Öllere Daagbook-Notizen vun Marlou

11.12.05 ...De Therminator kümmt

De UN-Klimakonferenz in Montréal is toenn gahn, ahn dat mehr bi rutkamen is as de Medienpräsenz. Dat Klima bruukt so'ne Konferenz würklich nich: all kaamt se mit Fleegtüüch an un suust mit Fleegtüüch wedder af... Man de Medienpräsenz, dat is al wat. Dat Klima weer Thema, överall; Kiekschapp un Bläder weern vull dorvun. Wiss, Vöruurdelen un Stereotype woorn ok orntlich bedeent: de bösen USA, de gode EU... (De EU hett meddewiel ok twee "Fossil vun'n Dag"-Schandpriesen för destruktive Verhannlungsföhrung kasseert.) Natüürlich bedeent de USA sülven de Vöruurdele gegen ehr an'n besten. Se sünd öövt in. Toletzt hett ehr Delegaschoon den Verhannlungssaal verlaten, wieldat se de Vörslääg gor nich anhöörn wullen. So en Buhmann, as de ut sik maakt, kunnst di gor nich utdenken. Dat is schon mustergüllig. Un een Ergeevnis weer denn amenn ok, dat de Welt ahn de USA wiedergahn mutt — so good dat even geiht. De Welt weet dat; is to höpen, dat se dat deit.

Man de grote Medienpräsenz. Is dat nix? Dat Weltklima in de Hauptnarichten, na, wannehr kümmt dat süss vör? Ha! Noch faken noog. Tööv man beten, denn warrt de Narichten vun nix anners mehr hanneln. De gigantischen Gefohren, de dor op us töövt, köönt wi noch gor nich taxeern. Dat Klima bruukt gor keen Medienpräsenz — dat bruukt gor nix, dat ännert sik eenfach, un wi sitt dor. De thermische GAU — de Therminator, sotoseggen — kümmt ahn Ophollen op us to. Wokeen warrt sik later noch an Montréal erinnern? Villicht poor, de sik schamen mööt. Is to höpen, dat se dat ok doot. Un wi? Wi köönt meddewiel nich veel maken: nich veel Auto fohrn, nich veel Fleegtüüch-Reisen maken, nich veel Bööm fällen, nich veel Landschap verbuun. Wenn wi dat maakt, denn is dat — so wenig dat is — veel.

6.12.05 ...Bi de Pressekonferenz...

Mal wedder den Sender Phoenix afropen (kannst in't Internet per Live-Stream kriegen, www.phoenix.de!). Ha, Pressekonferenz mit Merkel un Condoleeza Rice! Hest ni sehn, dat Merkelchen! Dat kanzlert, as harr dat nienich wat anners maakt. Un wenn Merkel un Condi Rice so ünner den Bunnersaadler mang de Fahnen an ehr Pulte staht, denn hest dat Geföhl, de Welt warrt villicht nich beter, avers se beweegt sik doch: Twee mächtige Naschoonen, sülvstverständlich dör Fruuns repräsenteert, un een vun de Fruuns is sogoor farbig. Wokeen harr sik dat vör 100, ja noch vör 50 Johr vörstelln kunnt? Sogoor hüüt schient dat noch bemerkenswert. Dat wiest: wi köönt us noch wieder entwickeln.

Man denn kaamt de Fakten op den Disch, un dor seht se nich so rosig ut. Condi gifft to, dat de CIA den Düütschen Khaled al-Masri (ja, en richtigen Düütschen! mit en düütschen Pass un Ansprook op den Schuul vun unsen Staat! Hallo, Herr Schily?) "irrtümlich" kidnappt harrn. Se meent dormit, dat he keen Terrorist weer. Dat weer de Irrtum; nich dat Kidnapping, dat hebbt se nämlich heel afsichtlich maakt. Wenn du en Minschen en Sack över'n Kopp haugst un em na Afghanistan versleppst, is dat nienich en Irrdom, sünnern en Verbreken. Man düsse Praxis — seggt Condi — hett ok europääsche Leven reddt. Pardon, Ms. Rice? Dröfft wi us villicht de Methoden, mit de wi reddt warrn wüllt, sülven utsöken? Wi sünd nämli opwussen Lü hier in Europa!

Blangenbi nehm ik ehr dat so eenfach nich af, dat düsse Folter- un Kidnapping-Praxis Anslääg verhinnert un Leven reddt. Bewiesen deit se dat nich; se nöömt keen eenzig konkretes Bispill. Wi schallt ehr dat glöven. Wi schallt ehr ok glöven, dat de USA sik natüürlich an Recht un Gesetz hollen doot. An welk?

Un in solk Tieden mutt, utrekent hüüt, een vun de Lüchttoorns verlöschen: Hanns-Dieter Hüsch is dood.

4.12.05 ...Dösiges Design

"Intelligent Design", dor snackt nu alle vun. Op Platt heet dat etwa: Plietsche Planung. De so nöömten "Kreationisten" (d.h. "Schöpfungstheoretiker") wüllt us wies maken, dat en Intelligente Designer, also en Plietsche Planer de Welt so maakt harr, as se nu is; de Evoluschoonslehr weer Dummtüüchs, seggt se. In Amerika sünd se besünners togang. Natüürlich warrt dor mal wedder en Sündenbock söcht. Wenn de Plietsche Planer (wat de leve Gott ween schall) för den Tostand vun Flora, Fauna, Welt un Minschheit verantwoortlich is, denn sünd ja de Minschen fien rut, nich? George Bush mutt sik nich mehr schamen, dat de USA bi de Klimakonferenz in Montréal Dag üm Dag wegen ehr destruktive Klimaschuul-Verhinnerungspolitik den Schandpries "Fossil vun'n Dag" kriegen doot (süh hier), mal tosamen mit Saudi-Arabien, mal mit Japan. Nee, schuld an allens is de Plietsche Planer. Ok an dat kaputte Klima.

