 |
|
van Ludgerd Lüske
Dei Startmöglichkeiten häbbt tau daun mit dei Ümloop-Mechaniken un dei nödige Leistung. Dorbi giff et uck Daoge, an dei ein Versorgen off dat Weer un annere Startrechte, dei uck dei Start-Ostrichtung bruuken willt, nich so gaut löpp. Et gellt, dat man in dei vörseihn Start-Wäken veier Starts maoken kann.
Hier gifft dat ein Animatschon van den Flug: Flug-Animatschon NASA-Astronautin Christina Koch, dei Missions-Stüerfru, un dei annern drei Maaten van dei Artemis-II-Mannschkup probeierden an'n 12. August 2025 dei Brüggen van dei Startrampe nao dat Ruumschipp ut. Rakete un Startrampe staoht noch in den Raketen-Bau-Torn van dat Kennedy-Ruumfohrt-Zentrum in Florida. Dei Artemis-II-Mannschkup und dei Bodden-Mannschkup, dei för den Missions-Start un Flug verantwortlick is, maokt sick praot för eine vullstännige Simulation tausaome mit aale mitwarken Mannschkuppen un Inrichtungen. So will man sick gägen aals rüsten, wat passeiern kunn. Dei NASA-Mannschkup mit Reid Wiseman, Victor Glover un Christina Koch un uck mit den kanadischken (CSA) Astronaut Jeremy Hansen hätt in dei kaomen Maonde einen vullen Terrmin-Plaon. Dornao schäöllt dei Astronauten aale Träes för dei Flug-Pläöne dörspälen. Dat löpp solange, bit ehr Euwen in automatischk affloopen Aktionen äöwergaiht. Jedet Bedeinen an ehr Ruumfohrtüg schäöllt sei utwennig kennen.
Mehr Info över dei Vörbereiden: NASA arbeitet auf die Artemis-II-Mondmission hin Nu hätt dei Astronauten-Mannschup ehr Wark vörnanner un dei Technik-Lüe häbbt dat Raketensystem ut dei grote Halle feuhert un an'n 17. Januar 2026 up dei Start-Stäe 39B affstellt. 12 Stünnen hätt disse Fohrt mit dei fardig upstellte Rakete un den Start-Torn duuert.
Dei Bodden-Mannschkupen sünd midden in ehre mehrdaogs Tests van dei Funkfrequenz-Kommunikation tüschken dei Rakete un dat Kontroll-Sytem Eastern Range. Dei Technikers schäöllt all an dit Wäkenend mit dat Praotmaoken van dei beiden Faststoff-Driewers anfangen. In dei Orionkapsel laodt man dei leßten Saoken, Tablets för dei Mannschkup, Medizin-Utrüstung un Apparaote för dei Wätenschkup. Dortau hört uck dat AVATAR-Forschkung. Dissse Forschkung löpp tausaome mit annere Studien äöwer dei Gesundheit un dat Kontant-Wän van dei Artemis-II-Astronauten. Dei NASA will so rutfinnen, wo man dei Gesundheit van dei Astronauten an'n besten wohren kann bi dei Aktionen up den Maond-Bodden off läöter hen up den Mars. Bi den Test-Affloop (WDR) schäöllt dei Mannschkupen wiesen, dat sei mehr at 700.000 Gallonen kryogene Driew-Stoffe in dei Rakete tanken käönt. Dotau schäöllt sei den Start-Countdown un dat Ut-Tanken van den Driew-Stoff ut dei Rakete euwen, dorbi warket dei Atronauten aower nich mit. Wenn et wän mutt, käönt dei Technikers dei SLS un Orion för nödige Arbeiten wedder trügge feuhern in dei hoge Raketen-Upbau-Halle. Dat Start-Fenster för Artemis II gaiht an'n 6. Februar aopen. Aower dei Missions-Leitung dait nao den Test urdeilen off dat Ruum-Fohrtüg fleigen kann, dat Start-System un dei Astronauten un dei Bedriew-Mannschkupen pass präpareiert sünd. Eiers dornao legg man den Start-Termin faste. (Vorbereitungen für die Startrampe Fortschritte im Vorfeld der Artemis-II-Nassgeneralprobe — NASA)
Ein Banner mit dei Unnerschriften van NASA-Lüe un Firmen-Lüe is an den Tuun van den Start-Komplex 39B faste bunnen. Vörher har man dei NASA-Artemis II-SLS-Rakete mit dat upbawde Orion-Ruumschipp an'n 17. Januar 2026 nao dei Start-Rampe bröcht. Nu kann et losgaohn!
Un noch ein Tipp för Fans: Hier kann man eine eigene Bordkorte kriegen: NASA Artemis II | Senden Sie Ihren Namen ins All. Südollnborger Platt: Ludgerd Lüske
|
||
|
25.1.2026 |
