Dei Artemis-II-Mission:
Dei Mannschkup

van Ludgerd Lüske



Dei veier Artemis-II Astonauten*. Bild-Daoten: NASA

Veier Astronauten* willt sick mit Artemis-II üm den Maond waogen. Dat is dei eierste bemannte Mission up den Weg van dei NASA för ein duurhaftet Warken up den Maond. Dorbi will man Wätenschkup un Forschkung dör Artemis inrichten. Mitfleigen daut:

  • Kommandant Reid Wiseman
  • Pilot Victor Glover
  • Insatz-Expertin Christina H. Koch
  • Missionsspezialist Jeremy Hansen

Kommandant Reid Wiseman. Bild-Daoten: NASA

Dei bold 10 Daoge duuren Flug schall dat Käönen van dei NASA bi dei Weltruum-forschkung, bi dei Ruumstart System-Rakete un dat Orion Ruumschipp utprobeiern. So werd die Weg för Missionen un Landungen up den Maondbodden praot maokt. Mit dorbi is dat eierste Fraumenschk un dei eierste farwige Person.

An den 3. April 2023 geef man bekannt, dat Reid Wiseman Kommandant för dei Artemis-II-Mission is. Artemis-II werd dei eierste bemannte Fleigtest van dei NASA mit dei Ruumstart System-Rakete un dat Orion-Ruumschipp üm den Maond. So will man utprobeiern, wat dei Menschk van vandaoge bi dei Weltruumforschkung un den Weg för ein langduuren Forschken un Wätenschkupbedriew up den Maondbodden kann.

 


Pilot Victor Glover. Bild-Daoten: NASA

Victor J. Glover, Jr. wörd 2013 as Astronaut utsöcht. Vördem deinde hei as Pilot un stellverträen Kommandant bi dei Crew-1-Mannschkup van dei Space-X-Crew-Dragon mit den Naomen Resilience. Et was dei tweide bemannte Flug mit dit Ruumschipp un eine Langtied-Mission an Bord van dei Internationaole Ruumstation (ISS). Dor was hei uck Bordingenieur bi dei Expedition 64. Glover is nu Pilot bi dei NASA-Mission Artemis-II.

 

 

 

 

 


Insatz-Expertin Christina H. Koch. Bild-Daoten: NASA

 

Christina Hammock Koch is siet 2013 NASA-Astronautin. Sei warkde as Bordingenieurin up dei ISS bi dei Expeditionen 59, 60 un 61. Koch stellde mit tausaome 328 Daoge in dat All einen Rekord för den längsten Einkelruumflug van ein Fraumenschk up un mök bi dei eierste Frauen-Butsiet-Insätze mit. Koch is nu Missionsexpertin bi dei NASA-Mission Artemis-II.

 

 

 

 

 

 


Missionsspezialist Jeremy Hansen. Bild-Daoten: NASA

Dei Astronaut van dei Kanadischke Ruumagentur (CSA) Jeremy Hansen schall mit dei Artemis-II-Mission nao den Maond fleigen. Dat is dei eierste bemannte Fleigtest van dat Orion-Ruumschipp, dat mit dei SLS-Rakete startet. Hei is dei eierste Kanadier, dei einen Flug üm den Maond waogen will.

Geburtsdaotum: 27. Januar 1976 in London, Ontario; Utbildung: Bachelor of Science in dei Weltraumwätenschkup; Flugzertifizierung: Luftstreek-Transport-Pilotenschien (ATPL); Spraoken: Englischk, Französischk, Grundkünn in Russischk.

 

 

 

Dei Artemis II-Mannschkup in einen Orion-Simulator in dat Johnson Space Center van dei NASA in Houston. Bild-Daoten: NASA/James Blair

Süh uck hier: NASA-Video

Dei Mannschkup mit veier Astronauten* schall affhäben tau eine 10 Daoge duuren Mission van den Startplatz 39B in dat NASA-Kennedy-Weltruumzentrum. Mit dei Mega-NASA-Maondrakete werd dei Mannschkup van dei Ern wegfleigen. Twei Daoge bruukt man för den Test van dei Orion-Systeme. Dornao giff et noch duune bi dei Ern einen Stüertest, eiers denn gaiht et up den Kurs nao den Maond. Dat in Bremen bawte Versorgungsmodul van Orion kann dat System pass andriewen taun Äöwergang van den Erdümloop up den Maond-Kurs. För dei Henreise bruukt man woll veier Daoge, denn kummp man up dei annere Maondsiete an. Van dorut werd eine Achtform-Baohn flaogen, wobi Orion mehr at 370149 km van dei Ern wegflügg. Bi den Üppsten Affstand werd dei Manschkup bold 10299 km achter den Maond langers fleigen. Bi dat bold veier Daoge duuren Trüggefleigen daut dei Astronauten* dei Systeme van dat Ruumfohrtüg nau ünnerseuken.

Bi dat Trüggefleigen bruukt man kienen Driewstoff. Man kann up disse sporsaome Fleigbaohn dei Erd-Maond-Schworkraft bruuken un krigg dat so hen, dat Orion nao dei Reise üm dei Maond-Achtersiete up eine natürlicke Ort dör dei Erd-Schworkraft bi dat Trüggefleigen trüggetrocken werd.

Dei Mannschkup mutt dat Hochgeschwinnigkeits- un Hochtemperatur-Wedderinträen uthollen. Dornao duukt Orion vör dei Küste van San Diego in den Pazifischken Ozean. Hier haolt ehr eine NASA-Navy-Uphaolmannschkup rut un bringt ehr an Land.


Orion achter den Maond, dei Ern is maximaol wied weg. Bild-Daoten: NASA

Dei NASA-Ruumsonde Orion hätt in'n Dezember 2022 bi dei Artemis-I-Mission van sick ein Bild mit dei Ern un den Mond upnaohmen, süh baoven. Dat Bild mök eine Kamera an dat End van einen Solarflunk. Dei Ern is hier dei achterste Himmelskörper un schient lüttker as dei Maond. Wo warrt sik dei Besatzung dor woll fäuhlen...?


Originaolartikel: NASA: Artemis II Besatzung
Bildbewarken: Ludgerd Lüske
*: Genderteiken


Südollnborger Platt: Ludgerd Lüske

10.4.2023


na baven