To'n Wunnerwarken is doch, dat de, de dat Intelligent Design an'n ieverigsten predigt, mehrst sülven den lebennigen Gegenbewies levert. George Bush schall vun en Plietschen Planer stammen? Ha! Naja, aver de Evoluschoon kannst dat ok nich in de Schoh schuven. För solk as Bush gifft dat keen Erklärung. — Doch! De eenzige Erklärung is, dat de Planer nich plietsch, sünnern dösig is — un dat nich to knapp. För so en Dösigen Designer gifft dat na mien Erachten en ganze Reeg Henwies. De Saak mit de Fruuns- un Mannslüüd to'n Bispill. Dat is doch bekannt, dat Fruuns tominnst 2 Stunnen per Dag den Rügg eit kriegen mööt. Dat is en Natuurgesetz. Woso maakt Mannslüüd denn dörsnittlich na ½ Stunn slapp?! Min Exemplaar fangt al na 20 Minuten an to quesen: "Immer musst du auf meinem Bauch liegen, immer muss ich Rücken eien! Warum immer so lange?" (Min Exemplaar is'n Hoochdüütschen.) Ik bidd Se: Wöör en Plietsche Planer sowat Verdreihtes erfinnen? Orr de Evoluschoon? Nee: dat is Dösiges Design pur. De Kreationisten hebbt doch recht!

1.12.05 ...Wooldstarven mal anners

Niemünster in de Wiehnachtstied: den ganzen Grootflecken rop un rünner — Dannbööm! An Latüchtenmasten fastbunnen, an elk Mast een, as an Marterpahlen — en besiegtes Heer vun afslaan Bööm, en dode Woold. Harr dat nödig daan? Nix gegen en Wiehnachtsboom, un de grote Dannboom op den Grootflecken nimmt sik ok staatsch ut; man düsse Inflaschoon vun dode Bööm links un rechts, müss dat ween? Noch junge Bööm dorto. Ja, ik weet: Dorto warrt se tücht, billig sünd se ok —— man liekers!! Junge, levige Bööm, afslaan as Dekoraschoon för poor Weken, an de alle Welt bavento achtlos vörbigeiht. Lett dat nich pervers? As de ganze Massenbedreev? Jüst wieldat se dorför tücht warrt, jüst wieldat se so billig sünd — dat is doch al dat Perverse. An Hamborg mach ik nu gor nich mehr denken. Dor weer dat alle Johr slimm. An de Straten, an de Fassaden vun de Koophüüs klatscht se de Bööm as nix. Beter fohr ik gor nich in de Binnenstadt düt Johr. De Stadt is doch keen Woold! Uns Städer vun hüüt köönt sik ok nienich as Woolden verkleden. Nich mal as dode Woold. Dat hett de Aura vun'n Karkhoff. Un wiehnachtlich is dat schon gor nich. Dat is Wiehnachten op Düwel kaam rut, Wiehnachten mit de Breekstange. Bööm behannelt se as Müll, de Lü rennt rümmer un kööpt Müll in — tokünftigen Müll —, dat Ganze lett, as tööv dat bloots op en groten Schredder, de een Dag kümmt un allens to Häcksel maakt, Koophüüs, Ladens, Autos, Bööm un allens. Unheimlich is mi in düsse doden Woolden.

27.11.05 ...Recht orr Ordnung?

De CIA foltert un lett foltern, in "befründete Schurkenstaaten"? Ja und? Nüms is mehr baff, nüms empört sik. Is keen Skandal mehr. Jeder höllt dat för mööglich. Dat is de Punkt: Egaal, wat dat wohr is — jedereen truut ehr dat to. "Ist der Ruf erst ruiniert, foltert sich's ganz ungeniert." Dat gifft keen Skandal mehr. Jüst dat is de Skandal.

Wat is dat eentlich, över dat wi us nich mehr opreegt: de Folter orr dat de USA dat maakt? Dat de USA dat maakt, de westliche Führungsmacht — ja, dat sünd se —, is slimm, man de Folter sülven is doch dat wiet Slimmere. Sünd wi överall un jümmers gegen Folter? Orr bloots bi Unschuldige? Orr bloots, wenn us dat in'n Kraam passt — wenn wi Fründ Bush mal wedder een op'n Deckel geven köönt? Denn sünd wi nich beter as Bush: de is ok gegen Folter, wenn em dat in'n Kraam passt.

