Dei Blawe Spauk-Mission

van Ludgerd Lüske

Dei Blawe Spauk-Mission is eine Maond-Lande-Mission mit Roboters van dei Firefly Aerospace, dei an'n 15. Januar 2025 losgüng. An'n 2. März 2025 üm 08:34 Uhr (UTC) dö dei Sonde up den Maond landen.

Oginaol-Logo. Bild-Daoten: Wikipedia

Firefly Aerospace was so dat eierste wirtschaftlicke Ünnernähmen, dat so eine Landung henkreeg. Dat NASA-Programm för einen privaoten Versorgungsdeinst nao'n Maond maokt teihn Wätenschup-Aktionen un Technologie-Demonstrationen. So will man dat Artemis-Programm bi dei bemannte Forschkung up den Maond helpen.

Dei Maond-Lander Blawe Spauk häwde aff mit eine SpaceX Falcon 9 Block 5-Rakete, dei uck den japaonschken Lander van dei Hakuto-R-Mission drög. Teihn Lasten kömen so in dat Mare Crisium, dat is ein 500 Kilometer breiet Maondback. Dei plaonte, 60 Daoge duuren, Mission schall den Ma-ond-Regolith geophysikaolischk ünnerseuken. Äöwer ein Wesslwarken tüschken den Sünnenwind un dat Erd-Magnetfeld will man uck wat rutfinnen.

Blawe Spauk-Sonde, Projektbild. Bild-Daoten: Wikipedia

Blawe Spauk-Sonde, Startrampe. Bild-Daoten: Wikipedia

Dei Lander drög uck einen Apparaot tau'n Ünnerseuken van dei Regolith-Adhärenz. Ein Maond-Retroreflektor för dat naue Affstand-Mäten, ein Computer, dei straohlenfast is, Temperatur-Mät-Sonden un mehr Apparaote wörn uck dorbi.

Laog van't Mare Crisium. Bild-Daoten: Wikipedia

Dei Entwicklungs-Stand för den Lander Blawe Spauk dreew in dei leßten Johre staodig vöran. An'n 26. April 2022 was Firefly dormit fardig. Einen eiersten Starttermin har man för dat Johr 2024 faste leggt. In'n November 2023 stellde Firefly einen neien Tied-Plaon up, un dat Start-Fenster schull tüschken dat darde un veierde Johrviddel liggen.

Hakuto-R-Modell van dat japaonschke ispace-Start-up.
Bild-Daoten: Wikipedia

Bit Mai 2024 wörn dei Nammo UK LEROS 4-ET-Driew-Warke för Blawe Spauk fardig. Dat Inbawen in den Lander was in'n Juni fardig. Firefly geef bekannt, dat aals at plaont lopen dö un dei Start in dat veierde Johrviddel för 2024 wän schull. Dei Lander-Ümwelttests füngen an in'n August an dat Jet Propulsion Laboratory (JPL) van dei NASA. So wull man rutfinnen of dat Ruumfohrtüg dei harte Reise uthollen kunn.

Dei Blawe Spauk-Lander van Firefly knipst ein Bild bi Sünnenünergang mit dei Ern an'ne Kimmen. Dei Ern is dei lütte witte Sickel in'e Midd. Bild-Daoten: fireflyspace.com

In'n November 2024 geef Firefly Aerospace bekannt, dat dei Blawe Spauk-Lander praot was för den Start. Sei Start schull in'n Januar 2025 wän.
Dei Lastkapsel mit den Lander binnen schlöt man an'n 10. Januar 2025, un an'n 15. Januar 2025 häwde dei Blawe Spauk-Lander up den Kennedy Weltruum-Baohnhoff aff. Mit an Bord was dei Hakuto-R-Mission 2.

An'n 2. März 2025 dö dat Ruumfohrtüg up den Maondbodden landen. Firefly Aerospace was dormit dei eierste privaote Firma, dei ein Ruumschipp sachte up den Maond landen kunn. Dei Mission schull bit tau 14 Erd-Daoge, einen Maond-Dag, duurn. Drei Solar-Flünke versorgden in disse Tied dei Forschungs-Apparaote mit Strom. Nao den Sünnenünnergang up den Maond sackt dei Temperatur aff up minus 173 °C.

Intressante Links:
Blue Ghost Mission 1: Ghost Riders in the Sky | Flickr
Blue Ghost Mission 1 — Wikipedia
Blue Ghost Mission 1 (Firefly)