Dat Kruut för'n Oostermaand:

Meerzwiebel

vun Anke Nissen

Bulbus Scillae resens
Urginia maritima (Familie Liliaceae/Liliengewächse)

Anner Namen:

 

Frische Meerzwiebel, Mäusezwiebel

Sammelt warrt:

Zibbel

Wat da binn is:
  • ätherisch Öl,
  • Glykoside,
  • Bitterstoff,
  • Sliem,
  • Kohlehydrate

Warrt bruukt:

 

Mittel gegen Rotten un Müüs

Wi hebbt en groot Vagelhuus, dat wi "Vagelvilla" nöömt. Dit Johr warrt dat wedder veel besöcht. Un wi freut uns an de lütten un groten Gäst mit Flünken. Man denn sehg ik an enen Dag ünner de Vagelvilla en gries Deert mit enen langen, eklig Steert. En Rott! Mien Mann meen:
"Laat ehr freten. Se hett bi disse Ies-Küll doch ok Hunger. Un se will doch ok leven!"
Phhh ———

An'n annern Dag sehg ik twee vun disse griesen Undeerten — se entern nu de Villa. Denn sehg ik drei un nu hebbt wi hier en richtig Rotten-Gewusel. Gistern leep mi so 'n Deert över de Fööt. Nee, so geiht dat nich wieder. Ok wenn dat Överwinnen kost, sik över dat 5. Gebot henweg to setten. Man gegen de Rotten, dor mütt wat daan warrn.

Süh, un dor is mi de Meerzibbel in'n Sinn kamen.


Bild: /Wikimedia Commons

An de Küsten vun 't Mittelmeer, dor wasst en Liliengewächs — Urginea maritima — dat ene grote, dicke Zibbel utbildt, de utsüht as ene Birne un de bet 2 kg swoor warrn kann. Disse Plant warrt Meerzibbel nöömt. Dat gifft Zibbeln mit rode Pelle un welk mit witte Pelle.

De frische Meerzibbel hett dat giftig Glycosid Scillirosid in sik. Dorüm warrt de Zibbel geern bruukt, üm Müüs un Rotten to verdrieven. Vun dat Glycosid Scillirosid reckt ca. 1 mg för en Rott, dat se krepiert. Dit Nervengift bringt aver blots Naagdeerten den Dood.

Dat gifft männich Rezepte, üm Müüs un Rotten dorto to bringen, de Zibbel to freten. Ik vertell mal, wo de Vadder vun unsen Fründ Eddy dat maakt hett. He meen, so as de Baldrianwörtel de Katten antreckt un Anisöl de Duven, so kann man Rotten un Müüs mit Solten Hering anlocken — villicht ok mit Anisöl un Fenchelöl. Dorüm nagel Eddys Vadder Solthering up en Brett un smeer dor fast dat Rottengift rin. De Erfolg weern jümmers groot.

Ut mien Kinnertiet kann ik erinnern, dat dat eenmal in 't Johr ene Woch geev, dor hebbt alle Lüüd överall in 't ganze Land Rottengift utleggt. Man nehm dormals dat Gift vun de Meerzibbel. Un wiel dat överall maakt wörr, weer de Erfolg bannig goot.

Nu kann ik ja nich verlangen, dat de Böversten in uns Regeern en Anordnung rutgeev, dat all Lüüd in 't Land wat gegen Rotten doon mütt. Un villicht deit dat ok gor nich nödig, denn uns Söhn meent:
"Tööv man af, wenn Ies, Snee un Küll vörbi is; denn haut juuch Rotten vun alleen wedder af."

Wüll 't höpen!


28.3.2010


na baven