Regeern överall in de Welt stellt hüüt den schienboren Gegensatz op "Recht oder Ordnung". De Krieg gegen den Terror feddert even totieden Afstriche bi't Recht, seggt se. Süss geiht dat nich. Dat is en verdüvelte Löög. Ahn Recht is keen Ordnung. Folter is totaal sinnlos. Ünner Folter wöör sogoor ik vertelln, de Eer weer en Schiev un Osama bin Laden min Tweeschenbroder. Dor kannst doch keen "Erkenntnis" bi winnen!! Nee: De Folterie is en Avergloov vun mächtige Feiglinge. De wüllt allens beherrschen, allens kunnerleern un weten, wieldat se Bang hebbt. Bang vör dat Recht un vör de "unberekenbare" Demokratie. En seker Teken för düsse Feigheit sünd opblähte, mächtige Geheimdeenste. Alle Diktatuurn hebbt ehr. Nich Macht, nee: Bang stekt dorachter. Düsse Bang is de Anfang vun en Paranoia, un de endt ungefähr bi Lukaschenko vun Wittrussland sin Regime. Dat is berekenbor; ok de USA (man nich bloots de) hebbt blangenbi en "gode Diktatur" lever to'n Fründ as de nervige Vulksherrschap, bi de een nienich weet, wat neegst kümmt.

Mit de nieg rutkamen Folterie sünd de USA also nich de eenzigen un ok nich de leegsten. Avers gresig is dat doch, dat een dat al seggen mutt vun en befründtes Land. De Christ Bush. De Demontage vun de letzte Rechtfertigung vun dat, wat "westliche Werte" nöömt woor. Uns egen Lethargie. Wat is noch unmööglich? Bi de CIA — nix. Un bi us? Vun de Irak-Löög bet na dat Folter-Outsourcing is en konsequenter Weg; ok bi us: vun Empörung na Schullertucken. Laat wi us inreden, Folter weer to jichenswat nütt? Tolereert wi Folter? Wohrschu: Wat so anfangt, endt gresig. — Orr endt dat noch lange nich?

25.11.05 ...Kööpnix-Dag

Naaa, hebbt Se al de Wiehnachtsgeschenke tohoop? Wat?! Noch nix? Avers doch tominnst en Liste? Wa lang? Nee, nich in cm — in Euro. Aha. Un freit Se sik al op de prallvullen Binnenstäder, op "Jingle bells" in de Koophüüs un Taschendeeven in Akschoon? — Nee? Fien, denn weest Se konsequent. Morgen (Sünnavend, den 26.11.05) is Kööpnix-Dag, op Hoochdüütsch: Kaufnix-Tag, op Ingelsch: Buy-nothing-day. An düssen vör-adventlichen Konsumterrorinkoopsdag bruukt Se sik nich in de U-Bahnen un Busse drängeln un dör de Läden hetzen. Köfft Se eenfach nix in. Dat is nich unvörstellbar — dat geiht! Se köönt dat ok. Kiekt Se sik tohuus üm: Se hebbt allens al. Allens, wat in de Ladens utstellt warrt, is tokünftige Müll. Geevt Se de Dinge en Weert, indem dat Se nich anduernd wat Niegs köfft!

Verschenkt Se eenfach den Dag. Jichenseen op Ehr lange Geschenk-Liste warrt sik över frein.

6.11.05 ...De Benedetto-Effekt

Wo nöömt wi dat, wenn en Iesenfreter miteens dör en unverwohren Erfolg to everybody's darling mutiert? Ik tendeer dorto, dat "Benedetto-Effekt" to nömen. De Iesenfreter Ratzinger muteer dör de Papstwahl reinweg to en Knuddelpopp, jümmers smüüstern, jümmers to'n Anfaten, un geern! As weer dat de heimliche Droom vun all sin Iesenfreterie west: Eenmaal Papst ween! Eenmaal vun alle leevhatt un knuddelt warrn! — De Droom is erfüllt, un nu kiek em di an. Regelrecht to'n Geneter is he woorn, uns Benedetto, Benedikt de Sössteihnte.

Un hest friedag nacht, sünnavend morgen bi dat Verkünnen vun de lungene Koalischoon Angie sehn? De neoliberale Iesenfretersch Merkel? Hest sehn, woans se lacht? Nich bloots ehr Mundwinkel gaht rop, nee, se treckt ehr lütte Nees reinweg ganz kruus, so lacht se, so freit se sik. Dat Lachen geiht stumm bet in'n Buuk; duller geiht dat bi ehr nich. De ganze Runn, de dor bi de Presskonferenz seet — Merkel, Münte, Platzeck —, de harrn sik alle leev, de wulln sik alle knuddeln. Lütte Witze hebbt se reten. Bloots Stoiber is de Fremdkörper, un he is ja nu bald weg na Bayern un stöört nich mehr.

"Erfolg maakt sexy", seggt de Volksmund. Papst Benedikt will vun "sexy" wiss nix höörn. Man kann dat ween, dat de alle "dat Amt" würklich Spaaß maakt? Minschlich is dat ja, villicht sogoor sympathisch — man tüügt dat vun en rechtes Verständnis vun ehr Amt? Wiss freit sik Merkel un Ratzi, dat de Lü so good vun ehr denkt, dat se ehr mit düsse hogen Opgaven betruut. Man glöövt se, dat se de Opgaav erfüllen köönt? Ja? Hebbt se sik de Opgaav nau ankeken? Hoge Verantwoorten hebben — weltliche orr geistliche — in en Tied, in de de Rieken överall jümmers rieker un aggressiver warrt un de Armen jümmers ärmer un mootloser — is dat wat to'n Lachen? Ik wunner mi.

6.11.05 ...Weltmännerdag...

