Kassen-Satelliten

van Ludgerd Lüske


Kassen-Satelliten hört tau dei Klasse van Forschkungs-Satelliten, dei man uck Nanosatelliten neumt. Sei werd "Cubesats" neumt, wieldat sei wohraftig meist kubisch, also wörpelförmig sünd. Bi "nano" denkst an Moleküle usw. So lütt sünd dei Satelliten aower nich. Disse lüttken Satelliten bawt man nao Standard-Maote (Einheiten off Unit = U): 10cm x 10cm x 11cm. Dat Bild hier wiest einen Satelliten van 1 U. Up dissen lüttken Ruum kannst vandaoge al orig väl Technik ünnerbringen.


Bild-Daoten: NASA

Kassen-Satelliten giff et in Grötten van 1U, 2U, 3U 4U, 6U un 12 U off Grötten, dei man ut dit Grundmaot wieder hochräken kann. Dat heit, dei Satelliten käönt nich bloots kubisch, sünnern uck quaderföörmig sien.

Dormit häbbt dei Wätenschkuplers all Vördeilen van dei Normung: All Halterungen passt, uck wenn ein dat Buudeil, dat dor binn stekt, uttuuschen mutt. So as jedein Stecker bi uns in jede Steckdoos passen deit. Wo praktisch dat is, kannst an dei naofolgen Biller allerbest sehn.


Kassen-Satelliten werd in den Artemis-Lastdräger inbawt. Bild-Daoten: NASA


Kassen-Satellit: Upbauelemente. Bild-Daoten: NASA

Uck dat Bu-Element linkerhand, dat an ein Elektronik-Rack erinnert, wieset dei Vördeilen van normierte Buustein-Satelliten. Wohrschienlich is dat dei Taukumst in den Satellitenbuu.

Bit vandaoge hätt dei NASA 211 Kassen-Satelliten utsöcht, dorvan sünd 148 in den Weltruum ünnerwägens. Tauken Johr will man 20 Missionen starten.

Dei NASA verwaltet disse Missionen in dat Kennedy-Weltruum-Zentrum.

Bi dei aktuelle Artemis-Test-Mission settet dei Rakete 10 Kassen-Satelliten mit ünnerscheedlich Funktionen ut.


Südollnborger Platt nao NASA-Originaol-Artikel: Ludgerd Lüske

16.8.2022


na baven