "Europafrünnen" (dat warmt reinweg dat Hart). Dat weer liekso unfair, dat dreiht bloots den subtilen Influss op dat Denken vun de Leser*schen üm. Ik do dat avers nich, denn ik heff dat nich nödig, mien Leser*sche so stiekum den Bregen to waschen, un ik bün wiss, Du hest dat ok nich nödig. Laat uns dorüm in Tokumst neutrale Beteken un faire Spraak bruken! Menen schall sik dör Argumente billen, anners nich. Wat ik avers in de nafolgen Pünkt neutraal blieven kann, dor heff ik mien Twievel. Jümmers noch is dat de Spraak. Du schriffst: "Wat för em [Putin] 'n militärisch Operatschon is, dat is för Selenskyj un Co. Krieg." Wohr is: En Krieg is jümmers ok en militäärsche Operaschoon. Avers nich jede militäärsche Operaschoon is en Krieg. In de Mengenlehr wöörn wi seggen: Kriege sünd en Ünnermenge vun militäärsche Operaschoonen. Dat gifft ok noch annere Aarten militäärsche Operaschoonen, so as Manöver un Truppenverlagern. As wat wöörst Du denn Putins Akschoon beteken? Manöver? — Leve Behrend, woso üm den hitten Brie danzen? Russ'sches Militär schütt op ukraiinsches un annersrüm. Dat is en Krieg. Wullt Du dat wirklich mitmaken un op Putins "verbalen Entsorgungspark" instiegen? En "Entsorgungspark" is ja bekanntlich de Euphemismus för en Atoommüll-Endlager. Un in düssen Stil snackt ok de russ'schen Staatsmedien. Ik laat mi dor nich op in. Op Platt sünd wi wennt, Peer un Rieder klaar to nömen.
In'n neegsten Satz al seggst Du, de ukraiinschen Regeernslüüd hannelt "ut Russlandhass", wenn se na jegliche Ünnerstütten vun'n Westen roopt. Dat finn ik en originelle Interpretaschoon, dat "Russlandhass" to nömen, wenn de russ'sche Armee al mit'n Panzer vör de Döör steiht. Ik wöör dat blanke Doodsangst nömen. Man wenn dor nu meddewiel wohraftig Hass in't Speel is, wunnert Di dat?! Wenn se mit'n Panzer vörfohrt, kannst sogor en utwussen "Russlandphobie" kriegen, dat weer ganz in de Reeg. Bedanken köönt sik de Russen bi Putin. Den "Russlandhass" nimmst Du as en Natuurgesett hen, Du achterfraagst em un sien Herkamen nienich. Wokeen sik Russland verweigert orr gegen dat vörgeiht, mutt en Russlandhasser ween. Dat erinnert mi fataal an — nu gah ik op dünn Ies — de Aart Lü, de foortsens "Antiamerikanismus!" orr sogor "Antisemitismus!" schriegt, wenn een gewisse Fakten — bloots Fakten! — faststellt. Se ünnerstellt di mit so'n Woort, dat Du unfair büst un man bloots stillswiegen schullst. Dat is en Strohmann-Argument, en Aflenkensmanöver. Ik denk denn jümmers, de wüllt dat Thema üm jeden Pries beenden — sachs wieldat Du en ganz neuralgischen Punkt drapen hest. En Vulltreffer. Leve Behrend, wenn Du nu dat, wat ik hier schriff, rundweg vun de Hand wiest un as nixhaftigen Hintjenkraam schamfeerst, denkst Du, dat ik denn seggen warr: "Pah, dat is doch nix as Fruunsfiendlichkeit!"? Nee, natüürlich warr ik dat nich seggen. Ik warr Di veelmehr nipp utfragen, wat nau ik verkehrt maakt heff. Ik will Dien Argumente in de Saak hören, ik will dat weten. Ik wiek nich ut.
