Dei Biller käönt Se per Klick vergröttern!

Mars 2020 is eine Mars-Mission van dat NASA-Mars-Forschkungs-Programm mit dat Utduur-Fohrtüg und dei Helikopterdrohne "Klaukheit". In'n Juli 2020 üm 11:50 Uhr (UTC) güng disse Reise los. An'n 18. Februar sünd dei beiden Apparaote in den Jezero-Kraoter up den Mars landet. Dat spannen Video van dei Landung is hier tau seihn.

Klaukheit flügg tau'n eiersten Maol in dei Marsluft - 19. Apr 2021
Bild-Daoten: NASA; süh: NASA-Klaukheit-Video und: Video äöwer Klaukheit

An'n 19. April 2021 flög dei Mars-Helikopter "Klaukheit" as eierste Fleiger in dei Geschichte mit eigen Kraft un eigen Stüerung up einen annern Planet. Äöwer den Mars-Trecker Utduur schickde dei Helikopter siene Daoten an dei NASA. So kunn dei Klaukheit-Mannschkup van dat Jet Propulsion Laboratory (JPL) in Südkalifornien bekannt gäben, dat dei Apparaot mit Erfolg flaogen is.

Dei Helikopter mit Solarbedriew flög tau'n eiersten Maol üm 12:34 Uhr (EDT) in dei Mars-Luft. Nao den Hööchten-Mäter steeg Klaukheit up dei vörschräben Hööchte van drei Meter un schwäwde dor 30 Sekunnen lang stabil. Dornao landte dei Fleiger wedder up den Mars-Bodden; dat heile Wark duurde nao dat Fleig-Protokoll 39,1 Sekunnen.

NASA-JPL-Kontroll-Ruum. Bild-Daoten: NASA-JPL

Disse eierste Probeflug van "Klaukheit" wörd autonom van dat Bordleit-, Navigation- un Stüersystem stüert. Dei JPL-Mannschkup har dortau dei nödigen Algorithmen entwickelt.
Dei Daoten loopet hunnerte Millionen Meilen äöwer dat NASA Deep Space Network (DSN) un dei ümloopen Mars-Satelliten nao den Helikopter up den Mars hen un trügge. So kann man "Klaukheit" nich mit einen Joystick direkt stüern un den Flug uck nich in Echt-Tied beläwen.

Dei NASA geef disse Stäe einen besünnern Naomen:
Nu, 117 Johre nao den Erstflug van dei Wright-Bräuers up usen Planet, flög dei Klaukheit-Helikopter van dei NASA dit wunnerbore Kunstwark up eine annere Welt. Wenn disse beiden Aktionen in dei Luftgeschichte dör disse Tied un 173 Millionen Meilen in den Weltruum uteinanner ligget, hört dei doch alltied tausaome. As Ehre för dei beiden finnigen Radmaokers ut Dayton schall disse eierste van väle annere Flugplätze up annere Welten nu Wright Brothers Field heiten. Dat is ein Anerkennen för dei klauken Erfinners.

Bi dat Tausaomesetten mutt aals nau passen. Bild-Daoten: NASA

Dei 1,8 kg schwore Rotorfleiger drägg blots eine Kamera, aower kiene Instrumente. Hei schall rutfinnen, off man up den Mars uck mit Luft-Fohrtüge forschken kann. Bi dissen eiersten Flug wüss man väle Saoken nich. Dei Mars hätt eine minnere Schworkraft, den darden Deil van dei Erd-Schworkraft. Dei Mars-Atmoshäre hätt äöwer den Bodden blots 1% Druck in'n Vergliek tau dei Erd-Atmosphäre. Dat bedüüt, et giff blots minne Luft-Moleküle, mit dei dei 1,2 Meter breien Rotor-Blöre den Klaukheit-Fleiger hochdriewen könnt. Dei Helikopter bestaiht deils ut Hannels-Deile — Smartphone-Deile — un uck ut heil neie Komponenten. Dit Tausaome-Spill werd nu tau'n eiersten Maol in den deipen Weltruum utprobeiert.

Dat Utduur-Fohrtüg stünd bi den Helikopter-Start 64,3 Meter besiet bi Van Zyl Overlook un warkde as Kommunikationsrelais tüschken Klaukheit un dei Ern. Dorbi nöhm Utduur mit siene Kameras den Fleig-Bedriew up. Dei Biller van Mastcam-Z- und Navcam-Imagers läwert noch Extrao-Daoten äöwer den Flug van "Klaukheit".

Dei Mars-Lüe laotet nix ümkaomen, sei recycelt usen Kraom!