April, April...

vun Behrend Böckmann

Dei franzöösche König "Henri quatre" wier bannig achter dei Fruens her. Den Narrenhoot dröch hei normalerwies nich

Al in't Olle Rom geef dat Dåch, an dei allerlei Spijök dräben wür, un dor sünd ok dei Wöddeln för "April, April" tau säuken. Anner willen weiten, dat 1530 up'n Augsbörger Rieksdach dat Münzwäsen nie rägelt warden süll, un as dei Münzdach denn an'n 1. April nich afhollen wür, hett 'n dei Geldspekulanten mit "April, April!" up'n Arm nåhmen. Vertellt ward ok, dat dei franzöösch König Heinrich IV. an einen 1. April 'n Diern von 16 Johr dei Bidd nich afschlöch, mit em 'n Nacht tau verbringen. Un as dat denn so wiet wier, stünn nich dei lütte Diern, sonnern dei ganze Hoffstaat mit sien Fru Maria von Medici vör em. Dor künn man denn ok von "April, April!" snacken!

Noch anner gåhn dorvon ut, dat Judas Iskariot — dei Verräder ünner Jesus sien 12 Jüngers — an einen 1. April up'e Welt keem un sik denn ok an einen 1. April upknüppt hett un ut dissen Grund dei 1. April 'n Unglücksdach is. Hentau kümmt noch, dat an dissen Dach ok noch Satan ut'n Häben inne Höll' stött't wür. Tjaha, dormålen hett jichensein al tämlich nipp in'n Kalenner mitschräben!

Nich tauletzt möt ok dei Wäderrägel "April, April måkt, wat hei will" herhollen. Un inne Wirtschaft un Poletik is dat nich anners. Wenn du denkst, dat du di för fief Euros wat leisten kannst, denn œwerrascht di "April, April" ok ümmer wedder, denn för'n Bratwust in'n Semmel orrer 'n Fischsemmel möst du bet tau fief Euros in dien Kniep säuken. Gor nich taurecht kümmst du an'n Timmendörper Strand, wo 'n Currywust mit Toffelsticken bet au 16,00 € kosten kann, man taun Oktoberfest up'e Wiesn tau München för'n Maß Bier twüschen 13,60 un 15,30 € un för 'n Liter Wåder bet tau elben Euros henblädern möt. Un bi 50 Euros för twei Pund Spickaal heit dat ok "April, April", denn dei kost't nu all bet tau 7,5 0 € för 100 g.

Ok inne Poletik: wieder nix as "April, April!" Wat hett dat Wåhlkvolk up dei Gräunen as Ümweltredder un Frädensapostel sett't — un vonne Oppositschon inne Regierung wesselt, wür dat düütsche Volk von den Dichter un Denker Robert Habeck un Panzer-Toni un dei gräune Girl-Gang Annalena, Katharina, Claudia, Britta u.a. anschäten. Wat sünd dei Gräunen inne rod-gräun-gäle Ampel mit eins ganz wild up Uprüstung wäst, dormit's den utmåkten Fiend Putin so inne Predulch bringen, dat em dei Lust vergeiht, uns wat antaudaun. Putin kricht meddewiel för allens dei Schuld. Wenn 'n Klappräkner in'n Ministerium nich so mitspält, as hei dat süll, hett Putin em "hackt", orrer em ward nåsecht, dat hei wat utspioniert, wenn 'n Düütscher mit Drohnen Rehkitzen vör'n Dod redden will. Un op kein Fall dröf man versäuken, mit Putin tau verhanneln, denn Verhannlungen sünd al ein Aart Sieg för Putin; båventau hett Putin magische Kräft, dei den Verhannelnspartner willenlos måken, meist so as dei Slang Ka in den Disney-Film "Dschungelbook": wenn du mit ehr schnackst, hest du al verlåren. Hei is di över, hei måkt di tau'n Zombie. Dat sühst ja opstunns an Trump: Putin spält mit em na Lust un Luun, un Trump kann bloots noch "Jaaaa" lallen. — Nee, Verhanneln is gefährlich! Leiwer œwerlött man den Fründ Wolodymyr Selenskiy ümmer mihr Waffen un Munitschon, dormit dei Krieg — un dormit dat Starven op beid Sieden — noch bäten duert un wi nadenken koenen. Villicht fallt uns ja wat Klaukes in.

Sünd wi so klauke Narrn as hei ...?

An't Grundgesetz vörbi, gifft dat ünner Kanzler Olaf Scholz taun iersten Mål 'n 100-Milljarden-Sonnervermögen för dei Uprüstung, den so nöömten "Wumms". Dei gäle Finanzer Lindner wull dei Schullenbrems nich wieder lockern, dat gifft Krach, dei Ampel is kaputt un Niewåhlen stünnen in't Hus. Un dei Schwatten widdern Morgenluft: Merz is dei Kannedat un gifft tau verståhn, dat hei nix mit dei Gräunen an'n Haut hett un dat hei dei Schullebrems nich upweiken will. Man glöwt em — un doch is hei nich dei ganz grote Sieger. Wat daun? Man besinnt sik up Groko-Tieden, måkt 'n Kihrtwenn von 180 Gråd, ward dei Roden as dei Sœch dörch't Dörp drieben, Schullenbrems ade, klüngelt mit dei Gräunen un pietscht mit 'n ollen Bundsdach 500 Milljarden Sonnervermögen för dei Rüstung un 500 Milljarden för dei Infrastruktur dörch, dormit dei Panzer denn ok rullen kœnen. Dat is so väl "Wumms", dat uns da üm dei Ohren flücht, dat klingt al as op ein Schlachtfeld in dei Ukrain', wenn links un rechts dei russ'schen Raketen un Granaten explodeern. Wumms! Wumms! Wummswumms wumms!

So ward nu ut dei einstig Groko dei Schuko (Schullenkoalitschon) un dat Wåhlvolk is wedder anschäten, äben wedder "April, April!" Un so måkt "April, April" allens, dat dat Wåhlvolk bald keineinen vonne Midd mihr trugen deit un so sachtens mit "April, April!" dei Ränner tau dei niege Midd måkt. Naklår koenen dei Extreme nienich ein gaude Midd sien, so wenig as dei Fautborrn tau'n Dack doecht. Naklår heit dat, den Buck tau'n Goorner tau måken. Oewer dat is ja hüüt dei Normålfall.