Dei Artemis-I-Mission

van Ludgerd Lüske

Dei NASA hätt eine gewaltige Mission up dei Startrampe staohn. Ehr Naom is Artemis, dei antike Göttin van dei Jagd un den Maond. Un up dei Jagd nao den Maond is dei ganze Mission.

Start, Fleigbaohnen un Trüggefleigen van Orion. Klick up taun Vergröttern!
Bild-Daoten: Lüske, fardigt nao NASA-Vörlaoge

Dei Artemis-I-Mission is dei eierste vulle Test van drei niege Weltruum-Forschkungs-Systeme bi dei NASA. Taueierste dat Orion-Ruumschipp (nee, nich dei ole düütsche SciFi-Serie, sünnern dat hier), denn dei Ruum-Start-System-Rakete (SLS) un tauleßte dei Bodden-Systeme in dat Kennedy-Weltruum-Zentrum in Florida. Artemis I is ein Fleigtest, unbemannt, dei eine Grundlaoge för dat Erforschken van dei bemannte Weltruumfohrt wän schall. Dat schall unsen Insatz un use Käönen wiesen: Menschken wedder nao den Maond trüggebringen un wiederhen dei bemannten Reisenlängten vergröttern.

Startstäe: Startrampe 39B in dat Kennedy-Weltruum-Zentrum van dei NASA in Florida
Startdaotum: 29. August 2022
Startfenster: 14:33 Uhr bit 16:33 Uhr (use Tied)
Missionsduur: 42 Daoge, 3 Stünnen un 20 Minuten
Vörhäbben: wiet trüggeloopen Maond-Ümloopbaohn
Längte: Aale Missionsmeilen tausaome: bold 2,1 Millionen Kilometer
Fastleggte Waoterungsstäe: Pazifischke Ozean, vör dei Küste van San Diego
Trüggefleiggeschwinnigkeit: bit tau 40000 km/h
Waoterung: 10. Oktober 2022
Extrao-Upgaobe: Utsetten van 10 Kassensatelliten (süh Extrao-Bidrag)

Ruumkapsel Orion. Bild-Daten: NASA

Bi disse Mission werd Orion up dei Rakete mit dei üppste Leistung van dei Welt starten un wieder wegfleigen, as jedet för Menschken bawte Weltruum-Fohrttüg maläwe flaogen is. Bi disse Mission schall dei Kapsel 450000 Kilometer van dei Eern weg un 70376 Kilometer achter dei Achtersiete van den Maond vörbifleigen.

Orion bliff so länger in den Weltruum as jedet bemannte Ruumschipp. Dorbi dait man an kiene Ruumstation andocken un dröcker un heiter as vörher nao Huuse trüggekaomen. Disse eierste Artemis-Mission schall dei Leistung van beide, van Orion un uck van dei SLS-Rakete, wiesen un use Käönen testen, bi dat Fleigen üm den Maond tau un bi dat Trüggekaomen nao dei Eern.

SLS und Orion stiegt up. Bild-Daten: NASA

Dei Flug maokt den Weg praot för tauken Missionen in dei Maondgägend mit dei Landung van dei eierste Frau un dei eierste farwige Person up den Maondbodden.

Mit Artemis I schafft dei NASA dei Grundlaogen för dei bemannte Forschkung in den Weltruum. Dor werd Astronauten dei Systeme duune bi den Maond bawen un dei Saoken för Maondbodden-Missionen un dei Mars-Forschkung testen.