Schohputzfent
Wullt du würkelk
nix anners doon
as Frömde
de Schoh blank frieven
för fiev Dirham
kunnst doch wat leren
wat du in d' Kopp hest
kann di nüms klauen
so as dien Kist
mit Bössel un Furr
un dat bietje Schohputzkraam
för swarte un för brune Schoh
deit sük ok mehren
wat du in d' Kopp hest
brengt Tins dien Verstand
kunnst worden
Schoolmester
Dokter
Bankdirekter
of Literat in disse Staat
kunnst schrieven
Gedichten
mien lüttje Fent
over Schohputzers
Agadir
Allah
Köning
Vaderland
so steiht dat schreven
in steenern Schrift
mit witte Flinten
boven de Haven
van Agadir
unner de Kasbah
arabisk Letters
för Köning
un Vaderland
so trucken mien Lü
dreemaal in d' Oorlog
tegen Frankriek
un ok
tegen dien Marokko
Casablanca
Ich schau dir in die Augen
Kleines
Casablanca
Humphrey Bogart
Ingrid Bergmann
Casablanca
Umslagstee van Schicksalen
düütse Suldaten
na over dusend Mielen
to Foot
dör Steen un Sand
well bleev liggen
Casablanca
in Schepen stoppt
för de Lagers
na Oversee
well bleev up See
Casablanca
Stee tüsken Welten
alltied noch
Smelt-Ovend
van Spraken un Kulturen
Gedachte un Lengen
Haven na 't Weltmeer
Stadt in Riek un Kark
dien Casablanca
Marrakesch
So ik nix anners harr
weg kunn van mien Stadt
kunn ik blieven leven
in Marrakesch
un mit di Hand in Hand
over de Markt lopen
de Muuskanten tolustern
de Gauklers tokieken
de Apen danzen sehn
un Slangen up d' Steert stahn
de Waterdragers ofkunterfeien
för en Dirham of twee
un bi de Schriftgelehrte
an sien Pult
daar an de Deel
mien Testament upsetten
so ik nix anners harr
un neet sülvst schrieven kunn