In Frankrieks Grootstäder is de grote Hund los, sünnerlich bi Nacht. Busse brennt, Ladens gaht twei. De Junglüüd sünd op hunnertachtig. Kann een ja verstahn, nich? Se leevt in Ghettos, de Arbeitslosigkeit is riesig, de Frust ok, un denn hett ehr de Binnenminister Sarkozy noch as "Pack" schamfeert. Se hebbt nix to doon, keen Perspektive, un denn warrt se ok noch beleidigt. Dor müss dat ja krachen! Is even en soschales un ethnisches Probleem. — Hallo? Is dor intelligentes Leven dor buten? Kannst denn mal de Ogen opmaken?

Wenn dat en soschales un ethnisches Problem is, denn müssen de Straten alltieds vull ween vun randaleern Deerns un Fruuns. De hebbt keen Perspektive, de warrt ünnerdrückt un an'n Rand schaven, de warrt beleidigt — vun de Mehrheitsgesellschap un ok noch vun de Keerls ut ehr egen Ümfeld. Un, wat maakt se? Haugt se wat twei? Woneem blifft ehr Randale? Se leevt in desülvigen trostlosen Verhältnisse. Man se warrt nich gewalttätig. O ja, dat is mööglich, friedlich to blieven — ok is düsse Situaschoon! De "randalierenden Jugendlichen" sünd 100% junge Mannslüüd. Hebbt de Fruuns villicht keen Ehr? Hebbt se villicht noog mit to doon, achter de Kulissen den Dreck wegtomaken, de Familien tosamentoholln un den ganzen Kraam nootdürftig an't Lopen to holln?

Nu warrt de Lüüd Jugendzentren buun un Soschaalarbeiters loslaten un veel Geld rinsteken, de wildwoornen Jungs to Räson to bringen. Brukst di even bloots slecht benehmen, denn kriggst milde Gaven un noch Verständnis dorto. — Man lööst warrt dat Problem so nich. Vör jede wirksame Maßnahme steiht de richtige Analyse vun't Problem. Gewalt is jümmers un överall toallereerst en Geslechterproblem, eerst dorna en soschales un ethnisches Problem. Ünner exakt desülvigen Bedingungen warrt Mannslüüd gewalttätig, Fruuns blievt ruhig un hannelt konstruktiv. Lohnt warrt ehr dat nich. Vör dree Daag weer "Weltmännerdag". Hett dor jichenseen vun snackt, dat de Mannslüüd en geslechts-spezifisches Problem mit Gewalt hebbt?

Kann't ween, dat wi Fruuns us jümmers noch to veel gefalln laat?

31.10.05 ...De SPD fiert Halloween

Hüüt is "Halloween", un de SPD maakt mit: Münte smitt hen, un mit Schöder un Münte sitt so nu twee "Untote" an'n Verhannlungsdisch för de Grote Koalischoon — lebennige Lieken, Entmachtete un Trüchtredene. Eentlich dree, denn Stoiber is ja ok en Undoden. Huh, sühst, wa gespenstisch he ut de Wäsch kiekt? De warrt elk Nacht in de bayerische Staatskanzlei ümgahn: "Huhuhuuu, wär ich doch hiergeblieben und nie nach Berlin gegangen!" Rosig, krall un frisch dorgegen lett Angela Merkel, de protestantische Pastersdochter. Se is keen Undode, se höört nich to Halloween, nee, ehr höört de Tokumst to. So orr so, Reform, Reformaschoon orrer Kürbis. Un ok ik maak mi nu ok op de Socken un gah in'n Gottsdeenst to'n Reformaschoonsdag.

Nadrag an'n 1.11.: Nee, de ganze Politik is en eenzig groot Halloween-Grusel, dat di de Hoor tohööcht staht. Stoiber is nich bloots undood, he hett sik dör sin Hoochfrequenz-Wackeln twüschen München un Berlin in en eenzig groot "Ääh" oplööst; dat geistert op de A9 so bi Bayreuth rüm, halve Streck Berlin-München. Blootsugers spijöökt rüm un scheelt op jeden frien Posten. Ok Angela kriggt al so holle Oogen. Sünd amenn alle undood? Huh!

22.10.05 ...Verraden un verköfft

In'n Irak is dat swaar, en richtige Regeern tostann to kriegen, wieldat de enkelten Volksgruppen enanner nich truun köönt. De Kurden truut de Sunniten nich övern Weg, de Schiiten ok nich, un de Sunniten truut överhaupt nüms. Se föhlt sik verraden un verköfft — nich noog Sunniten an de Macht! Dorüm wüllt se ok de niege Verfaten nich. Jaja, de Irak hett dat swaar.

Avers dat is noch gor nix gegen en gewisses Land in Middeleuropa, dat anschienen ok vull vun verfiendte Volksstämme is — nich 3, man glieks 16. Ok hier mutt nu en niege Regeern bildt warrn, un dormit dat ok richtig komplizeert warrt, langt dat hier nich, vun den richtigen Volksstamm to ween: nee, muttst ok noch vun de richtige Partei ween. De Nordrheinwestfalen vun de CDU t.B. sünd ja nu verraden un verköfft. Entrechtet. Utlevert. Keen Ministeramt afkregen in de niege Regeern! De NRW-Baas Rüttgers blöök al: "An wen sollen wir Nordrheinwestfalen uns jetzt wenden? Wer vertritt unsere Interessen? Etwa Steinbrück?" Nee, denn Steinbrück is ja vun de SPD. Nordrheinwestfalen vun de CDU mööt en Nordrheinwestfalen vun de CDU hebben, an den se sik wennen köönt! Truu keeneen, de nich vun din Sipp is! Klaar: Saddam hett ja ok bloots sin Lü ut sin Heimat Tikrit vertruut. Egaal wa dösig de süss weern. De ganzen CDU-Lännerchefs sünd Angela Merkel na düt archaische Motto "Herkamen vör Kompetenz" op de Bude rückt un hebbt opdeelt, wat dor weer. Na dat kann ja en schöne Regeern warrn! Wi sünd so vörsintflutlich un dösig — de Irak kann noch vun Glück seggen, dat he nich Düütschland is.

