"Metten hemm ein phallische Foorm! Dat is sexistisch! Wi Häuhner freet af nu kein Metten miehr!"

Dat Gliekstellungshauhn

vun Behrend Böckmann

Up'n Wiemen gifft dat väl tau gackern. Dor hett sik doch 'n Håhn an Henn' ranmåkt, dei noch gor nich weit, woans sik dat anfäuhlt, wenn 'n Ei ut'n Noors flutscht. Dat hollen dei ölleren Häuhner för 'n sexuelle Belästigung von 'n Junghauhn, denn dat, wat dat bi Minschen gifft, kann't ja ok bi dei Dierten gäben. Dorbi nähmen's sik dei Gräunen taun Ogenspeigel; dei Italjener-Gockel höllt dat mit Robert Habeck, dat sülwerhalsig Wyandottenhauhn, dat sik besonners gaut upplustern kann, höllt dat mit Ricarda Lang, un dei twei Auracanahäuhner, dei Eier mit 'n gräune Schell leggen, hollen sik för Fründinnen von Annalena Baerbock.

So as dei Gräunen ehr Wählers verkloren, dat's keinen Schritt taurüch gåhn un von Grund up „feministisch“, bliewen, wählen dei Hennen nu ehr Gliekstellungshauhn, un dei Wåhl föllt up 'n witte Leghorn-Henn' inne Mauser. Disse gifft an, dat sei dat mit dei kinnerlose Claudia Roth höllt, denn sei hett kein Lust tau glucken un dachlang up'n Nest tau sitten, bet denn dei Küken schlüppen. Un sei måkt all 'n Programm, woans Gliekstellung ünner Beachtung von sexuelle Updringlichkeiten, den Ümgang mit #MeToo-Anschülligungen un dat nödige Gennergekåkel in un up'n Häuhnerhoff utseihn künn, dormit dei Gockels sik taurüchnähmen un nich mihr ut Dreistigkeit ehr krummen Eier inne Nester schieten un dornå de Henn' so achteran jachern, dat ehr nicks anners blifft as dat s' sik dukert, dei Flüchten hängen un den Gockel upsitten lött.

Ne, dor sünd dei gräunen minschlichen Frünn' wieder, sei strieden för 'n oortgerechte Uptocht von Dierten un hollen dat sogor för mœglich, dat Dierten ok as Minschen fäuhlen un denken kœnen. Dat gifft dei Hennen (latiensch gallinae) dei Kraft — so as dei Frugens (latiensch feminae) ehr feministisch Bewägung billen —, von nu an ehr eigen gallinistisch Bewägung tau grünnen. Gallinismus – dat is dat Sähnen nå Gliekstellung ünner Hennen, sik von'n Gockel lostauseggen un dorför tau sorgen, dat dei olle Minschenschnack „'N gauder Håhn ward nie nich fett!“ nich wieder dei Runn' måkt, dat sik dei Hennen, so as dei Minsch dat secht, nich wiederhen „prostituieren“ möten un dei Gockel von nu an as arbeitsloser fetter Håhn in 'n Kåkpott lannt un 'n gaude Häuhnersupp' afgifft.

"Verdammi! Suppe statts Sex! Schiet Gallinismus!"

Un dei gallinistischen Henn*innen sünd sik eins, dat's bi „Henn*innen forschen“ mit ehr Projekt „vegane Eier ut 'n Henn*ninnennoors“ ganz vörn lannen willen.