Dat Raathuus ut den Petri-Turm sehn

Pilgern in Hamborg:
Hooch rut op den Jakobs-Weg

Siet 2020 Corona, denn de Krieg in de Ukraine. Un wat hebbt wi dorvun? De "galoppeernde Inflation". Wenn du inköpen geihst, is dat Geld bannig gau weg. Ik glöv, mennigeen sett de Priesen nich man blots wegen de högeren Rohstoff- un Energie-Priesen rop, un wat de Hööcht vun de Inflaschoonsrate is, na mien Erachten is dat uk mehr as blots 10% in September. Dor schient mi Pilgern as en goden Weg, bi sik sülms antokamen, aftoschalten.

St. Petri stellt sik vör

Henwies op St. Petri in de Mö

Dütmal bün ik mit mien Fohrrad to'n Rathuusmarkt fohrt un denn röver in den Speersort. Woher de Stratennaam kümmt, is nich ganz wiss. Villicht, wieldem dor en Dietmar Speer Grundbesitz harr, or wieldem de Straat an de Kark St.Petri vörbiföhrt, also "St.Petris Ort" — se heet so siet 1472.

Äh — also Lustwanneln geiht anners, oder?

Ik heff mi Gedanken maakt: Wat is de Ünnerscheed twischen spazerengahn — in en Park, Natuurschutzgebiet or an't Water — un pilgern? Egentlich meent pilgern "feernwannern mit en religiöse or spirituelle Afsicht". Un spazeren gaht wi meistens man blots korte Streken, uns to verhalen, quasi "lustwandeln"

Siet Corona un de Masken-Plicht in Bus un Bahn bün ik nu veel mit mien Fohrrad in Hamborg ünnerwegens, un dat gifft jümmers wat Niedes to ent-decken, ofschoonst ik al vör 44 Johren vun Schleswig-Holstein in düsse schöne Stadt trocken bün. De Jakobs-Weg dörch Hamborg is en gode Gelegenheit, en niedes Teel to hebben. To kieken: wo geiht he lang? Dor denn wat to ent-decken, wo ik tovör villicht achtlos an vörbigungen bün. Kieken, woher hett de Stadt-Deel sien Namen, woher de Straat? Wat gifft dat op düssen Weg Besünneres — Gebüüd, Parks, Künst …

Düsse schöne Stadt... rechts Raathuusturm, links de ole St. Nikolai un achtern St.Katharinen

Bi't Pilgern achtsam ween un dat Bewegen an de frische Luft deit mien Körper, Geist un Seel bannig god. Ik glöv, bi't Niedes-Ent-decken sorteert sik uk wat in mi sülms, in dat Wohrnehmen.
Ent-schleunigung as en Chance för wat Niedes. Wo heet dat so schön: "Welkeen langsam löppt, kummt uk an't Teel."
Ik heff un will keen Smartphone, denn wenn een wat vun mi will, kann de Person tohuus op mien Antwoortapparaat schnacken or mi en Mail schicken. För en eventuellen Notfall heff ik mien ooles Handy bi mi, dat is aver afschalt. So bün ik apen för allens um mi rüm, bün 100% bi dat, wat ik maak.

Bonhoeffer-Skulptur vun Fritz Fleer

Mien eerstes Teel in'n Speersort weer de St.Petri-Kark. Dat is de Kark mit den tweethöögsten Turm in Düütschland, 123 m hooch. De Turm-Spitz is in 132 m.

An de Siet na de Mönckebergstraat — de is al siet 1908 nöömt na den düütschen Juristen un siet 1890 mehrmoligen (!) Börgermeister vun de Stadt Hamburg, Johann Georg Mönckeberg — steiht siet 1979 de Skulptur vun Dietrich Bonhoeffer (1906 - 1945). He weer Pastor vun de bekennende Kark un Wedderstands-Kämpfer. In dat KZ Flossenbürg hebbt se em hinricht. De Skulptur hett de düütsche Bildhauer Fritz Fleer (1921 - 1997) maakt.

Dat Besünnere an St.Petri: Dor kannst op den Turm rop! An de Sied is de Ingang mit de beiden Löwen-Köpp. De Inschrift dorop is to de Grundsteen-Leggen. Wenn denn in de Kark binn büst, holl di na rechts. Dor is en lütten Ruum mit Andenken. En Mann hett de 4 € Intritt kasseert un gifft di, wenn du dat wullt, en Schlötel för Taschen un Kleedasch, de kannst dor in en Fack rinpacken un afschluten. Ünnen liggt uk en List, wo du dien Namen indragen muttst, dormit se later markt: jo, de Person is heil wedder rünnerkamen.

De Utsichten sünd op jeden Fall good!

De Wendeltrepp

Vör poor Johren weer ik al mol op den Turm west, aver man blots bit to de Bimmelklock. De eersten 111 Stopen geiht dat en Wendeltrepp na baben, un denn kaamt Stopen ut Holt. Dat is echt en Rutfeddern, denn du kannst dörch de Stopen jümmers dörchkieken, wat ünner di is. Nix för Bangbüxen!

Na 141 Stopen steihst denn op eenmal — Upps! — vör en lütten Smart! Wo se den wull dor ropkreegen hebbt...? Un denn heff ik sehn: Dat is dat Karken- un Füürwehr-Museum! In en lütten Ruum steiht en Füürwehr-Mann mit en Morse-Streifenscheider, links vun em — wat'n Pech aver uk, de Döör weer to! — Tassen un Kannen: sien Fröhstück? Naja, ik harr jo al tohuus mien Fröhstück.

Is de Smart villicht de Wenneltrepp hoochfohrt?

He passt op — un morst!

Schild an de Läute-Anlaag för de Glocken

So gastlich, wokeen wull dor nich geern sitten gahn?

Ok de Schindeln sünd in Aktion

Schöön gestalt'te Glocken geevt uns dat Leit op den steilen Pilgerpadd na baven

Na 177 Stopen kaamt de Läuteglocken "Petrus un Paulus" vun 1924, 6.200 kg (!) swoor; de Glock mit Psalm 150 von 1878 is man blots 1.382 kg swoor, de Glock mit Maria un Bischof vun 1922 is 3.200 kg swoor.

Na 218 Stopen is de "Stundenglocke Aepinus" vun 1939 to sehn, 2.980 kg Wicht bringt se op de Waag.

Na 254 Stopen is de letzt grote Bodden mit de Turm-Klocken.

Na 330 Stopen bün ik denn bi de eersten Bodden mit runde Finstern, de "Bullogen", ankamen. Rundüm steiht vör jedeen Finster en Stohl, un du hest en grootaardigen Blick op Hamborg. En Disch steiht uk dor, wenn du mal Paus maken wullt.

De Lohn vun de Möhgd — Blick ut en Bulloog op den Alster-Anlegger, as in en anner Welt

De restlichen Stopen, alltohoop sünd dat 544 (!), bün ik nich mehr lopen. Dor baben in de Turm-Spitz is de Utsichts-Punkt. Lohnen wöör sik dat bestimmt!

Denn geiht dat de velen Stopen wedder dal, jümmer schön langsam. In't Binnere vun de Kark gifft dat ok noch veel to sehn, un se köönt sik dor vun de Kladderie verhalen.

Wenn Se de Kark wedder verlaat, schüllt se sik vun den Lööw-Wächter an't Haupt-Portal verafscheden. Wenn Se buten an de annere Siet vun de Kark staht, köönt Se de "Bullogen" sehn.

Wat ik dor noch allens beleevt un uk achter de Kark ent-deckt heff, vertell ik en anner Maal.

So en schöne Stadt...