In trüchbleven Länner so as Düütschland mutt de Macht överall ünner de Gruppen opdeelt warrn, süss gifft dat Börgerkrieg. Dorüm hett de niege Bunnestagspräsident ok en ganzen Zoo vun Viezen kregen, so veel as keen tovöör. Se alle dröfft af un to, wenn de annern de Arm lahm is, de Bunnesdags-Bimmelklock swingen. Dat is sware Arbeit, denn de Klock is vun Messing un weegt tominnst 300 Gramm. Dorüm kriggt nich bloots de Bunnesdagspräsident, sünnern ok elk vun de Viezen extra Geld. Tosättlich to ehr Diäten (denn se sünd ja alle ok Afgeordnete). Un de SPD, de düsse Daag jümmers mal wedder en Troost-Bontje brukt, kriggt een Viez extra. Dat hebbt de twee dicken Partein, CDU un SPD, tohoop al utkungelt. Sä de Norbert Röttgen vun de CDU: "Und wenn uns jetzt einer mit der Kostenfrage kommt, so sage ich: Das sollte die Demokratie uns wert sein!" — De Mann hett recht: Juuch, de Parlamentarier, schull de Demokratie dat wert ween! Woso köönt de ganzen Bunnesdags-Viezepräsidenten den Bimmelklockenjob nich as Ehrenamt maken? Verhungern warrt se süss ja woll nich? — Man nee, wenn Röttgen seggt "dat schull uns dat wert ween", denn meent he uns, de Stüertahler. Wi schallt nich knausern un de Kohle för 20 Viezen röverschuven. De Viezen verzicht op keen Penn.

10.10.05 ...Geiselnahm unblödig toenn gahn

De Geiselnahm in't Kanzleramt woor vunnacht unblödig beendet. Na lange Verhannlungen un de Övergaav vun en horrendes Lösegeld hett de Geiselgangster Gerhard S. (61), bekannt as "Brioni-Gerd", opgeven un dat Kanzleramt, dat he in Geiselhaft nahmen harr, an de rechtmäßige Besittersch Angela M. rutrückt. Achterna sä he, he harr dat allens bloots för sin Familie, de SPD, daan. Se bruuk dat Lösegeld nödig, un dor hett he sik seggt: "Ik opper mi, ik kidnapp dat Amt un laat mi dat düür afköpen." De Familie dankt.

9.10.05 ...Reklaam staats Maut

Nu wüllt se en PKW-Maut inföhren, de ADAC randaleert al dorgegen an. De öffentlichen Kassen sünd even lerrig! Man Maut is doch doof. Intelligente Lösungen gaht mit de Weerschap: mit Reklaam. Ik stell mi dat so vör as bi't Kiekschapp. Dat Bild hier wiest en dreesporige Autobahn na min Plaan:

• Natüürlich gifft dat rechterhand de Spoor för LKW, de mööt ja al Maut betahlen.
• Dorblangen gifft dat en Spoor för den Pöbel, de is gratis. Muttst nix för betahlen. Dorför gifft dat dor anduernd Reklaam op de Fohrbahn. Dat de Reklaam good to lesen is, muttst dor langsam fohren — hööchstens 60 km/h — un mit veel Afstand to'n Vörrermann. Dat is Plicht. Överhalen is verbaden. Bi dat Tempolimit will dat ja sowiso nüms mehr.
• Heel linkerhand löppt de kostenplichtige "Premiere"-Spoor. 'keen "Premiere" abonneert, bruukt keen Reklaam mehr ankieken, man dat kost happig. Dor raast denn de Mercedes-Benze langs, för de op de Pöbel-Spoor Reklaam maakt warrt. De Pöbel op de Reklaam-Spoor kiekt ehr trurig na.

Na, wa is dat? De Staat verdeent denn duppelt: He kasseert för de Reklaam op de Pöbelspoor un för de Maut op de Premiere- un de LKW-Spoor. He kasseert dreeduppelt, wenn dull woorn Pöbel-Fohrers ut ehr Spoor utbrekt un op de Premiere-Spoor wesselt, ahn to betahlen.

Ik weet, wat ik denn do: Ik köp mi'n Johresabo för de Premiere-Spoor, fohr dor rop mit min olen VW Derby Bujohr 83 (mit 4-Gang-Schaltung un Choker, ja, dat is min Auto!) un bummel dor so sutje mit 80 Saken langs. Dat bringt de annern Premiere-Fohrers in Raasch un trööst den Pöbel rechterhand vun mi. Is dat nix?

