Ramadan
Ik kunn mit di
de Koran lesen
een Sure na d' anner
Poesie as 't is
un smachten
dör Ramadan
verzichten
up Leckerst un Best
so ik
bi Allah
up de Hemelsledder
en Stapp
winnen kunn
kunn ja bit Paasken
dat Fernsehn utlaten
nix keen Flees eten
nix keen Koffie drinken
neet na Fraulü luren
so de Welt wat beter wurr
leet ik 't
Genoog of neet
Geev ik
to minn Drinkgeld
wat hest du al daan
för mi
doo ik di sehr
geev ik to vööl
för dat du daan hest
för mi
doo ik di sehr
kunn ik doch
in dien Ogen lesen
genoog of neet genoog
so segg doch
so wies mi
wat weert is
dien Doon
Nachts up See
Hele Nacht
büst du buten west
bi ruge See
mit dien brotterg Boot
un de schitterg Netten
twee of dree Angels hest sett
Stück of wat Plattfiss
gung di in 't Nett
een Barrakuda
un een Seeaal an d' Haak
een Rogg ok
hest dien Boot
in Pulk fastmaakt
in d' Haven
büddst an
wat di tofull
disse Nacht
ok twee slanke Makrelen
noch good genoog
de du funnst
in de Maag
van de Rogg
In de Atlas-Bargen
Mit dien Hamerke
kloppst du loss
daar boven
in de Atlas-Bargen
versteihst woll
steenworden
Fiss
Krabbers
Kraken
Mussels
Sniggen
Jahrmillionen old
dien Geschicht as mien
kloppst hör ut
hör steenern Bedd
wor se slepen
Jahr um Jahr
en Karkhoff
ut de See
to Koop
för en paar Dirham
