OSIRIS-REx faotet Proben up Bennu

van Ludgerd Lüske

Mit OSIRIS-REx will man rutfinnen, woher wi Menschken kaomt un wat use Rulle in dei Welt is. Asteroide bestaoht ut äöwer bläben Schutt bi dat Entstaohn van dat Sünnensystem. Dei käönt Künne bringen tau dei Geschichte van dei Sünne un dei ümloopen Planeten.

TAGSAM heit dei Probennähmer-Gelenkarm van OSIRIS-REx, dei an't End einen Upnaohme-Kopp dräg. Bi dei Up-un-Aff-Aktion langt dei Arm nao den Bodden van Bennu. Dei Ruumschipp-Impuls drückt den Upnaohme-Kopp dorbi rund fief Sekunnen lang up den Asteroid-Bodden, jüst lange naug för ein Probenähmen. Bi den Bodden-Kontakt blaost Stickstoffgas binnsiete van den Kopp up den Bodden. Stoff un lüttke Steinkes werd hoch puußt. An dei Kante van den Kopp werd dit wegfleigen Wark in eine Kring-Kaomer upfangen.

TAGSAM werd in dei Warkstäe testet. Bild-Daoten: NASA

Bild-Daoten: Ludgerd Lüske nao NASA (ännert)

Dat Bild rechts wieset den Upnaohme-Kopp kort äöwer den Bennu-Bodden. Dat Bild ünnen wieset den Boddenkontakt, dorünner is dei Affloop mit dat Hoochpuußen in Schemateiknen. Dei NASA hett ein Video dortau online stellt.

Upnaohme-Kopp up den Bennu-Bodden. Bild-Daoten: Ludgerd Lüske nao NASA (ännert)

Upnaohme-Kopp kort up den Bennu-Bodden, Stickstoffgas werd inleitet. Bild-Daoten: Ludgerd Lüske

Upnaohme-Kopp up den Bennu-Bodden, Stickstoffgas dröpp den Bodden. Bild-Daoten: Ludgerd Lüske

Upnaohme-Kopp up den Bennu-Bodden, Stickstoffgas driff Stoff un lüttke Steinkes in dei Kring-Kaomer. Bild-Daoten: Ludgerd Lüske

Dei Ruumsonde is bold so grot as ein PKW (middelgrot). Bild-Daoten: NASA (ännert)

Hier giff et ok ein OSIRIS-REx-Fleigbaohn-Video van dei NASA.

OSIRIS-REx reist nao Bennu. Dat is ein Asteroid mit väl Käöhlenstoff un Regolith. Dorin is dei Geschichte van use Sünnensystem fasteschräben. Bennu kann olle Vörgängers för dei Läbensmoleküle drägen, dei uck in dei Ozeane van dei Eern vörkaomt. Bennu bring aower uck eine Gefohr för us mit. Disse Asteroid werd mit eine hoge Wohrschienlickkeit an't End van dat 22. Johrhunnert naohe an dei Eern ran kaomen. Wecker weit, wat denn passeiert?

OSIRIS-REx faotet dei physikaolischken un chemischken Eigenschkupen van Bennu. Dei kunnden bi dei Affwehr van einen Asteroiden-Inschlag eine grotet Bedüden häbben.

Sükke Asteroiden as Bennu drägt faoken Waoter, orgaonischke Stoffe un Eddelmetalle. Vellicht bringt disse Stoffe in dei Taukunft dat Forschken mit Roboters un Ruumfohrtüge mit Mannschkup so orig in'n Gang.

Dei Bennu-Lüe seht dat nich gerne. Klick up tau'n Vergröttern!