5.10.05 ...Mit Machismo gegen Arithmetik

Ein Drittel? Nee, ich will mindestens ein Viertel.
Horst Szymaniak (Footballer)

Mit de Arithmetik legen wi ja as lütte Schöler alle mal in'n Kampf, in de Mathestunn. Koppreken, Divideern... Un alle hebbt wi gegen ehr verlaren — denn de Arithmetik winnt jümmers! Gegen de Tallen un ehr Regeln kannst nich strieden, kannst di ehr bloots fögen. Denn löppt dat.

Nich so bi Gerd. He hett den Kampf gegen de Arithmetik noch nich opgeven. He besteiht op, dat sin 4 Bunnesdagssitze weniger "gliek veel" sünd as de vun de Swatten. As weer de Physikerin Merkel de Arithmetik in persona. Un dat is kaptaal, woans de ganze SPD em op düt Himmelfohrtskommando gegen de Tallen un gegen Merkel nakoppheistert. Lemminge? Villicht.

Dat Gewinnen hett Gerd "Acker" Schröder ja sachs op den Footballplatz lehrt; sin Mathe woll ok (vergliek dat Zitat baven; mehr dorvun bi Blutgrätsche). Mit Anstand verleren kann he apensichtlich nich. Man dat kann he, wenn nich bi'n Football, denn doch nu gegen de Arithmetik lehren. Hans Eichel kann em dor Nahülp geven. Tallen kannst nich schöönreken; Tallen blievt ehrlich. Man Gerd will keen Nahülp un keen Ehrlichkeit. Will he Niegwahlen? Denn kunn he so richtig lehren, wat Verleren heet.

Düt Spitakel is ja nu sachs bald vörbi. Nich mehr lang, un de Tallen sett sik dör. Hach, wat schaad; ik kann mi gor nich inkriegen un tell de Daag, de wi dat noch geneten köönt: Utstaffeert mit nix as sin Machismo, ried Don "Gerd" Quichotte gegen de Arithmetik un Angela an. — Stopp. Is't würklich so simpel? Al snackt de Bläder dorvun, dat "de CDU Schröder dat Kanzleramt düür afköpen mutt" — mit Posten un Inhollen. Kann't ween, dat Gerd dor mit Erfolg wat verköfft, wat em gornich tohöört? Also wenn he dat würklich schafft, denn is he de beste Mann för — dat Finanzministerium. "Hütchenspieler" hett Wulff (de vun Neddersassen) Gerd mal nöömt. So een, de ut nix wat maakt — t.B. ut sik sülven orr ut en Kanzleramt, dat he gor nich mehr hett —, so een bruukt de Bunneshuusholl.

En anner Footballwiesheet wiest us, dat ok Footballer de Grundregeln vun de Arithmetik kennt: "Wer mehr Tore schießt, gewinnt. Das ist brutal und kriminell." (Jeff Strasser) Kann't ween, dat Gerd nu, na de Wahl, na den Abpfiff, quasi in de drütte Halvtied de Mannschap in Swatt noch en Gegentor rinballert? Brutal, kriminell — un jichenswie genial.

1.10.05 ...Schöner leven mit Schopenhauer

In den alten Zeiten, wo das Wünschen noch geholfen hat, leev en Philosoph, de heet Schopenhauer. Un de schreev vele schöne Böker, man dat allerschöönste weer "Die Welt als Wille und Vorstellung". Lang Tied, nadem dat de Philosoph doodbleven weer, geev dat mal en eensamen Bunneskanzler, de vun sin Volk verlaten woorn weer. Dor full em dat schöne Book in de Hannen, dat Book ut de Tied, as dat Wünschen noch helpen dä, un süh!, dor sä he sik: Süh! 'keen sin Willn dörsett, kriggt, wat he sik vörstellt. So maak ik dat. — To de Tied woorn ok de Parteien jümmer forscher; dat keem vun de velen Parteienforscher, de ehr in de Medien anfüern dään. De Partei vun den Kanzler sä denn ok ganz forsch: He blifft uns Kanzler, eendoont, wat dat Volk seggt. Kanzler der Herzen sotoseggen. Un dat schöne Book wullen se meist to't Parteiprogramm maken, so good gefull ehr dat. — To de Tied geev dat ok en mächtigen Mann in dat Land achter de Grote See, de weer hart bedrängt vun de böse Hexe Realitäät, wat dat nu Wirbelstörm orr Krieg weer. Dor sä he sik: Versöökt wi dat mal mit de "Welt as Wille un Vorstellung". Un so sä sin Generaal Casey in de Irak-Anhörung opletzt: "De Wille entscheidet! Wi wüllt den Krieg winnen, un dorüm schafft wi dat ok." Basta! sä de mächtige Mann, un dat mutt sachs en Töversprook west ween — denn dor keem opmaal en lütt Deern andanzt mit lange rode Zöpp un Ringelstrümp, de heet Pippi Langstrumpf, un se süng em en Leed vör, dat klüng in sin Ohren so schöön, as he noch nienich een höört harr, un dat güng so: "...wir machen uns die Welt, widdewiddewie sie uns gefällt!" Un dor faat de mächtige Mann un de eensame Bunneskanzler un de erfolglose Generaal un de lustige Deern sik alle bi de Hannen un danzen tosamen vun de Böhn vun de Weltgeschicht — rin in't Riek vun de ewige kindliche Trotzphase. Un wenn se nich to Verstand kamen sünd, denn danzt se dor noch hüüt.

