 |
|
van Ludgerd Lüske Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Ein tweide Blawe Spauk-Mission is al plaont un schall sik 2026 op den Weg maoken. Sei hätt dei Upgaow, dat dubbelt packte Ruumfohrtüg van Füerfleig (Firefly) mit dat Blawe-Spauk-Maond-Lande-Fohrtüg vörtostellen. Väle Deile van dei niege Mission kaomt ut alle Welt tausaomen. Dei Ümloop-Sonde Elytra Dark dräg dit Fohrtüg. Mit dit besünnere Wark kann man Ruum-Sonden in den Maond-Ümloop un up dei Maond-Achtersiete bedriewen. Beide Sonden häbbt dei süftigen Anlaogen un dei glieken Systeme, dei man uck bi dei eierste Blawe Spauk-Mission bruuken dö.
Wo et hengaiht Nao dat Utsetten van dei Füerfleig-Elytra-Sonde in den Maond-Ümloop schall dei Blawe Spauk-Lander an dei wietest afflägen Maond-Lande-Stä landen. So wiet weg is man up dei Maond-Achtersiete noch nich kaomen. Nao disse besünnere stille Gägend kummp dat Erd-Hochfrequenz-Bruusen nich hen. Dei Maond schermt uck dat Bruusen van dei Sünne in dei Maond-Nacht mit aff. So kann man hier wunnerbor gaue Daoten äöwer dat kosmischke Middel-Öller faoten. Dat staopelte Ruumfohrtüg Baoben an den Staopel bliff dat LuSEE-Nacht-Teleskop van dei NASA an den Lander sitten. Van dor ut kann man dei Radio-Straohlung van den Maond-Bodden mäten. Blawe Spauk schall up den Apparaote-Dräger (DPAF) van Elytra sitten blieben un bi dat Landen up dei Maond-Achtersiete Daoten-, Energie- un Warmte-Reserven läwern. Dei Maond-Paddseuk-Satellit is in den Dräger van Elytra inbawt un schall in den Maond-Ümloop gaohn. Van dorut schall disse Apparaot dei Naorichten för taukaomen Maond-Missionen bewarken. An dat ünnerste End van den Staopel schall Elytra Dark at eine Äöwerdräg-Brügge warken un in den Maond-Ümloop blieben. Hier warkt dat at Naorichten-Station un kann bi dat Kalibreiern van Blawe-Spauk-Bodden-Apparaote helpen.
Plaontet Radioteleskop up den Maond
Nao dat Upstellen up dei Maond-Achtersiete hätt man dat eierste Radioteleskop up den Maond. Düt kümmt van dei NASA. Dat kann leeg frequente Radio-Straohlung in dat binnste Sünnen-System mäten un dat äöwerbläben, rot verschaoben 21 cm-Spektrum ünnerseuken. Disse Daoten käönt helpen bi dat Verstaohn van dei Freuh-Geschichte van't Universum un dat Entstaohn van dei eiersten Sterne.
Verbinnungs-Sonde (UT) — NASA Dei Blawe Spauk-Lander schall uck eine Verbinnungs-Sonde van dei NASA up dei Maond-Achtersiete bedriewen. Disse Anlaoge schall den Maond-Paddseuk-Satelliten in Bedriew setten un einen neien Standard för dat S-Band Proximity-1-Weltruum-Protokoll inföhren. Dormit krigg man denn eine staodige Verbinnung för tauken Maond-Missionen. Nao un Nao krigg dei Maond so ein minschlich Infrastruktuur!
Seismischket Modul (SPIDER)
Dat SPIDER-System van Fleet Space is ein Deil van dei Maond-nao-Mars-Aktion van dat austraolischke Ruumfohrt-Amt. Dat is mit dat Artemis-Programm van dei NASA affstimmt. So kann man bi dat plaonte Bewaohnen van den Maond helpen. Nao dat Utsetten van dei mitdraogen Apparaote schall dei Maond-Lander Blawe Spauk för einen duurhaften Strom un Naorichten-Strom sorgen. So kann SPIDER rund 14 Daoge seismischke Daoten van den Maond-Bodden faoten. Mit disse Daoten kann man geologischke Eigenschupen van den Maond-Unnergrund, dat Mineraol-Profil un Waoter-Ies beschriewen. So winnt man mehr Künne äöwer dei Maond-Infrastruktur un den Stoff Regolith.
Rashid 2 Rover
Dei Rashid 2 Rover, bidraogen van dei Tausaomeschlaoten Arabischken Emirate, schall Bewägungen van den Maond-Bodden up dei Maond-Achtersiete faoten. Mit verschieden upbawte Rover-Roere will man dei Fastigkeit gägen den Maond-Stoff rutfinnen. Dei spiekerten Daoten schaöllt helpen bi dat Entwickeln van neie Maond-Technologien at Ruum-Anzüge, Waohnungen un annere Inrichtungen. Mit eine Riege Kameras un Sensoren schall dei Rover uck dat Plasma, dei Geologie un dei thermischke Laoge van den Maond ünnerseuken. So will man mehr rutfinnen äöwer den Insatz van Materiaol up den Maond.
Maond-Paddseuker
Wenn dei Satellit Maond-Paddseuker, buut van dei Europäischke Ruumfohrt-Agentur ESA, in den Maond-Ümloop kummp, schall hei staodig Naorichten-Deinste för tauken Polar- un Wietruum-Missionen up den Maond aohne Sicht-Verbinnung äöwernähmen. Äöwer S-Band- un UHF-Frequenzen schall dei Satellit Kontakt hollen mit Ruum-Fohrtüge up den Maond-Bodden un in den Ümloop. Dei wiedere Kontakt mit dei Ern löpp denn äöwer dat X-Band. Wüllt Sei't nauer naoläsen? Denn hier klicken: Blue Ghost Mission 2 — Firefly Aerospace
|
||
|
SO-Platt: Ludgerd Lüske 2.11.2025 |
