Hahn op St. Petri

Pilgern in Hamborg:
Buten bi de St.Petri-Kark

De Petriturm mit sien Klocken, de lütten Glockenfinster doröver un baven in den Turm de "Bullogen"

Nadem ik binnen in'n Turm baben weer un denn wedder ut de Kark keem, bün ik 'n Stück wieder weg gahn un heff den Turm fotografeert, mit de Bullogen. Vörher heff ik gar nich wusst, dat man dor baben rutkieken kann un dat wohrschienlich jüst Lüüd ut een vun de Finstern na buten op en Deel vun Hamborg keeken. Graad, ut welkes Bulloog se in den runden Turm kiekt. An alle veer Sieden is en Klock an'n Turm.

Bullogen bit ganz na baven in de Spitz!

Schöne Stroomkassen vun Vincent Schulz

Dorna bün ik rechts an de Kark rüm gungen. Dor is de St.Petri-Kark op en Stroomkasten opmaalt. Dat hett de Künstler Vincent Schulz maakt. He is 1984 as Söhn vun en Künstler-Familie in Hamborg op de Welt kamen, 2004 hett he sein Fach-Abitur in'n Bereich Gestaltung un Design maakt, 2005 Studium an de Kunstschool Alsterdamm. Sietdat is he frieschaffender Künstler.

Nanu, hier schallt de Gedanken to'n Hollstopp kamen — un kriegt togliek en Impuls!

Mobil un dochen fastsett: de Inkoopswagens

Denn weer ik bannig verbaast, worüm de velen Inköpswagen op den Platz stunnen. Dat Schild "Auf die Plätze" hett mi schlau maakt. Aver as ik vör poor Daag wedder an de Kark weer: keen eenzigen Wagen mehr. Ik heff an dat Karken-Büro schreven un de Info kreegen: dat is jümmers en "Sommer-Projekt". Dat fangt Enn Mai/Anfang Juni an, ahn en vörher fasten Termin. Üm de Wagens op den Platz optostellen, bruukt se jümmers de Verlööf vun de Stadt Hamborg. Eerst wenn se de hebben, köönt se denn ehr Projekt wedder starten.

Bi St. Petri sitt Se in de eerste Reeg!

St. Petri vun'n Speertort ut sehn

De Evangelist Lukas mit sien Emblem, den Stier

Siedenportal: De Evangelisten Lukas (links) un Johannes (rechts)
flankeert den Naamspatron vun de Kark, Apostel Petrus

De Evangelist Markus mit sien Emblem, den Lööw

An de Buten-Fassaad vun de Kark sünd mehrere Marmor-Skulpturen in'n neugotischen Stil vun Aposteln ut't niede Testament. De hett de düütsche Bildhauer August Albert Theodor Herzig (1846 born in Hamborg, storven 1919 in Dresden) al 1888 maakt.

Ehrenplatz twüschen de Evangelisten: Petrus mit sien Emblem, de Slötel to'n Himmel, in de Hand

De Evangelisten Matthäus un Johannes mit ehr Embleme Jung (hier en Engel) un Aadler

Vörn, över de Döör vun de Kark, sünd Jesus un twee Engels. Petrus un Paulus an de Westsiet. De hett he mit den Bildhauer Carl Fr. Neubert tosamen maakt. Vun den heff ik keen Infos funnen.

Siedenportal mit Matthäus un Markus

Bi so veele Manns-Lüüd: in de Kark is en Fru, de Hillige Maria. Also immerhin uk en Fru dorbi.

Ik bün denn de Straat Speersort wiedergungen. In Nummer 10, an de Eck vun de Kreuslerstraat, is vun dat Archäologische Museum de so nöömt "Bischofsturm". Dor weer ik al mal binnen, vör poor Jahren, aver leider warrt dat wull eerst in Fröhjohr 2023 wedder opmaakt. Se buut üm.

In dat Museum köönt se Archäologie mitten in Hamborg kieken. De Bischofsturm is een vun de bedüdendsten Boden-Denkmalen, in't Ünnergeschoss vun den St.Petri-Hoff. Dat ringförmige Turmfundament ut dat 12. Johrhunnert (!) is dat öllste Steengebüüd, dat noch besteiht, in de Hamborger Ooltstadt.

Dat Archäoskop erinnert jichenswie an en rosarode Swienssnuut — mit de twee Kieklöcker dorbinn

De Naam "Ooltstadt" is hüüttodaags man blots noch vun de Verwaltung her antosehn, denn dat gifft kuum noch ole Gebüüden. Hamborg weer mehrmalen afbrennt.

Gegenöver vun de Kark St.Petri, an'n Domplatz, steiht das "Archäoskop Hammaburg". Dat is en Kiek-Reedschap, de man üm 360° dreihn kann, so dat Se en Blick över den ganzen Platz hefft, wo fröher de "Hammaburg" stunn, un se köönt en 3 Minuten duernden Film ankieken över de Entwicklungs-Geschicht. As ik letzt dor weer, gung dat mit'n Dörchkieken nich — dor weer wat twei, aver en Fru stunn an den Apparat un hett Rätsel lööst.

Oh, al so laat!

So, leve Lüüd, warrt Tied! Dat neegste Mal vertell ik, wo ik vun dor ut wiederpilgert bün.

Över dat Logo-Deert vun dat Museum kunn ik
nix Naues rutfinnen — süht intressant ut, nich?