26.9.05 ...De Goden un de Annern

De Demoskopen, de Ümfraag-Lü, weern alle gegen Bundesgerd. Böösaardig wullen se em rünnermaken. So ganz hett dat nich klappt, bloots binah. Gerd denkt dorüm, he hett ehr dat wiest. Ach wat: de ganze Welt hett he dat wiest! Ha! Den ganzen Wahlavend lang leep he rüm as en eenzig groot Ha! op twee Been. ("Je höhger de Apen up'n Boom kladdern, je düütlicher wiesen se ehren Nors", sä en Bekannte dorto.) Alle Ümfragen löögt, seggt Gerd. Vun allens, wat se seggt, is dat Gegendeel wohr. Dorüm is he ja ok Wahlsieger.

Man poor Ümfragen gifft dat, 'neem bi rutkümmt, dat de Düütschen lever Gerd as Angie to'n Kanzler harrn. De löögt natüürlich nich. Düsse Ümfragen, dat sünd de Goden — eensam in en Meer vun Böösaardigkeit. Düsse goden Ümfragen sünd för Gerd dat eentliche Wahlergeevnis. Den Rest brukt wi ja gor nich! De Ümfraag "Gerd schall Kanzler blieven" langt! Se warrt alle poor Johr wedderhaalt — jümmers mit'n schönen Wahlkampf tovöör —, un Gerd kann jümmer schöön Kanzler spelen, in etwa so as Lukaschenko in Wittrussland...

Vunwegen düssen "gefühlten Wahlsieg" stockt nu de ganze Laden. Gerd will un will dor nich vun af. So mööt se denn amenn vun Gerd af. Dat warrt hart för em. Ik meen jümmer noch, he warrt sik to'n Gegenpapst, äh, -kanzler utropen. Man wenn se nich vun em afköönt, wat denn? Niegwahlen? Dat Volk hett sin Menen seggt; de passt nich; nu schall dat bitteschön sin Menen ännern? Will dat Volk dat etwa?
"Niegwahlen! Ja!" seggt min Mama bi jede Gelegenheit.
"Wat denn", segg ik, "wullt du etwa din Stimmverhalten ännern?"
"Ik doch nich", entrüst sik min Mama, för de Wahlen eenzig dorför dor sünd, de CDU an'e Macht to bringen. "Dat schallt de annern maken!"
"Un wenn de ok so denkt as du?"
"Ach wat! De warrt sik schon besinnen!" seggt Mama toversichtlich. (So veel to den kategorischen Imperativ .) — Den sturen Optimismus, dat de Goden (also "wi") sik dörsett, hett Mama in 80 Levensjohr nich verlaren. Woans schall Gerd dat denn beter weten? Bloots sin "Wi" is even en anner.

18.9.05 ...Gorillas & Tiger

Live-Ticker-Atmosphäär op Plattpartu: Jüst heff ik mi de "Elefantenrunn" to de Bunnesdagswahl ankeken un bün ganz verbaast. Schröder sin Kotzbrockigkeit, harr ik vertruut, kunn ok he sülven nich mehr överdrepen. Dat nich —— avers de Mann is wahnsinnig. För dat, wat he dor wiest hett, kunn em jede Psychiater stantepe in'e Slaten Abteilung inwiesen. Dor weer he, grienen, lachen, as besapen, nee: as vulldrunken vun sin 34 Perzent, sin Ego wölv sik reesenhaftig över em as de Rieksdagskuppel, en gewaltige Droge, na de he süchtig is. He reed mit sik alleen, verkünn, he wöör Kanzler blieven — vun welk Land? —, föhl sik verfolgt vun de Medien — as dormalen Helmut Kohl —, un jedeenen Momang heff ik mit rekent, dat he opjumpt, sik op de Bost trummelt as'n Gorilla un den Tarzan-Schrie bölkt — un denn: "Ik bün de Gröttste!" To'n Bangwarrn. De Mann mutt gau aflööst warrn, egaal vun wokeen. As ik an'n 14.8. min Kommentaar schreev, weer mi dat nich würklich klaar, avers de Mann is würklich verrückt; sin Realitätsverlust hett wohraftig Kohl'sche Dimensioon.

Un süss? Hm, vun den Schröder-Schock mal afsehn, hebbt wi en schönes Puzzle tosamenwählt, nich? 10.000 Dele, alle dör'nanner, un dat Besünnere: dat Motiv vun dat Puzzle is unbekannt. Wi mööt nu alle puzzeln un sehn, wat dat Motiv is — wat rutkümmt. (Ik denk ja, en Tiger kümmt rut. De eersten Delen heff ik al in de Hand; mal sehn: passt dat? Ja, en schöne swattgeel strepen Tiger — vör en saftigen grönen Dschungel... op Jamaica...) Selten weer't so intressant in de Welt. Un bi us. Kann Angela den Tiger rieden? Warrt Schröder sik denn as Gegenkanzler utropen (mit Sitz in Avignon, inclusive Unfehlborkeit)? Wokeen vun de all warrt düsse Nacht slapen? Bün ik verrückt, Live-Ticker op Plattpartu to spelen? Sowat höllt graad een Stunn, denn is't överhaalt.

18.9.05 ...Sluss mit lustig!

Sünd Se ok vun de irrige Menen, de Minschen schull een den annern nett ankieken? Sik mit'n lütt Smüüstern begegen? Smüüstert Se dorüm ok faken, ok op Biller? Laat Se dat bloots na! Sluss mit lustig!