Un dat bringt uns wedder trüch na de Russen. Wat nau hebbt se denn verkehrt maakt, dat so vele Lüüd nix vun ehr weten wüllt? Un dor sünd wi nu bi dat punctum saliens, den jumpen Punkt. Is dat wirklich Russenhass? Also en grundlose Aflehnen, en Aart Rassismus gegen Russ*innen, ehr Kultuur, ehr Spraak, ehr Land? Ok hier in Westeuropa? Gegen en so groot un veelfältig Volk mit so en wunnerbore un staunenswerte Kultur un Wetenschap? Ik glööv, so tumpig un ignorant sünd wi nich. Wenn dat in de Ukraine nu Russlandhass geven wöör — weer dat en Wunner? Dat dat in de Ukraine Rechtsextremisten un ok Neonazis gifft, stimmt, dor gifft't keen Verdoon. Putin sülvst is en Naschonalist un keen Demokrat; ik will nu avers keen Nazivergliek riskeern. Nütt ok nüms. Woso also wehrt sik de Ukraiinschen so as verdull un bet op't Bloot? An den Russlandhass as wesenlose Kraft ut de Höll, dor glööv ik nich an, dat is en Popanz. Dat geiht üm wat Konkretes. Üm de Levenswies. Üm de Frieheiten. Ik glööv, dat de normalen Minschen in de Ukraine, sünnerlich de jungen, eenfach in en liberale Sellschap mit demokraatsche Rechten leven wüllt. In de Ukraine weer dat mööglich, sogor för de Nazis, de dat dor gifft (de Nazis hebbt nich de Macht, sünst wöörn se dat Land "gliekschalten"). De ukraiinschen Lü wüllt eenfach en normaal, weltapen Leven sünner Angst leven. Dat is ünner Putin slagaardig ut. Stell Di vör, Du leevst in Kiew un hest gor nix gegen Russland, büst villicht sülven ethnische Russ*in, man bloots, du büst
In de Ukraine weer dat allens betherto mööglich; ünner Putin — ut. Een eenzige vun düsse eentlich unpolitischen Ümstänn wöör also langen, Di in Opposischoon gegen Putin to bringen — un opletzt to'n Kämpfen, wenn de Panzers anrullt. Un dat gifft noch veel mehr solk "unpolitische" Ümstänn. Du kümmst miteens ut en halvwegs frieheitlich Land in en krasse Diktatuur. Dat is de Alpdroom. Dorgegen wöör ik mi ok wehren mit allens, wat geiht. De Ünnerscheed to China is bloots noch, dat Russland nich de nödige Technologie hett, sien Inwahners so perfekt to kunnerleern un to lenken. — Dat Putin all düsse Lü to Fienden hett, dorför kann he sik ganz alleen bi sik sülven bedanken. Dat is na mien Menen de Grund un Motivaschoon för den entslaten Wedderstand — nich jichenseen diffuse Hass op en Volk, en Kultuur orr en Stück Landkoort. Dat allens ünner "Russlandhass" aftostempeln bringt nüms wat, dat föhrt in en Sackgass. De Motive to verstahn is wichtig, sünst kümmst nich wieder.
