Huflattich — so ännert sik de Tieden

vun Günter Weber

Dat is Huflattich. Kennt ji Huflattich?, fröög ik mienen Enkel Max. Sülfstverständlich kennt hei Huflattich (Tussilago farfara) nich. In dat Wöörbauk steiht, dat de Knubben unn de Bläder gaut gegen den Hausten sünd, wenn se as Tee drunken ward. Gegen den Hausten? Denn will ik vertellen, woans de Huflattich ok noch för den Hausten gaut weest is.

Dat hier is denn de Tobak, den mien Grotvadder anbuut hett. För sik sülfst. Hei harr een scharp Oog op sienen Tobak. Denn wi smökten ok all so af un tau.

Bild: Pixelio, © Triopak

Dor kaam ik denn wedder op den Huflattich taurüch. An uns Opa sien ründenblätterigen Tobak kemen wi nich ran. Ja, da hebbt wi denn Huflattich dröögt. De Bläder wöörn dröögt un denn ut Papier vun de „Freie Erde“ Blättchen för den Glimmstengel snäden. Dat hebben wi denn qualmt. Smöken weer dat nich. Wi hebbt nich bloots hausten müßt. Wi hebbt regelrecht krööcht. — Vunwegen Huflattich is gaut gegen Hausten.

De Tollense wöör jedes Johr vun dat Kruut sneden. Denn weer dat nich so gaut tau swemmen. Wie legen denn up’n Bootstieg.

Tollense. Bild: Wikimedia Commons, © Botaurus Stellaris

Tau uns Tiet geev dat in Klempenow so schmucke Deerns. De kemen denn ok hen na den Bootsstieg un wi kakelten un alverten woll so’n beten rüm... — Nu is wedder Huflattich an de Reig.

Wi weeren so jung. De Sünn, de schien. Uns gehörte de Welt un en Huflattich-Glimmstengel. De Deerns smökten mit. Ok wenn sei vun de Huflattich-Zigarett kriedwitt wöörn. Hausten? Natürlich blafften wi beder as uns Hoffhund Rolf. Een wüßt wat: In’n Westen koost de een "Ami" 8 Reichsmark. De kunn keeneen köpen. Wat de ok so krööcht hebbt, wenn se doch maal een Ami kregen?

Avends, as wi na Huus kemen, röken wi bloots noch na Melk. Wi harrn uns welk besorgt.

Bild: Wikimedia Commons, © Stefan-XP

Sünnavends güng ik later na Bartow to’n Schwoof. Denn smökte ik dat Düwelskruut vun den Huflattich nich. Dat störte denn doch bi’t Knutschen.

Zigarettenkippen! Mi gräst bi dat Bild! So hebbt sik de Tieden ännert. Nu bruukt wi keen Huflattich un keen Tobakplanten miehr.

De frische Luft vun de Tollense is doch wat beder. Hüüt un de Dag heff ik Lengen na de Eck, wo ik ranwussen bün, ok wenn wi Huflattich-Bläder smöökt hebbt. Wat woll Jungs in dat Öller maken mütt!! Un ok mit ehr Deerns.