Is wohr: Smüüstern is vun nu af verbaden. Op Passfotos. In Grootbritannien un bi us, bald avers sachs överall. Maschiens wüllt keen Smüüstern sehn, de wüllt SeEhr Visage op'n Grund gahn. Passfotos warrt nämli vun nu an vun Maschiens bekeken — "biometrische Daten" nöömt sik dat. De Maschien kiekt eerst dat Foto an un denn Se; un se pröövt, wat Se dat ok sünd. Un dat geiht partu nich, wenn Se smüüstert. Weder op Foto noch in echt dröfft Se smüüstern. Dat heet denn, Se wüllt nich erkannt warrn; un denn sünd Se hööchstwohrschienlich en Terrorist. Grootalarm! Verhaftung! Wenn Se dat Lachen noch nich vergahn is, as Se Ehrn niegen Pass betohlen müßten, denn warrt Se dat Lachen nu vergahn.

Kiekt Se also in Tokumst jümmers verdreetlich ("neutraal" schall dat ween). Wenn Se nich weet, woans sowat utsüht, denkt Se eenfach an dat Bild vun Mohammed Atta mit den toknepen Mund. Sowat hebbt de Maschiens geern. Den Atta wöörn se glatt dörlaten — de smüüstert ja nich. Un wenn Se een vun düsse verdächtig netten un fröhlichen Minschen to sehn kriggt — een vun düsse ewig lächelnden Terroristen — amenn noch op'n Bahnhoff orr op'n Fleegplatz —, denn töövt Se nich, slaat Se Alarm! "Polizei! Hilfe! Da lächelt einer!!" "Achtung Achtung, der Flugplatz wird weiträumig abgesperrt! Lächler, ergeben Sie sich!"

Is't nich schöön? Mit en eenzig Smüüstern kannst den ganzen Apparaat, de för uns "Sekerheit" sorgen schall, schachmatt setten. Dat harr sik de "Lütte Prinz" nich schöner utdenken kunnt. Dat warrt sogoor de verdreetlichen Terroristen á la Atta & Co. noch dat Smüüstern lehren.

15.9.05 ...Not for sale!

Gistern sehg ik en Reklaam-Plakat an de Straat — för en Handy-Flatrate (d.h. snacken bet to'n Ümfalln, ok wenn een nix to seggen hett, för'n Pauschalpries). De Mann op dat Plakat höll sin Handy hooch, keek glücklich un sä: "Das ist Redefreiheit!" Ik much dat nich glöven. Weer avers so.

Wi sünd an wennt, dat Frieheit Zigaretten sünd orr Autos. Redefrieheit is nu even en Handytarif. Allens is to köpen. Alle Werte sünd ökonoomsche Werte. Ok in den Wahlkampf geiht dat bloots üm Mark un Penn — pardon, Euro un Cent. Hebbt Se een vun de Sendungen ankeken, bi de de Kandidaten enkelt sik Börgerfragen stelln mööt? Merkel stunn dor, un de Börgers fraagt: "Wenn ich soundso viel verdiene und das und das mache, steh ich dann bei Ihnen besser da als bei Schröder?" Schröder stunn dor, un de Börgers fraagt: "Wenn mein Betrieb soundso viel Umsatz macht und ich das und das tue, wie viel muss ich..." Beed, Schröder un Merkel, weern allerbest träneert un slöön sik good. Man is dat Politik?

Ik tööv up Themen, bi de dat nich üm Geld geiht. Man nee: Wenn de Börgers nich sülven na fraagt, bringt de Kandidat/in unweigerlich de Reed op de Kosten. Allens hett Kosten. Klaar — Frieheit kost so veel as en Packung Zigaretten ("Wenn Sie gewählt werden, werden Sie die Tabaksteuer...?"), Redefrieheit kost en Handytarif. Gerechtigkeit is — na wat wull? — klaar, Verteilungsgerechtigkeit. Geldverdelen! — Man nu! Dor is en Mann mit en Visioon! En Visioon, dat heet: en betere, glückliche, freedvulle Welt, en apene Gesellschap in Frieheit, en feernes Teel för de Tokumst, dat di Knööv gifft för de Gegenwart. Wokeen is de Mann mit de Visioon? He heet Paul Kirchhof. Un sin Visioon is —— en Eenheitsstüür. Liek as de Handy-Flatrate. 25% — dat is sin Visioon, sin betere Welt, sin Frieheit un Glück. Sünd ok de Visionen al so verkamen?!

Ik bün nich riek. Man ik bün liekers nich to köpen. Un allens dat lett, as wull de Politik nix anners as Wähler inköpen. As güng dat ok. As maak jedeen Wähler/sche en Reken op mit Plus un Minus, un ünnern Strich steiht denn de Naam vun en Partei, de se wählt. As weer alle Vördeel Geldvördeel, all Gewinn Geldgewinn, all Vernunft ökonoomsche Vernunft. Ahn mi. Bet dat ik so wied dalkaam — bet ünnern Strich —, mutt mi dat gewaltig dreckiger gahn. Much op alle uns Grundweerte, op Frieheit, Gliekheit un Süsterlichkeit en Priesschild pappen, much op jedeenen Wähler en Schild "To köpen — for sale!" prangen: op mi nich. Marlou is not for sale. Schrifft juuch dat achter de Lepel.