Noch wat Snaaksches lees ik in Dien Wöör. Du schriffst "Dörchhollen bet tauletzt is wull dei Devis' von Selenskyj un [...] jederein, dei russlandfründlich un insichtig is, gellt as Russenspion" un "So as Selenskyj hemm' ok anner an den Sieg glöwt. Taun Bispill mien Tant in Kiel, dei noch an'n 10. Maimånd 1945 an den Endsieg glöwte". Dat klingt, as wenn de Sieg vun Russland en klaar utmaakte Saak weer, al vör den eersten Schuss. Du leggst de Ukraine also en fixe Kapitulaschoon nahe. Wieldat Russland eh stärker is. — Wenn mi en Stärkere angriept orr ok bloots bedrauht, wehr ik mi also gor nich eerst, sünnern striek glieks de Segel, egaal, wat ik in't Recht bün orr nich? Dennso kunn Russland eenfach en Dörchmarsch maken dör all Länner, de dat övermann is, un överall ahn Wedderstand Pressefrieheit, Menensfrieheit un Minnerheitenrechte afschaffen? Se bruukt noch nich mal scheten — se mööt bloots seggen, wat se allens hebben wüllt, un "Buh!" seggen? Ja? Un gegen den FC Bayern wöör ok keen Bundsligavereen mehr antreden — se wöörn de Partien al vun Anfang verlaren geven, denn de annern sünd ja stärker. Oh, Momang, hett nich annerletzt Bayern gegen Bochum verlaren? Hebbt annere nich tominnst Remis rutspeelt? Lohnt sik dat also nich? Oh, klaar, Krieg is keen Footballspeel. Den Krieg riskeern heet, dat Leven vun unschüllige Minschen to riskeern. Dat dröff een nich. Denn lever kapituleern! Un wokeen dat nich deit, hett de denn nich sülven Schuld, wenn de Supermacht, de sien Grenzen ümstellt hett, em denn in Gruus un Muus schütt?! Se harrn doch kapituleern kunnt, as de Supermacht "Buh!" seggt un ehr Wünsch mitdeelt hett! Dat Blootvergeten is sülvstverschüllt, se hebbt dat nich anners wüllt. So bookstabeert sik "Täter-Opfer-Umkehr". So veel to de Ukraine.
As ik Dien Överschrift sehg, heff ik dacht, dor kümmt nu en Vörslag för en brennen Tokunftsproblem: Op de Welt sünd villicht 80 Millioonen op de Flucht, avers 600 Millioonen sitt op packte Kuffers. 300 Millioonen dorvun wüllt na Europa, 300 na Noordamerika. Un mit den Klimawannel un den Hunger, de nu wedder wassen warrt, warrt dat nich minner. Wosaken dormit ümgahn?! Festung Europa? En anner Anter warrt dat nich geven, dücht mi. "Wir müssen die Fluchtursachen bekämpfen", dat is en afdruschen Utreed, wenn dat mal wedder üm geiht, Flüchtlinge aftowiesen. Liekers köönt wi nich 300 Millioonen opnehmen un integreern. Wat doon? Ümgang mit flüchten Minschen, dat is sünnerlich en Thema vun Ungerechtigkeit, nämlich vun Rassismus. Kiek de Polen an: 2000 irakische un syrische Lü an de wittrussische Grenz? Stickeldraht! 2 Millionen blonde un christliche Ukrainers an de Grenz? Apen Arms! Uns towannerte Mitbörger*sche seht dat nau, tüüsch
Di da nich, un dat verletzt ehr. Mien syrische Schölers un Frünnen
in Hamborg föhlt mit de Ukrainers, ehr Hart blöödt
för ehr, se seggt mi: "Wi weet, woans sik Putins Bomben
anföhlt! Kiew warrt utsehn as Aleppo!", avers togliek sünd
se verletzt: "Woso kriegt de Ukrainers nu alltohoop 1 Johr Bleiberecht
blanko, un wi hangelt uns siet Johren vun Duldung to Duldung? Woso
kriegt se foorts en Arbeitsverlööf un dröfft mit ehrn
ukrainschen Pass gratis S-Bahn fohrn — un wi...?!" Wi mööt
de Wohrheit in't Gesicht kieken, Rassismus speelt en Rull in de Aart,
woans flüchten Lü behannelt warrt, un dat warrt ok in de
Tokumst en Problem blieven. Wi hebbt also veel gröttere Probleme to lösen
un köönt wohraftig allens beter bruken as en Krieg. Man
bloots wenn wi en Atoomkrieg kriegt, hebbt wi gor keen anner Problemen
mehr. Nich mal de Fraag, wokeen denn dor de Schuld an kriggt. 18.3.2022
|
