Party inne Dönsk:
Dei Dildo-Party

vun Behrend Böckmann

As Sarah endlich friegen wull,
fünn sei dat ganz wunnervull,
as Afschied von dat olle Läben
för Frünninnen ein'n uttaugäben.

Sei fangt in't Nett tau butschern an
un scrollt sik denn 'n Party ran,
dei man von'n Tupperworen kennt,
doch sik Dildo-Party nennt.

Leiwesengel näumen's sik
un verspräken Leiwesglück —
un dei Engel sünd sik wiss,
dat dat dat Beläwnis is,

wenn inne Dönsk ward utprobiert,
wat dei Fru bi'n Sex pläsiert,
mit Sexspältüüch in'n niegen Trend,
dat 'n so noch gor nich kennt.

Ok mit Glitsch taun Stimulier'n
dörp man't Spältüch utprobier'n,
in'n Näbenrum bi Lichtenschien,
bi Blaumen un bi Rükels fien.

Väl, wat 'n hier beläben deit,
man ut'e eigen Schaultiet weit.
Wo "Phallus" blot 'n Frömdwurt wier,
ward nu dei Dildo taun Pläsier.

Kein roder Kopp, kein grote Uhrn,
hüt hett man disse Scham verlurn,
lött dei Boddervågel schnappen
bi'n lütten Schluck un fiene Happen.

Un dormit kein Tratsch upkümmt,
wecker wat för 'n Spältüch nimmt,
man separat bestellen kann
inne Stuf gliek näbenan.

Dei Leiwesengel räken ut,
wat von'n Ümsatz kricht dei Brut,
un Sarah kreech — dat harr's nich dacht —
Sexspältüch för dei Hochtietsnacht!