Dei Börgerrat

vun Behrend Böckmann

As Rod-Gäl-Gräun keem anne Macht,
hemm's an 'n Börgerrat all dacht —
'n Börgerrat för dit un dat,
för Äten, Klima, süss noch wat.
Un mit eins sünd's ganz von Sinnen,
denn gaude Frünn, dei sall'n bestimmen,
wat dei Düütsch up jeden Fall
leiwers doch nich äten sall,
dat hei nicks von'n Höker nimmt,
wat sienen Lief nich gaut bekümmt.
Un so gifft dat inne Tat
von nu an einen Börgerrat,
wo hunnertsössdig utsöcht Lüd
ünnersäuken, wat bedüd
för dei Börger un den Hannel
dat uns "Äten (is) in'n Wannel"!

Ok wenn man dat nich glöben mach:
dei Rat gifft Rat den Bunnesdach,
dormit hei denn beschluten kann,
woans man kümmt an Minschen ran,
dat's wedder Mell un Netteln äten,
wat süss hemm' dei Schwien giern fräten.

Dat Schwien frät nich in jeden Fall
Mell un Netteln. Mennigmal
warrt so'n Schwien sülvst Äten sien —
sünners Marzipanen-Schwien!
Dei Börgerrat findt Marzipan
ganz ungesund, ofschoonst vegaan!

Experten sall'n denn Rat nu raden
aftauwiesen Karbonaden,
dormit hei wieder raden kann
dei Ätenwenn', sei kümmt voran.
Un wat die Rat dortau deit meinen,
sall Özdemir as Rat nu deinen,
dormit denn jeder Börger weit,
woans dei Öcke-Schwien dat geiht,
dat dei Schwien sünd würklich froh,
wenn sei liggen up Håwerstroh.
Allens sall nu Bio sien —
wi bruken blot noch Bio-Schwien.

Gröönkohl gellt as leev un weert
liekerwies bi Minsch un Deert!

Woans sall sik dei Minsch ernähren,
wat süll hei leiwers nich vertehren
un süll dat Läben wiedergåhn,
denn vegetarisch un vegan.
Kein Minsch wür mihr Fleisch verlangen,
sülfst 'n Gockel möt nich bangen,
dat man em dat Läben nimmt
un hei in den Kåkpott kümmt.

Väl Fleisch måkt den Buk schön rund,
doch is ok Zucker ungesund.
Männig Minschen geiht't nich gaut,
wenn tauväl Zucker in sien Blaut,
un tau den Zucker kümmt ganz gau
hoger Blautdruck noch hentau.

Dormit Minschen nich vergäten,
sik tau köpen gaudet Äten,
wohrschucht all ein Nutri-Score:
Rood is lech bi disse Wor,
leiwers gräun up jeden Fall,
wenn't dei Gesundheit deinen sall.
Fief Ampel-Farwen wiesen an,
wat 'n würklich köpen kann,
'n gäle Farf dei Hiring kreech,
dei inne Truh bi'n Höker leech.
Gräun is Honnig von will' Bienen,
ok Eierrühr ut Säutlupinen,
gräuner Tofu, Bohnenquark
måkt sülfst dei Veganer stark,
doch man süll nie nich vergäten:
Ok Schwien un Hauhn daun Soja fräten.
Un ward dei Rat denn dorhen kåmen,
dat Planten ward dat Läben nåhmen,
denn raden's tau dei Wådersupp,
dei Kinner kåken för dei Pupp.

In den Poppen-Koopmannsladen
wier dat Äten wohlgeraden,
oewer kiek rechts baven! Dor
nimmst ein Maggi-Buddel wohr...

Ok sall dei Rat an Lüd sik wennen,
dat s' ehr Äten nich verschwennen,
dat man Wöddeln äten kann,
wenn noch bäten Ierd is dran,
un 'n Appel nich ganz rund
is liekers gaut un höllt gesund.

Wohrschuu: Brickt ein Worm sik Bahn,
is dei Appel nich vegan!

Doch dor dei Rat kein Parlement,
man sien Infäll Vörschlääch nennt,
un wat so'n Rat deit gaut befinnen,
möt dei Börger denn bestimmen,
un denn gifft dat in'n Bunnesdach
dortau ein Gesetzvörlach,
un dörch't Gesetz dei Deputierten
schützen't Läben von uns Dierten,
schrieben vör up jeden Fall,
wat dei Minsch nu äten sall,
möt hei vegetarisch läben
orrer gor vegan sik gäben.

Ik bün vegan, Fleesch gifft't nich mehr!
Mien Wampe pleeg ik bloots mit Beer!

Dei Börgerrat ward dat Volk råden,
aftauseihn von Karbonåden,
nich nå Fischsemmel tau fåten,
Spickaal un Bückel liggen låten,
nicks köpen anne Happenbaud,
ok wenn't dor schmeckt besonners gaut,
låt dei dei Bratwust Bratwust sien!
Un sticht di inne Näs ganz fien
'n güllen Broiler-Brådenduft,
denn gåh wieder, schnapp nå Luft.

Ratlos schürt dei Rat dat Füer,
denn gauder Rat is ümmer düer!