vun Behrend Böckmann

Männigein besinnt sik noch an denn Dach, as hei 2002 taun iersten Mål Euros inne Hänn' kreech orrer an'n 1.Heumånd (Juli) 1990, as dei "DDR-Mark" gägen dei "D-Mark" tuuscht wür. In Ost un West prosperiert dat Läben un von'n Inflatschon is' n Tietlang nicks tau marken, doch dei blaumigen Landschaften, dei Kohl den Osten verspråken harr, dei låten bet hüt up sik täuwen — un dor, wo dat bläuht, hett sik ofteneins 'n Helper ut'n Westen mit Hülp von Föddermiddel gaut inricht't. Un mœglich wür dat dörch denn Fong "Düütsche Einheit", 'n Sonnervermœgen in Milljardenhööchde, dat dei Bundsrepublik insetten däd, üm dei ostdüütschen Kommunen mit dat nödige Geld aftausäkern un so an'n Lopen tau hollen. Un ümmer, wenn Not an'n Mann is, denn möt 'n Sonnervermögen her, ok wenn't nich ümmer so näumt ward.

Ünnern Reddungsschirm lett sik good gendern!

As 2008 dörch dei Lehman-Pleite dei Finanzwelt in't Schliddern keem, dor wür tau dei Bankenreddung 'n Reddungsschirm mit 'n Sonnervermœgen upspannt, dat den Bundshushalt œwersteech. Dormit sik in'n Hushalt Utgåwen un Innåhmen dei Waach hollen, keem af 2011 dei Schullenfränåsch (Schuldenbremse) in't Späl. Un ümmer, wenn't nich in'n Hushalt ünnertaubringen is orrer ut'n Hushalt tau nähmen is, denn möt 'n Sonnervermœgen her, dat denn ok mål Reddungsschirm, Afwihrschirm orrer Stabilitätsfong heiten deit. As dat denn taun Regierungswessel keem un "Schwatt-Rod" dörch "Rod-Gäl-Gräun" aflööst wür, versprök dit niege Triumvirat "Mihr Fortschritt wågen". Un Fortschritt süll heiten: "Niege Bessen fägen gaut!" Niege Energien dörch Wind un Sünn, Gennern inne Kark un Queere in'n Bundsdach, Joe Biden tauplinken un Putin strafen, man stråkt dei Aktivisten von "Extinction Rebellion" äbenso as dei "Maidan-Aktivisten" ... Doch denn måkt Putin 'n Strich dörch dei Fortschrittsräknung, hei beginnt sien "militärisch Operatschon" gägen dei Ukrain', un dei ewig Kolle Krieg lött nå mihr as 75 Johr Fräden dei Alarmklocken in Düütschland beiern.

Un so kümmt allens anners, dei Kanzler schnackt dütmal nich von Wenn', sünnern von'n Tiedenwenn', un irgenwie möt 'n Putin as EU- un NATO-Maat doch bikåmen, ok wenn man sülben in't Knei scheiten deit. Un üm nu nich tauväl Weihdåch tau hemm', ward dei Geldmaschin' anschmäten, dei nu dei Kanzlerwihrung "Wumms" drucken deit. Ein Wumms, dat sünd 100 Milljarden Euros Sonnervermœgen för dei Bundswihr, un Dubbelwumms, dat sünd 200 Milljarden Sonnervermœgen för den Afwihrschirm, üm dei Energiekosten un dei Inflatschon aftaufeddern.

Ok wenn dei ein un anner denkt, dat 'n Wumms doch blot Schullen sünd, denn bedenkt hei nich, dat son'n Wumms as Währung den Rubel wiet vörwech is un den Despoten in'n Kreml verklort, dat Düütschland sik nich ünnerkriegen lött. Wecker an'n Wumms glöwt, dei höllt tau den Präsidenten Selenskyj, Ex-Botschafter Melnik un Burmeister Klitschko as dei ukrainschen Engel, dei nå ümmer mihr Waffen schriegen, un stellen Lüd as Alice Schwarzer, Precht, Bohlen, Kretschmer u.a., dei gägen dei Scheiterie un för't Verhanneln sünd, mit Hülp vonne Medien inne rechte Eck un jågen s' taun Düwel.

Man villicht is ok all dei Dreier-Wumms in Updrach gäben, dormit dat Licht nich ganz utgeiht un dei Geltomat wiederhen dei nödigen Schiens utgäben kann.