OSIRIS-REx maokt sick praot för dei Trügg-Reise nao dei Ern

van Ludgerd Lüske

In'n Mai 2021 maokt sick OSIRIS-REx praot för dei Trügg-Reise nao dei Ern.

Dit Bild wiest dei OSIRIS-REx-Sonde, dei den Asteroid Bennu verlaoten dait. Dei tweijöhrige Trügg-Reise nao dei Ern kann nu losgaohn.

Bild-Daoten: NASA/Goddard/University of Arizona

OSIRIS-REx ist dei eierste NASA-Mission, dei einen erdnaohen Asteroid besöch, dei Bäöwersiete ünnerseuken dait un eine Probe upnimmp, dei nao dei Ern trügge kummp.

Nömdaogs bi'n Uhr off veier (EDT) krigg dei OSIRIS-REx-Kontroll-Ruum in Littleton, Colorado, eine Naoricht, dat dei Ruumsonde 16 Minuten eiher ehr Hauptstraohl-Ruder zündet har. So kann dei sick ut den Asteroid-Ümloop rutwarken. Nao 7 Minuten Brennduur van dei Driew-Warke kann dei lange Trügg-Reise van OSIRIS-REx mit 60 Gramm Asteroid-Materiaol an Bord losgaohn. Dei Affloop van dei Trügg-Reise van OSIRIS-REx is dat üppste Wark van dei Sonde nao dei Ankunft bi Bennu in dat Johr 2018. Dat Ruumfohrtüg-Straohl-Driew-Wark mutt dei Sonden-Geschwinnigkeit üm 958 Kilometer in'ne Stünn ännern. So werd OSIRIS-REx den Erd-Ümloop üm dei Sünne draopen un an'n 24. September 2023 dei Materiaol-Probe äöwer den Utah-Test- un Manöverplatz affschmieten.

Schemateiknen: Ludgerd Lüske

Dei OSIRIS-REx-Mission van dei NASA hätt den Ruumsonden-Probensammel-Kopp in ehre Proben-Trüggbring-Kapsel (SRC) settet. Dat eierste Bild wiest den Kollektor-Kopp, dei äöwer dei Kapsel schwäwt, naodem ein Arm üm in dei passen Laoge för dei Upnaohme bewägt hätt. Dat tweide Bild wiest den Kollektor-Kopp, faste maokt an den Upnaohme-Kring in dat SRC. Beide Bilder nöhm dei StowCam-Kamera up.

Hier binn stekt dei kostboorn 60 Gramm! Bild-Daoten: NASA. Klick up tau'n Vergröttern!

Mehr Infos äöwer dei Technik tau'n Probenähmen gifft't ünner düt Link.

Tschüß Bennu! Bild-Daoten: NASA

Et giff kienen lieken Weg trügge nao dei Ern. OSIRIS-REx reist dorhen, wo dei Ern läöter vörbi flügg. Dei Ruumsonde werd 2,3 Milliarden Kilometer in twei Sünnen-Ümloop-Baohnen fleigen. So kann dei Sonde dei Ern inhaolen.

OSIRIS-REx schall dei gröttste Probe bi eine NASA-Mission nao dei Apollo-Missionen mit Maond-Stein-Wark trügge bringen. Dei Forschkers willt dei Probe ünnerseuken. So käönt dei mehr äöwer dat Entstaohn van use Sünnensystem un dat Entwickeln van den bewaohnten Erd-Planet rutfinnen. Nao dat Inhaolen werd dei Kapsel nao dei Spieker-Anlaoge in dat Johnson Ruumfohrt-Zentrum van dei NASA bröcht. Dor werd dei Probe rutnaohmen un deils weltwiet an Laboratorien verdeilt. Dei NASA werd 75 % van dei kostboorn 60 Gramm för taukaomen Generationen verwohrn. Dei käönt läöter dit Wark mit noch nich bekannte Technologien studeiern.

Bild-Daoten: NASA

Dit Mosaikbild van den Asteroid Bennu bestaiht ut 12 PolyCam-Biller, dei dei OSIRIS-REx-Sonde an'n 2. Dezember 2018 mit einen Affstand van 24 km upnöhm. Mehr hier: NASA-Video.

Dit Bild van dei OSIRIS-REx-Proben-Trüggbring-Kapsel knipsde in'n März 2017 dei StowCam-Imager van dei Ruumsonde.

Dei Proben-Trüggbring-Kapsel, mit einen Deckel affschlaoten.
Bloots 60 Gramm sünd dor binn! Ein wohrhaft düres Materiaol.
Bild-Daoten: NASA

Dei Bennu-Lüe wüllt osiris-surfen. Klick up tau'n Vergröttern!

Dat gifft aover mennig Probleme. Klick up tau'n Vergröttern!