DART: Naoschlag nao den Inschlag

van Ludgerd Lüske


Verleden Harvst häbbt wi hier äöver dei DART-Mission tau Asteroiden-Afwehr, ehrn Verloop un ehr Erfolge bericht.


Hier up den Asteroiden Dimorphos schlög dei DART-Sonde up. Bild-Daoten: Wikimedia commons

At dei US-Ruumfohrtorganisation NASA berichtet, is dei DART-Mission nao Plaon affloopen. Plaont was, dat dei lüttke Ruumsonde den Asteroid "Dimorphos" rammt un so in einen annern Ümmloop bring. Nu häbbt dei Forschkers naug Daoten funnen, dat sei säggen käönt, wo daone dei Ümmloop-Baohn sick ännern dö. Vör den Inschlag bruukde Dimorphos 11 Stünnen un 55 Minuten för einen Ümmloop üm den grötteren Asteroid Didymos. Nao den Inschlag wörd disse Tied up 11 Stünnen un 23 Minuten minnert. DART hätt dei Ümmloop-Baohn üm 32 Minuten kötter maokt. Dei NASA-Lüe is ein orig grootet Wark glückt.


Projektbild tau dei HERA-Mission. Bild-Daoten: Wikimedia commons

Dei ESA-Staoten beschlöten in'n November 2019 dei HERA-Mission. Düsse neie Sonde schall den Erfolg van DART nocheins genau un ut dei Nehgde ünner dei Luup nähmen. An'n 15. September 2020 köm dei Updrag taun Bau mit 129,4 Mio Euro unner dat Leit van dat Ünnernähmen OHB. Dei Start is Plaont för 2024. Hera schall 2027 bi Didymos ankaomen. Man will ünnerseuken, wo dat nao den DART-Inschlag up Dimorphos mit den Ümmloop üm Didymus utsüht. Baobenschkoop will man den Inschlag-Kraoter utmäten un wäten, woväl Materiaol dorbi rutflög un wat för'n Wark dat was.


So kann dat utseihn, wenn HERA den Inschlag-Kraoter ünnersöcht. Bild-Daoten: ESA-Projektbild

Denn bericht wi wedder äöver dei Resultate.

Süh uck hier:
Dart impact replay — Dimorphos (Mond) — Wikipedia
Double Asteroid Redirection Test — Wikipedia
Südollnborger Platt: Ludgerd Lüske

17.3.2023


na baven