Pingsten
vun Behrend Böckmann
Keek tau Pingsten hoch taun Häben,
Wull as dei Jüngers eins beläben,
Dat dor kümmt mit einen Mål
Dei Hillig Geist von båben dål,
So as dat nå dei Upfohrt wier
Un sik Gott Vadder geef dei Ihr.
![](../natur/naturbiller/barkenbl_03.gif)
Un bi't Kieken deit mi düchten,
Hüt ward an'n Häben nix mihr lüchten,
Doch denn kümmt mit einen Mål
Dei Hillig Geist in Druppen dål,
Sei schämern as ein Diamant,
As upreicht Parlen up ein Band.
Un mit Freud däd ik verkünnen.
Dat ik up Bläder künn wat finnen,
Wat so keem mit einem Mål
As Hillig Geist nå ünnen dål,
Un jedein Parl, ik bün mi wiss,
Nich blot 'n Wåderdruppen is.
![](../welt/welt_biller/blumen3.jpg)
Barkengräun as Pingstputz
Ik
besinn mi noch, dat Größing an ehr Hus Drht spunnt
harr, achtert Hus, anne Sünnensied, för den Wien un vör
dat Hus, anne Stråtensied, för den Pingstschmuck. Tau Pingsten
mössten wi Kinner ümmer gräune Birkenrieser hålen
un dei würn denn achter dei Drht fasthåkelt. Un ok
dei Kutsch för dei Pingstutfohrt wür mit Barkengräun
utstaffiert. Ni nich heff ik fråcht, worüm dat so måkt
wür, denn dat wür ja ümmer so måkt un dorüm
hett man wull nich dornå fråcht. Man hett ok nich dornå
fråcht, worüm dat tau Pingsten kein Gåwen as tau
Wihnachten un geef un man
nie nich as tau Påschen Eier söcht hett. Klor wier wer,
af Pingsten bläben dei langen Strümp in't Schapp un dormit
ok dei Leibchen mit den Lockgummi as Strumpholler. Mudder un Größing
hålten dei Sommersåken rut un sei hemm' ehre anruuchten
Ünnerkleeder un Vaddern sien anruuchten grisen Ünnerbüchsen
mit son'n stink'sche Kugeln gägen dei Flattermott inpackt.
An'n Pingstsünndach güng't inne Kark un Fru Pastern hett,
wenn sei nich ordeln mösst un up uns rünnerkeek, mit'n schulschen
Blick faststellt, wecker Konfirmand dor wier un weckern Herr Paster
mål anstöten mösst, sik doch öfters wedder inne
Kark seihn tau låten. wer tau Pingsten würn ok dei
Pingstossen un dei Huswand un mit Barkengräun anputzt.
Inscheiten
deit mi't, as ik dit wer Pingsten in Fritzing Reuter sien Geschicht
von "Dörchläuchting" läs: "So kamm denn
nu de irste Pingstdag 'ranner. De ganze Stadt was utputzt mit Mai,
ein jedes Hus hadd sine Lauw vör de Dör, un dorin satt de
ihrsame Börger mit Slapmütz un Pantüffeln, en Teiken,
dat Rauhdag wier... un ganz Niegen Bramburg swemmte in idel Wollgeruch,
de sik halw von unsern Hergott sine Barkenbüscher, halw von Bäcker
Schultsch ehren säuten Kringel herstammte."
Dormit Pingsten nu nich blot wat för't Hart, sonnern ok för
den Geldbüdel is, würn nå un nå tau Pingsten
Johrmarkt un Schüttenfest afhollen orrer ok allerlei Spills måkt,
dei Rieder mit ehr Pier un dei Kauhjungs mit ehr "Ossen".
Dat geef Spills för lütte Jungs un wecker för dei Dierns
un in'n bestimmt' Öller hemm s' giern tausåmen "Jumfernlärn"
spält. Bi dit Späl seeten twei Dierns up einen Knarrbom,
son'n Oort Karussell, un würn vonne Jungs inne Runn' düdelt
un sei, dei Dierns, mössten denn, wenn s' so ornlich in Schwung
wiern, nå wat griepen un dat tau fåten kriegen. Nich allens
hett sik hollen, wer die Rostocker Pingstmarkt hett sik sörre
1370 hollen, hei kümmt immer wedder inne plattdütsche Dichtung
vör. Bi Fritz Reuter inne "Stromtid", inne "Reis
na Konstantinopel" un in den Riemel "En snacksches Dird",
bi John Brickman in'n "Kasper Ohm" un "Dörten
Blanck" von Felix Stillfried is ok up'n Rostocker Pingstmarkt
tau finnen.
Mål son'n lütt bäten taurüchkieken is doch ganz
schön; un schön wier't doch ok,
wenn mål wedder die Huswand mit Barkengräun anputzt wür
un hier un dor dor mit Kinner mål wedder Semmelpoppen backt
würn. Un woans wier dat, wenn so, as vör Tieden, dei jungen
Burschen anne Huswand von dat Mäten, up dat sei ut sünd,
'n lütten Barkenbom as Teiken von Leif afstellen un ehr mit'n
Spur von Kalk den Wech wiesen, dormit s' em ok finnen deit?
![](../natur/naturbiller/barkenbl_01.gif)
|